​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ យោធា​អ៊ុយ​ក្រែន​បាន​និយាយថា កងកម្លាំង​រុស្ស៊ី​បាន​ព្យាយាម​រុលទៅមុខ​នៅ​ភាគ​ខាងកើត​អ៊ុ​យក្រែន ហើយ​បាន​បញ្ជូន​រថក្រោះ កាំភ្លើងត្បាល់​និង​កាំភ្លើង​​ធំ​វាយលុក​លើ​ទីក្រុង​ឃើ​សុន​នៅ​ភាគខាងត្បូង ខណៈ​សម្ពន្ធមិត្ត​លោកខាងលិច​ព្យាយាម​ពង្រឹង​ការគាំទ្រ​ដល់​អ៊ុយ​ក្រែ​ន​និង​ប្រទេសជិតខាង​ប្រឆាំងនឹង​រដ្ឋាភិបាល​ក្រុង​មូ​ស្គូ​។​

​មន្ទីរ​បញ្ច​កោណ​បាន​និយាយថា នៅ​ទីក្រុង​វ៉ាស៊ីនតោន កិច្ចសន្យា​តម្លៃ ១,២ ពាន់​លាន​ដុល្លារ​សម្រាប់​ប្រព័ន្ធ​មី​ស៊ី​ល​លើ​ផ្ទៃ​ដី​ទៅ​អាកាស​កម្រិត​ខ្ពស់​ជាតិ (NASAMS)​ចំនួន​ប្រាំ​មួយ​សម្រាប់​អ៊ុ​យក្រែន​​ត្រូវបាន​ផ្តល់​ជូន​ឱ្យ​ទៅ​ក្រុមហ៊ុន រ៉ា​យ​ធី​អន​(Raytheon)​ផលិត​សំរាប់​អ៊ុ​យក្រែន ។​

​កាលពី​ថ្ងៃ​ពុធ​ទី​៣០​វិច្ឆិកា រដ្ឋមន្ត្រីការបរទេស​អ៊ុ​យក្រែន លោក ឌី​មីត្រូ គូ​ឡេ​បា (Dmytro Kuleba)​បាន​និយាយថា ប្រទេស​របស់​លោក​ត្រូវការ​ប្រព័ន្ធ​ការពារ​កាំជ្រួច​ភែត​ធ្រៀ​ត​( Patriot) ដែល​ផលិត​ដោយ​សហរដ្ឋ​អាម៉េរិក​ដើម្បី​ការពារ​ហេដ្ឋារចនាសម្ពន្ធ​ស៊ីវិ​ល​របស់ខ្លួន ដែល​បាន​រង​ការវាយប្រហារ​យ៉ាងខ្លាំង​ដោយ​រុស្ស៊ី​នៅ​ដើម​រដូវរងា​នេះ​។​

​រដ្ឋមន្ត្រីការបរទេស​អាម៉េរិក លោក អាន​ថូ​នី ប្លីង​កិន បាន​និយាយថា ប្រធានាធិបតី​រុស្ស៊ី លោក វ្ល៉ា​ឌី​មៀ ពូ​ទីន បាន​ផ្តោត “​ការ​ខឹងសម្បា​និង​ភ្លើងកំហឹង​របស់គាត់​” ទៅលើ​ប្រជាជន​ស៊ីវិល​អ៊ុ​យក្រែន ហើយ​បាន​ព្រមាន​រុស្ស៊ី​ថា យុទ្ធសាស្ត្រ​របស់​ខ្លួន​នឹង​បរាជ័យ​ក្នុង​ការ​បំបែក​អ្នកគាំទ្រ​អ៊ុ​យក្រែន​។​

​លោក​ប្លីង​កិន​បាន​ប្រាប់​សន្និសីទ​សារព័ត៌មាន​នៅ​ទីក្រុង​ប៊ុយ​ការ៉េស (Bucharest) បន្ទាប់ពី​កិច្ចប្រជុំ​ពីរ​ថ្ងៃ​របស់​អង្គការ​ណា​តូ​ថា “​កម្តៅ ទឹក​អគ្គិសនី​…​ទាំងនេះ​គឺជា​គោលដៅ​ថ្មី​របស់​ប្រធានាធិបតី​​ពូ​ទីន​។ គាត់​កំពុង​វាយ​ពួក​វា​យ៉ាង​ខ្លាំងក្លា​។ អំពើ​ឃោរឃៅ​លើ​ប្រជាជន​អ៊ុយ​ក្រែន​គឺ​ព្រៃផ្សៃ​ណាស់​”​។​

​អគ្គលេខាធិការ​អង្គការ​ណា​តូ លោក ជែន ស្តូល​ធិន​បឺក (Jens Stoltenberg) និង​ពួក​រដ្ឋមន្ត្រី​បាន​និយាយថា នៅក្នុង​កិច្ចប្រជុំ​រដ្ឋមន្ត្រីការបរទេស​របស់​អង្គការ​ណា​តូ កាលពី​ថ្ងៃ​ពុធ​សម្ពន្ធ​មិត្ត​​បាន​សន្យា​ជួយ​ម៉ុល​ដាវី ហ្ស​ក​ហ្ស៊ី និង​បូ​ស្ន៊ី​-​ហឺ​ហ្សេ​ហ្គោ​វីណា ខណៈ​ពួកគេ​ប្រឈម​មុខ​នឹង​សម្ពាធ​ពី​រុស្ស៊ី​។​

​អ្នកនាំពាក្យ​ក្រសួងការបរទេស​រុស្ស៊ី លោកស្រី ម៉ា​រី​យ៉ា ហ្សា​ខា​រ៉ូ​វ៉ា (Maria Zakharova) បាន​និយាយថា លទ្ធផល​នេះ​បង្ហាញថា ណា​តូ​”​មិន​ចាប់​អារម្មណ៍​ជា​ដាច់ខាត​ចំពោះ​ដំណោះស្រាយ​នយោបាយ​​និង​ការទូត​នៅ​អ៊ុ​យក្រែន​”៕

រុស្ស៊ី​កំពុងបើក​ការវាយលុក​ខ្លាំងក្លា​នៅ​តំបន់​ភាគ​ខាងកើត​អ៊ុយ​ក្រែន​ជាពិសេស​លើ​ទី​ក្រុងឃើ​សុន និង​បាន​អះអាង​អំពី​ការ​វាយ​ដណ្តើម​បាន​ភូមិ​ពីរ​មក​វិញ

ទាហានអ៊ុយក្រែននៅភាគខាងកើតប្រទេស​