​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ បុរស​ម្នាក់ ដែល​កាន់​ទង់​ឥន្ទធនូ​និង​ពាក់​អាវយឺត​សរសេរថា “​គោរព​ចំពោះ​ស្ត្រី​អ៊ីរ៉ង់​” នៅ​ខាងក្រោយ​ខ្នង​បាន​លុកលុយ​ទីលាន​ក្នុងអំឡុង​ការប្រកួត​វើល​ខាប់​​ក្នុង​ប្រទេស​កាតា​កាលពី​ថ្ងៃ​ចន្ទ​ទី​២៨​វិច្ឆិកា​។​

​បុរស​នោះ​បាន​នៅលើ​ទីលាន​ប្រហែល ៣០ វិនាទី​ក្នុងអំឡុង​តង់​ទី​ពីរ​នៃ​ការប្រកួត​រវាង​ព័រ​ទុយ​ហ្គាល់​និង​អ៊ុយ​រូ​ហ្គាយ មុនពេល​ត្រូវ​បាន​សន្តិសុខ​ហាមឃាត់​និង​នាំ​ខ្លួន​ចេញ​ក្រៅ​។​

​រូបគេ​ក៏​មាន​ពាក្យ​សរសេរថា “​សង្គ្រោះ​អ៊ុ​យក្រែន​” នៅ​ផ្នែក​ខាង​មុខ​នៃ​អាវយឺត​របស់គេ​ផងដែរ ដោយ​សំដៅលើ​ប្រទេស​ដែល​កំពុង​ហែកហួរ​ដោយ​សង្គ្រាម​។​

​កីឡាករ​ព័រ​ទុយ​ហ្គាល់ រូបិន នេ​វេស (Ruben Neves)​បាន​និយាយថា “​យើង​បានដឹង​ពីអ្វី​ដែល​បាន​កើតឡើង​ជុំវិញ​ការប្រកួត​វើល​ខា​ប់​…​វា​ជា​រឿង​ធម្មតា​ដែល​ត្រូវ​កើតឡើង​ចឹង​”​។​

“​ពិតណាស់ យើង​ទាំងអស់​គ្នា​ក៏​នៅ​ជាមួយ​ពួកគេ​ដែរ គឺ​ជាមួយ​ប្រទេស​អ៊ីរ៉ង់ និង​ជាមួយ​ស្ត្រី​អ៊ីរ៉ង់​។ ដូច្នេះ​ខ្ញុំ​សង្ឃឹមថា​មិន​មាន​រឿង​អ្វី​កើតឡើង​ចំពោះ​ក្មេងប្រុស​នោះ​ទៅ​ចុះ ព្រោះ​យើង​យល់​ពី​សារ​របស់​គេ ហើយ​ខ្ញុំ​គិត​ថា​ពិភពលោក​ទាំងមូល​បាន​យល់​អំពី​វា​ដូចគ្នា​”​។​

​អ្នក​តវ៉ា​នោះ​ត្រូវបាន​កំណត់​អត្តសញ្ញាណ​ថា​ជា បុរស​អ៊ីតាលី​ឈ្មោះ ម៉ា​រី​អូ ហ្វើ​រី (Mario Ferri) ដោយ​ទីភ្នាក់ងារ​សារព័ត៌មាន​អ៊ីតាលី AGI​។​

​រូបគេ​ក៏​ធ្លាប់បាន​ធ្វើ​ការតវ៉ា​ស្រដៀង​គ្នា​នេះ​ពីមុន​ដែរ រួម​ទាំង​នៅ​វើល​ខា​ប់​២០១៤ នៅ​ប្រទេសប្រេ​ស៊ីល កន្លែង​ដែល​រូបគេ​បាន​លើកឡើង​ពី​បញ្ហា​កុមារ​រស់នៅក្នុង​ភាពក្រីក្រ​។​

​សិទ្ធិ​ស្រឡាញ់​ភេទ​ដូចគ្នា​និង​ការប្រើប្រាស់​ទង់​ឥន្ទធនូ​គឺជា​បញ្ហា​ដ៏​ក្ដៅគគុក​នៅវើ​ល​ខាប់​ក្នុង​ប្រទេសកាតា ជា​កន្លែង​ដែល​ការស្រឡាញ់​ភេទ​ដូចគ្នា​គឺ​ជា​អំពើ​ខុសច្បាប់​៕

​ម៉ា​រី​អូ ហ្វើ​រី កាន់​ទង់​ឥន្ទ​ធនូ រត់​អុកឡុក​លើ​ទីលាន​អំឡុង​ការប្រកួត​វើល​ខាប់​រវាង​ព័រទុយហ្គាល់​និង​អ៊ុយ​រូ​ហ្គាយ​