​ប្រែ​សម្រួលៈ​បំណង​(​ដេល្លី​ម៉េល​)៖ ប្រេង​ឆៅ​នៅ​ផ្សារ​អន្តរជាតិ​បាន​ធ្លាក់ចុះ​ជា​ង​២​ដុល្លារ​ក្នុង​មួយ​បារ៉ែល​កាលពី​ថ្ងៃ​ចន្ទ​ទី​២៨​វិច្ឆិកា ដោយ​ប្រេង​ឆៅ​ផ្សារ​WTI​នៅ​អាម៉េរិក​ធ្លាក់ចុះ​ទាប​បំផុត​នៅ​រយៈពេល​១១​ខែ​មកនេះ ចំ​ពេល​ផ្ទុះ​កូវី​ដ​១៩​ខ្លាំង​និង​ការតវ៉ា​ប្រឆាំង​វិធានការ​គ្រប់គ្រង​ជំងឺឆ្លង​នេះ​នៅ​ចិន​ដែលនាំអោយ​មាន​ការព្រួយបារម្ភ​អំពី​ការធ្លាក់ចុះ​តំរូវការ​ប្រេង​។​

​ប្រេង​ឆៅ​ផ្សារ​Brent​នៅ​អាស៊ី​ចុះ​២,១៦​ដុល្លារ​មក​នៅត្រឹម​៨១,៤៧​ដុល្លារ​ក្នុង​មួយ​បារ៉ែល ជា​ថ្លៃ​ទាប​បំផុត​គិត​ចាប់តាំងពី​ថ្ងៃ​១១ មករា ឆ្នាំ២០២២​។​ប្រេង​ផ្សារ​WTI​នៅ​អាម៉េរិក​ចុះ​២,០៨​ដុល្លារ មក​នៅត្រឹម​៧៤,២០​ដុល្លារ​ក្នុង​មួយ​បារ៉ែល ជា​ថ្លៃ​ទាប​បំផុត​គិត​ចាប់តាំងពី​ថ្ងៃ​២៧ ធ្នូ​ឆ្នាំ​២០២១​។​

​ប្រេង​ឆៅ​នៅ​ផ្សារ​ទាំង​ពីរ បាន​ធ្លាក់​ចុះថ្លៃ​ដល់​សប្តាហ៍​ទី​បី​ជាប់ៗ​គ្នា ។​ប្រេង​ផ្សារ​Brent​បាន​ចុះ​អស់​៤,៦​ភាគរយ និង​ប្រេង​WTI​ចុះ​៤,៧​ភាគរយ​កាលពី​សប្តាហ៍​មុន​។​

​ហ៊ី​រ៉ូ​យូគី គី​គូ​កា​វ៉ា ( Hiroyuki Kikukawa)​មន្ត្រី​នៅ​ក្រុមហ៊ុន​មូល​ប​ត្រ​មួយបាននិយាយថាដោយសារតែ​មាន​ការបា​រម្ភថា​«​តំរូវការ​ប្រេង​កាន់តែ​ខ្សោយ​ទៅ​នៅ​ចិន​ដោយ​សារកំណើន​នៃ​ការ​ឆ្លងកូវី​ដ​១៩​នាំអោយ​​មាន​ការតវ៉ា​ប្រឆាំង​នឹង​អាជ្ញាធរ​នៅ​ទីក្រុង​ជា​ច្រើន​និង​ភាពមិនប្រាកដប្រជា​ខាង​នយោបាយ បាន​នាំអោយ​មាន​ការលក់​ចេញ​ប្រេង​ភ្លាមៗ​»​។​

​លោក​បាន​ព្យាករណ៍​ថា ប្រេង​ផ្សារ​WTI​អាច​ចុះ​ក្នុង​រង្វង់​៧០​ទៅ​៧៥​ដុល្លារ ហើយ​ទីផ្សារ​នៅ​បន្ត​ប្រែប្រួល​អាស្រ័យ​លើ​លទ្ធផល​នៃ​កិច្ចប្រជុំ​របស់​ក្រុម​ប្រទេស​ទាំង​ចេញ​ប្រេង​ហៅ​ថា​អូប៉ិច​បូក​(OPEC+)​និង​ការ​​កំណត់​ថ្លៃ​លើ​ប្រេង​របស់​រុស្ស៊ី​។​

​សូមបញ្ជាក់​ថា ចិន​ជា​ប្រទេស​នាំចូល​ប្រេង​កំពូល​នៅលើ​លោក តែ​វា​កំពុង​ជាប់​ក្នុង​គោលនយោបាយ​សូន្យ​កូ​វីដ​របស់​ប្រធានាធិបតី​ស៊ី ជីន​ភីង នៅ​ពេល​ប្រទេស​ភាគច្រើន​បំផុត​នៅក្នុង​លោក​បាន​បន្ធូរ​​បន្ថយ​ការ​រឹតបន្តឹង​វិធា​ការប្រឆាំង​កូវី​ដ​១៩​រួចរាល់​អស់ហើយ​។​

