​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ អង្គការ​សុខភាព​ពិភពលោក (WHO)​បាន​ប្រកាស​កាលពី​ថ្ងៃ​ចន្ទ​ទី​២៨​វិច្ឆិកា​ថា ជំងឺ​អុត​ស្វា (Monkeypox) នឹង​ត្រូវ​ប្តូរ​ឈ្មោះ​ទៅ​ជា អុត​អឹម (mpox) ជា​ភាសា​អង់គ្លេស ក្នុង​គោលបំណង​ដើម្បី​បញ្ចៀស​ការ​មាក់ងាយ​ដែល​កើតចេញ​ពី​ឈ្មោះ​ដែល​មាន​ស្រាប់​នេះ​។​

​វា​បាន​ទទួល​ឈ្មោះ​នេះ​ដោយសារ​តែ​ជំងឺ​នេះ​ត្រូវបាន​កំណត់​អត្តសញ្ញាណ​ដំបូង​នៅក្នុង​សត្វ​ស្វា​ដែល​គេ​រក្សាទុក​សម្រាប់​ការស្រាវជ្រាវ​នៅ​ប្រទេស​ដា​ណឺ​ម៉ាកក្នុង​ឆ្នាំ ១៩៥៨​ប៉ុន្តែ​ជំងឺ​នេះ​ត្រូវបាន​រកឃើញ​​នៅក្នុង​សត្វ​ផ្សេងៗ​ផងដែរ ហើយ​ជា​ញឹកញាប់​បំផុត​គឺ​នៅក្នុង​ចំណោម​ពពួកសត្វ​កកេរ​។​

​ទីភ្នាក់ងារ​សុខភាពរ​បស់​អង្គការសហប្រជាជាតិ​មួយ​នេះ​បាន​និយាយ​នៅក្នុង​សេចក្តីថ្លែងការណ៍​មួយ​ថា “​បន្ទាប់ពី​មាន​ការពិគ្រោះ​យោបល់​ជា​បន្តបន្ទាប់​ជាមួយ​អ្នកជំនាញ​ពិភពលោក WHO​នឹង​ចាប់ផ្តើម​​ប្រើ​ពាក្យ​ថ្មី គឺ mpox​ដែល​ជា​ពាក្យ​មាន​ន័យ​ដូច​គ្នា​នឹង​ពាក្យ Monkeypox (​ជំងឺ​អុត​ស្វា​)​។ ឈ្មោះ​ទាំងពីរ​នឹង​ត្រូវ​ប្រើ​ក្នុងពេល​ដំណាលគ្នា​សម្រាប់​រយៈពេល​មួយ​ឆ្នាំ នៅពេល​ដែល​ឈ្មោះ “​ជំងឺ​ស្វាយ​”​ត្រូវ​លុប​​បំបាត់ចោល​។​

“WHO នឹង​ទទួល​យក​ពាក្យ mpox នៅក្នុង​ការធ្វើទំនាក់ទំនង​របស់ខ្លួន ហើយ​លើក​ទឹកចិត្ត​អ្នក​ផ្សេង​ទៀត​ឱ្យ​អនុវត្តតាម​អនុសាសន៍​ទាំងនេះ​ដើម្បី​កាត់បន្ថយ​ផលប៉ះពាល់​អវិជ្ជមាន​ជា​បន្ត​នៃ​ឈ្មោះ​​បច្ចុប្បន្ន និង ការ​សម្រប​យកឈ្មោះ​ថ្មី​នេះ​”​។​

​ជំងឺ​នេះ​ត្រូវបាន​រកឃើញ​ជា​លើកដំបូង​លើ​មនុស្ស​ក្នុង​ឆ្នាំ ១៩៧០ នៅ​សាធារណរដ្ឋ​ប្រជាធិបតេយ្យ​កុង​ហ្គោ ដោយ​ការរីក​រាលដាល​ក្នុងចំណោម​មនុស្ស​ចាប់តាំងពី​ពេលនោះ​មក​គឺ​មាន​ត្រឹមតែ​ក្នុងចំណោម​ប្រទេស​មួយចំនួន​នៅ​អាហ្វ្រិក​ខាងលិច​និង​អាហ្វ្រិក​កណ្តាល ជា​កន្លែង​ដែល​ជំងឺ​នេះ​បាន​ឈាន​ដល់​ទីបញ្ចប់​។​

​ប៉ុន្តែ​ក្នុង​ខែ​ឧសភា ករណី​នៃ​ជំងឺ​នេះ ដែល​បណ្តាល​ឱ្យ​ក្តៅខ្លួន ឈឺ​សាច់ដុំ និង​ដំបៅ​ស្បែក​ដូច​រលាក​ទឹ​កក្តៅ បាន​ចាប់ផ្តើម​រីក​រាលដាល​យ៉ាង​ឆាប់រហ័ស​នៅ​ជុំវិញ​ពិភពលោក ដែល​ភាគច្រើន​គឺ​ក្នុងចំណោម​បុរស​ដែល​រួមភេទ​ជាមួយ​បុរស​។​

​ករណី​ចំនួន ៨១.១០៧ និង ករណី​ស្លាប់ ៥៥ នាក់ ត្រូវបាន​រាយការណ៍​ជូន WHO ក្នុង​ឆ្នាំ​២០២២ ពី​១១០​ប្រទេស​៕