​ប្រែ​សម្រួល : កញ្ញា​ដា​លី​ស (The Drive) ៖ កូរ៉េខាងត្បូង​បានសំរេច​ការសាកល្បង​ស្ទាក់​ចាប់​មី​ស៊ី​ល​ដោយ​ជោគជ័យ ដែល​ពាក់ព័ន្ធ​នឹង​ប្រព័ន្ធ​មី​ស៊ី​លពី​ដី​ទៅ​អាកាស​ធុន​L-SAM របស់ខ្លួន ។

​ប្រព័ន្ធ L-SAM ដែល​ត្រូវបាន​អភិវឌ្ឍ​ក្នុងស្រុក​ដោយ​ទីភ្នាក់ងារ​រដ្ឋ​សម្រាប់​ការអភិវឌ្ឍ​វិស័យ​ការពារជាតិ (ADD) ត្រូវបាន​គ្រោងទុក​ជា​ប្រព័ន្ធ​ការពារ​ដែនអាកាស “​កម្រិត​ខ្ពស់​”​ជាមួយ​នឹង​សមត្ថភាព​​ប្រឆាំង​មី​ស៊ី​ល​ផ្លោង (ABM)​។ របាយការណ៍​នៃ​ការសាកល្បង​ចុងក្រោយ​នេះ​បាន​កើតឡើង​តិចជាង​បី​សប្តាហ៍​បន្ទាប់ពី​កូរ៉េ​ខាងជើង​បាន​បាញ់​មី​ស៊ី​ល ២៣ គ្រាប់​មិន​ធ្លាប់​មាន​ពីមុនមក​ដែល​ជា​ការ​​បាញ់​ច្រើន​បំផុត​មិន​ធ្លាប់មាន​ក្នុង​រយៈពេល​តែ​មួយ​ថ្ងៃ​។​

​ការស្ទាក់ចាប់​ដោយ​ជោគជ័យ​ដោយ​ប្រព័ន្ធ L-SAM ត្រូវបាន​រាយការណ៍​ដោយ​ទីភ្នាក់ងារ​សារព័ត៌មាន​យ៉ុន​ហាប់​របស់​កូរ៉េ​ខាងត្បូ​ង ដោយ​ស្រង់​សម្តី​មន្ត្រី​យោធា​ដែល​មិន​បញ្ចេញ​ឈ្មោះ​ទោះបីជា​មិន​មាន​​ព័ត៌មាន​លម្អិត​ណាមួយ​ត្រូវបាន​ផ្តល់​ឱ្យ​ថា​តើ​ការបាញ់​សាកល្បង​កើតឡើង​នៅពេលណា ឬ​បាញ់​ចេញ​ពី​ទីកន្លែង​ណា ឬ ប្រភេទ​គោលដៅ​អ្វី​ត្រូវ​បាន​បំផ្លាញ​ក៏ដោយ​។ ទោះ​យ៉ាងណា​របាយការណ៍​ដដែល​នេះ​​បញ្ជាក់ថា “​មី​ស៊ី​ល​គោលដៅ​” (​ច្រើន​គ្រាប់​) ត្រូវ​បាន​វាយប្រហារ ដោយ​បង្ហាញ​ថា ការសាកល្បង​ជាច្រើន​ត្រូវបាន​ធ្វើឡើង ឬ​ប្រហែលជា​មាន​សេណា​រី​យ៉ូព​ហុ​គោលដៅ​មួយ​ចំនួន​ពាក់ព័ន្ធ​។​

​ប្រព័ន្ធ L-SAM ឬ មី​ស៊ី​លបាញ់​ពី​ដី​ទៅ​អាកាស​រយៈ​ចម្ងាយ​ឆ្ងាយ ត្រូវបាន​ពណ៌នា​ដោយ ADD ថា​ជា “​ប្រព័ន្ធ​អាវុធ​ថ្មី​ដ៏​ទំនើប​ដែល​បច្ចុប្បន្ន​កំពុង​ស្ថិត​ក្រោម​ការអភិវឌ្ឍ​ដើម្បី​ការពារ​ប្រឆាំងនឹង​គ្រាប់​​មី​ស៊ី​ល​រយៈ​ចម្ងាយ​ឆ្ងាយ​/​រយៈកម្ពស់​ខ្ពស់ ដោយ​ផ្តល់​នូវ​ពហុ​ស្រទាប់​មី​ស៊ី​ល​ការការពារ​រួម​ជាមួយ​មី​ស៊ី​ល Cheongung II ។ អាវុធ​ចុងក្រោយ​នេះ​ត្រូវបាន​គេ​ស្គាល់​ថា M-SAM​ឬ​មី​ស៊ី​ល​ចម្ងាយ​មធ្យម​​បាញ់​ពី​ដី​ទៅ​អាកាស ដែល​ត្រូវបាន​ដាក់ពង្រាយ​រួចហើយ និង​ត្រូវបាន​កែ​ឱ្យ​ប្រសើរ​ឡើង​ដើម្បី​បំផ្លាញ​មី​ស៊ី​ល​ផ្លោង​កម្រិត​ទាប​។​

​ប្រព័ន្ធ L-SAM និង M-SAM គឺ​មាន​បំណង​បង្កើត​ជា​ផ្នែក​នៃ​ខែល​ការពារ​ដែនអាកាស​ច្រើន​ស្រទាប់​របស់​កូរ៉េខាងត្បូង ដែល​គេ​ស្គាល់​ថា Korea Air and Missile Defense (KAMD)​។ ប្រព័ន្ធ​ដែល​មាន​សមត្ថភាព ABM ផ្សេង​ទៀត​ក៏​អាច​រក​បាន​សម្រាប់​កូរ៉េខាងត្បូង​ផងដែរ ពោលគឺ​មី​ស៊ី​ល Patriot PAC-3 ដែល​ផ្គត់ផ្គង់​ដោយ​សហរដ្ឋ​អាម៉េរិក​។​

​ប្រព័ន្ធ L-SAM អាច​ទប់ទល់​នឹង​ការគំរាមកំហែង​ពី​លើ​អាកាស​ផ្សេងៗ​គ្នា ដោយសារ​ប្រភេទ​មី​ស៊ី​លពីរ​ផ្សេងគ្នា ដែល​មួយ​គឺ​សម្រាប់​វាយប្រហារ​យន្តហោះ និង​ការ​គំរាម​តាម​អាកាស​ផ្សេងទៀត និង មួយទៀត​គឺ​ដើម្បី​កម្ចាត់​មី​ស៊ី​ល​ផ្លោង​៕

ប្រព័ន្ធ L-SAM របស់​កូរ៉េ​ខាងត្បូង​សាកល្បង​ដោយ​ជោគជ័យ​