​បា​តុ​ការ​រាប់រយ​នាក់​បាន​ប៉ះទង្គិច​ជាមួយ​ប៉ូលីស​ក្នុង​ទីក្រុង​សៀង​ហៃ​កាលពី​យប់​ថ្ងៃអាទិត្យ​នៅពេល​ការតវ៉ា​ប្រឆាំង​នឹង​ការ​រឹតត្បិត​ប្រឆាំង​កូវី​ដ​១៩​ដ៏​តឹងតែង​របស់​អាជ្ញាធ​របា​ន​បន្ត​ដល់​ថ្ងៃទី​​បី​ជាប់​គ្នា និង​រាលដាល​ទៅ​កាន់​ទីក្រុង​ជា​ច្រើន​របស់​ចិន​។​រលក​នៃ​ការមិនសប្បាយចិត្ត​ក្នុងចំណោម​ប្រជាជន​កំពុង​កើត​មាន​ខ្លាំង​មិន​ដែល​ធ្លាប់​ជួប​ពីមុន​មក​នៅ​ចិន​ដីគោក ចាប់​តាំង​ពីលោក​ប្រធានា​​ធិបតី ស៊ី ចូលកាន់​តំណែង​កំពូល​កាល​ពី​មួយ​ទសវត្សរ៍​មុន​។​ចំនួន​ឆ្លងកូវី​ដ​១៩ប្រចាំថ្ងៃ​នៅ​ចិន​ឡើង​ខ្ពស់​បំផុត​ជិត​៤០.០០០​នាក់នៅប៉ុន្មានថ្ងៃចុងក្រោយនេះ ទោះ​ជា​ប្រទេស​នេះ​នៅ​បន្ត​អនុវត្ត​វិធានការ​ប្រឆាំង​កូវី​ដ​ដ៏​តឹងតែង​ជាងគេ​ក្នុង​​លោក​ក៏​ដោយ​។​

​តេត​ស៊ូ អ៊ី​ម៉ូ​រី (Tetsu Emori)​នាយក​ក្រុមហ៊ុន​Emori Fund Management Inc.​បាន​និយាយថា​«​អារម្មណ៍​មួម៉ៅ​កំពុង​រាល​ចូលក្នុង​ទីផ្សារ​ប្រេង ជាមួយនឹង​ការព្រួយបារម្ភ​កាន់តែ​ខ្លាំង​អំពី​​តំរូវការ​ប្រេង​នៅ​ចិន និង​ការខ្វះ​សញ្ញា​ពី​ក្រុម​ប្រទេស​ផលិត​ប្រេង​អំពី​ការកាត់បន្ថយ​ទិន្នផល​ប្រេង​បន្ថែម។​បើ​OPEC+ មិន​កាត់​បន្ថយ​ការផលិត​ប្រេង​ទេ ឬ​អាម៉េរិក​មិនបញ្ជា​ទិញ​ប្រេង​បំពេញ​ស្តុក​វិញ​ទេ ថ្លៃ​ប្រេង​​ឆៅ​អាច​នឹង​បន្ត​ចុះ​ថែម​ទៀត​»​។​

​កាលពី​ខែ​តុលា ក្រុម OPEC+​បាន​ព្រមព្រៀង​គ្នា​ថា​នឹង​កាត់បន្ថយ​ការផលិត​ប្រេង​២​លាន​បារ៉ែល​ក្នុង​មួយថ្ងៃ​នៅ​ពេញ​មួយឆ្នាំ​២០២៣​។​កិច្ចប្រជុំ OPEC+​បន្ទាប់​នឹង​ពិនិត្យមើល​ស្ថានភាព​នេះ​និង​តុល្យភាព​​ទីផ្សារ​។​

​ពួក​អ្នកវិនិយោគ​ក៏​ផ្តោតលើ​ផែនការ​របស់​លោក​ខាងលិច​ក្នុង​ការកំណត់ថ្លៃ​ប្រេង​របស់​រុស្ស៊ី ជា​ផ្នែក​មួយ​នៃ​ទណ្ឌកម្ម​លើ​រដ្ឋាភិបាលទីក្រុងមូស្គូចំពោះ​ការ​ធ្វើ​សង្គ្រាម​ឈ្លានពាន​នៅ​អ៊ុ​យក្រែន​។​ពួ​អ្នកការទូតនៃ​ក្រុម​ប្រទេស​G-7​និង​សហភាព​អឺរ៉ុប​បាន​និង​កំពុង​ពិភាក្សា​អំពី​ការកំណត់ថ្លៃ​ប្រេង​រុស្ស៊ី​ក្នុង​រង្វង់​៦៥​ទៅ​៧០​ដុល្លារ​ក្នុង​មួយ​បារ៉ែល តែ​ជំនួប​មួយ​លើ​បញ្ហា​នេះដែលបានគ្រោងធ្វើនៅថ្ងៃ២៥វិច្ឆិកា​ត្រូវ​បាន​លុបចោល​ដោយសារ​មាន​ការមិនចុះសម្រុង​គ្នា​៕

​ការតវ៉ា​ប្រឆាំង​និង​ការផ្ទុះកូ​វីដ​១៩​នៅ​ចិន​កំពុង​ដាក់​សម្ពាធ​លើ​ថ្លៃ​ប្រេង​នៅ​ផ្សារ​អន្តរជាតិ​