​ប្រែ​សម្រួលៈ​បំណង​(​ដេល្លី​ម៉េល​)៖ នាយករដ្ឋមន្ត្រី​ជប៉ុន​លោក ហ្វ៊ុយ​មី​អុ គី​ស៊ី​ដា បាន​ប្រាប់​គណៈរដ្ឋមន្ត្រី​របស់​លោក​អោយ​បង្កើន​ចំណាយ​យោធា​ដល់​២​ភាគរយ​នៃ​ផលិតផល​សរុប​ក្នុងស្រុក​(GDP)​នៅ​យ៉ាង​​យូរ​ត្រឹម​ឆ្នាំ​២០២៧​ទៅ ដោយ​កើន​ពី​ចំនួន​ប្រមាណ​១​ភាគរយ​ដែល​ជប៉ុន​បាន​អនុវត្ត​យូរ​ឆ្នាំ​មកហើយ​។​

​លោក​គី​ស៊ី​ដា​បានប្រកាស​ផែនការ​នេះ​ទៅ​កាន់​រដ្ឋមន្ត្រី​ការពារជាតិ​និង​ហិរញ្ញវត្ថុ​របស់​លោក​កាលពី​យប់​ថ្ងៃ​ចន្ទ ពេល​ជប៉ុន​ពិនិត្យ​មើល​ឡើងវិញ​យុទ្ធសាស្ត្រ​ការពារជាតិ​និង​សន្តិសុខ​របស់​ខ្លួន ដើម្បី​ដោះស្រាយ​​ការ​គំរាម​កាន់តែ​កើនឡើង​ពី​កូរ៉េខាងជើងនិង​ចិន ព្រមទាំង​ទិដ្ឋភាព​ភូមិ​សា​ស្រ​នយោបាយ​ផ្លាស់ប្តូ​រយ៉ា​លឿន​បន្ទាប់ពី​ការឈ្លានពាន​របស់​រុស្ស៊ី​លើ​អ៊ុ​យក្រែន​។​

​កាលពី​ខែ​សីហា ក្រសួង​ការពារជាតិ​បាន​ស្នើសុំ​ថវិកា​៤០​ពាន់​លាន​ដុល្លារ តែ​សំណើ​នេះ​មិន​ទាន់​ត្រូវបាន​អនុម័ត​ទេ​មុន​រដ្ឋាភិបាល​បញ្ចប់​ការពិភាក្សា​លើ​គោលនយោបាយ​ការពារជាតិ​។​

​រដ្ឋមន្ត្រី​ការពារជាតិ លោកយ៉ា​ស៊ូ​កាហ្ស៊ុ​យ ហា​ម៉ា​ដា​( Yasukazu Hamada )​បាន​ប្រាប់​អ្នកយក​ព័ត៌មាន​បន្ទាប់​ពី​ពិភាក្សា​ជាមួយ​លោក​គី​ស៊ី​ដា​ថា «​យើង​នឹង​ចាត់វិធានការ​ថវិកា​ដើម្បី​បង្កើន​ការ​ចំ​​ណាយ​លើ​វិស័យ​ការពារ​ជាតិ​និង​ចំណាយ​ផ្សេងៗ​អោយដល់​២​ភាគរយ​នៃ​GDP​នៅ​ត្រឹម​ឆ្នាំ​២០២៧»​។​

​សូមបញ្ជាក់​ថា ថវិកា​ការពារជាតិជប៉ុន​ត្រូវ​បាន​កំណត់ទុក​ប្រមាណ​១​ភាគរយ​នៃ​GDP​ឬ​ក្រោម​នេះ​អស់​ពេល​មួយ​ទសវត្សរ៍​មក​ហើយ តែ​គណបក្ស​ប្រជាធិបតេយ្យ​សេរី​របស់លោក​គី​ស៊ី​ដា បាន​ផ្តល់​សញ្ញា​អំពី​ផែនការ​​ដំឡើង​តួលេខ​នេះ​អោយ​កៀក​នឹង​ស្តង់ដា​ណា​តូ​គឺ​២​ភាគរយ​។​

​សម្ពាធ​កាន់តែខ្លាំង​ឡើង​ពី​ចិន រួម​មាន​សមយុទ្ធ​យោធា​និង​វត្តមាន​នាវានៅ​ជុំវិញ​កោះមាន​ជម្លោះ​ជាមួយ​ជប៉ុន ព្រមទាំង​ការឈ្លានពាន​របស់​រុស្ស៊ី​លើ​អ៊ុ​យក្រែន កំពុង​ជួយ​អោយ​មាន​ការជំរុញ​លើ​ការ​ចំ​​ណាយ​យោធា​នៅ​ជប៉ុន​។​ការបាញ់​កាំជ្រួច​បន្តបន្ទាប់​ដោយ​កូរ៉េខាងជើង រួម​មាន​កាំជ្រួច​ខ្លះ​ហោះ​រំលង​ជប៉ុន​ផង ក៏​កាន់តែ​ជួយ​សំរួច​ទស្សនៈ​នេះ ​ទោះជា​ជប៉ុន​មាន​រដ្ឋធម្មនុញ្ញ​សន្តិភាព​និយម ដែល​កំហិត​​សមត្ថភាព​យោធា​របស់​ខ្លួន​មក​នៅត្រឹម​វិធា​នការការពារ​ខ្លួន​ក្តី៕

​រដ្ឋមន្ត្រី​ការពារជាតិ លោកយ៉ា​ស៊ូ​កាហ្ស៊ុ​យ ហា​ម៉ា​ដា បាន​ពិភាក្សា​បញ្ហា​បង្កើន​ចំណាយ​យោធា​ជាមួយ​នាយក​រដ្ឋមន្ត្រី គី​ស៊ី​ដា

​ជប៉ុន​បាន​បង្កើន​សមយុទ្ធ​យោធា​រួមគ្នា​នៅ​ប៉ុន្មាន​ខែ​ចុងក្រោយ​នេះ​ក្នុង​ការឆ្លើយតប​នឹង​ការ​គំរាម​សន្តិសុខ​ក្នុង​តំបន់​កាន់តែ​កើនឡើង​