ដោយៈ បាយ័ន / សៀមរាបៈ លោក សុខ ថុល អភិបាលរង​ខេត្ត តំណាង​លោក ទៀ សីហា អភិបាល​នៃ​គណៈ​អភិបាល ខេត្តសៀមរាប និង​លោក ម៉ាក​ថូ​ម៉ាស់ ជេន​នី សហ​ស្ថាបនិក របស់​អង្គការ សមាគម​សម្រេច​សុបិន​កម្ពុជា បាន​អញ្ជើញ​ជា​អធិបតី ក្នុង​ពិធី​សម្ពោធ ដាក់ឱ្យ​ប្រើប្រាស់​អគារសិក្សា ១​ខ្នង ៤​បន្ទប់ និង​បង្គន់​អនាម័យ ១​ខ្នង ៤​បន្ទប់ ស្ថិតក្នុង​ភូមិ​សំរោង​ក​ញ្ចោ​ច ឃុំ​ឫស្សី​លក ស្រុក​ជីក្រែង ខេត្តសៀមរាប កាលពី​ថ្ងៃទី​២៥ ខែវិច្ឆិកា ឆ្នាំ​២០២២ ។​

​ក្នុងឱកាស​នោះ លោក សុខ ថុល បាន​ថ្លែងថាៈ ” វិស័យ​អប់រំ មាន​តួនាទី​យ៉ាងសំខាន់ ក្នុងការ​រួមចំណែក ដល់​ការអភិវឌ្ឍ​ជាតិ ដោយ​កុមារ យុវជន និង​មនុស្សពេញវ័យ ត្រូវ​ទទួល បានការ​សិក្សា និង​ការអប់រំ ពេញ​មួយជីវិត ដែលមាន​ភាព​ពាក់ព័ន្ធ និង​ឆ្លើយតប​ទៅនឹង​តម្រូវ ការ​ទីផ្សារការងារ ប្រកបដោយ​គុណភាព​ខ្ពស់ ហើយ​ការអប់រំ ត្រូវ​ផ្តោតលើ​ការកសាង​ជំនាញ និង​ការ​ផ្តល់ឱកាស ដល់​សិស្ស​គ្រប់រូប ក្នុងការ​ទទួលបាន នូវ​ចំណេះដឹង​មូលដ្ឋាន ដើម្បី​ឈានទៅ​សិក្សា លើ​ចំណេះ​ជំនាញ​បច្ចេកទេស និង​ជំនាញ​ឯកទេស​ផ្សេងៗ ដើម្បី​សម្រេចបាន​ការអភិវឌ្ឍ ដែល​ផ្តល់​អត្ថប្រយោជន៍ ពេញលេញ ដល់​គ្រប់​ស្រទាប់​យុវជន ក្នុង​ការកសាង​អនាគត​របស់ខ្លួន ប្រកបដោយ​គុណភាព ” ។​

​លោក​បាន​ថ្លែងបន្តថាៈ ” ជាការ​ឆ្លើយតប​ទៅនឹង​តម្រូវការ​នេះ ចំពោះ​វិស័យ​អប់រំ​ក្នុង​ខេត្ត យើងខ្ញុំ គឺ​ផ្តោតទៅលើ​ការកសាង​ហេដ្ឋារចនាសម្ព័ន្ធ ការផ្តល់​អាហារូបករណ៍​ដល់​កុមារ ក្នុង​គ្រួសារ​ក្រីក្រ និង​បណ្តុះបណ្តាល សមត្ថភាព​ដល់​អ្នកគ្រ​ប់​គ្រង និង​គ្រូបង្រៀន ដែលជា​ធនធានមនុស្ស ស្របតាម​គោលនយោបាយ នៃ​យុទ្ធសាស្ត្រ​ចតុកោណ​របស់ រាជរដ្ឋាភិបាល​កម្ពុជា ធ្វើ​ឲ្យ​វិស័យ​អប់រំ នៅក្នុង​ខេត្ត កាន់តែ​មានការ​រីកចម្រើន យ៉ាង​ឆាប់រហ័ស ថែមទាំង​បានរួម​ចំណែក​យ៉ាងសំខាន់ ក្នុងការ​កាត់បន្ថយ​ភាពក្រីក្រ របស់​ប្រជាពលរដ្ឋ ការបង្កើន​ល្បឿន ក្នុងការ​សម្រេច​នូវ គោលដៅ​អប់រំ​ជាតិ និង​ឈានទៅ​សម្រេច​នូវ គោលដៅ​សហស្ស​វត្សរ៍ ទាំង ៩ ចំណុច នាពេល​អនាគត​ថែមទៀត ” ។​

​លោក​អភិបាលរង​ខេត្ត ក៏បាន​ថ្លែង​អំណរ​អរគុណ និង​កោតសរសើរ ចំពោះ​អង្គការ​សម្រេច សុបិន​កុមារ​កម្ពុជា ដែល​បាន​ផ្តល់នូវ​សមិទ្ធផល​ដ៏​សំខាន់ និង​មាន​តំលៃ​ដ៏​វិសេសវិសាល នេះ ដោយ​ចាត់ទុកថាៈ ” អគារសិក្សា ១​ខ្នង ៤​បន្ទប់ និង​បង្គន់​អនាម័យ ១​ខ្នង ៤​បន្ទប់ ស្ថិតក្នុង​ភូមិ​សំរោង​ក​ញ្ចោ​ច ឃុំ​ឬ​ស្សី​លក ស្រុក​ជីក្រែង ខេត្តសៀមរាប ប្រកបដោយ​ចិត្ត សប្បុរស ក្នុងការ​រួមចំណែក យ៉ាង​ថ្លៃថ្លា ដល់​ការស្តារ និង​អភិវឌ្ឍន៍​វិស័យ​អប់រំ​នៅក្នុង​ខេត្ត របស់​យើងខ្ញុំ​។ ទឹកចិត្ត​ទាំងនេះ នឹង​ធ្វើឱ្យ​យើងខ្ញុំ ចងចាំ​ហើយ​ចារ​ជាប់​ក្នុង​ចិត្ត ព្រមទាំង​ចារិក ទុក ជា​ប្រវត្តិសាស្ត្រ នូវ​កេរ្តិ៍តំណែល​ដ៏​ថ្លៃថ្លា ឧត្តុង្គឧត្តម​នេះ ជាប់​ជានិច្ច ” ៕/V​