​ប្រែ​សម្រួល : កញ្ញា​ដា​លី​ស (​បាល់ទាត់​) ៖ ហ្គា​ណា​ថ្ងៃនេះ​នឹង​មាន​ឱកាស​សងសឹក​អ៊ុយ​រូ​ហ្គាយ ដែល​ទម្លាក់​ពួកគេ​នៅ​វគ្គ ១/៤ ក្នុងវើ​លខាប់​២០១០​ប៉ុន្តែ​រឿង​នោះ​អាច​នឹង​លំបាក​បន្តិច​ហើយ​សម្រាប់​ក្រុម​ផ្កាយ​​ខ្មៅ​អាហ្វ្រិក​មួយ​នេះ​។ ដោយឡែក​កូរ៉េខាងត្បូង កា​មេ​រូ​ន និង ស្វីស ហាក់​ពុំ​មាន​សង្ឃឹម​យក​ឈ្នះ​នៅ​ការប្រកួត​ចុងក្រោយ​ក្នុង​ពូ​ល​របស់​ពួកគេ​នោះទេ នៅពេល​លេង​ប៉ះ​ព័រ​ទុយ​ហ្គាល់ ប្រេ​ស៊ីល និង​សែ​ប៊ី​។​

– ហ្គា​ណា vs អ៊ុយ​រូ​ហ្គាយ (​ពូ​ល H)

* គ្រាប់​បាល់​ចំនួន ១០ គ្រាប់​ត្រូវបាន​ស៊ុត​បញ្ចូល​ទី​ក្នុង​ការប្រកួត​បើកឆាក​ពូ​ល H ចំនួន​២​របស់​ហ្គា​ណា​។​
* អ៊ុយ​រូ​ហ្គាយ​ត្រូវតែ​យក​ឈ្នះ​ហ្គា​ណា ដើម្បី​មាន​ឱកាស​ឡើង​ដល់​វគ្គ​១៦​ក្រុម​ចុងក្រោយ​។​
* Luis Suarez ស៊ុត​បញ្ចូល​ទី​បាន ៨ គ្រាប់​ក្នុង​យុទ្ធនាការ​ជម្រុះ​វើល​ខាប់​របស់​អ៊ុយ​រូ​ហ្គាយ​។​

​ហ្គា​ណា​និង​អ៊ុយ​រូ​ហ្គាយ​បាន​ជួប​គ្នា​ចុងក្រោយ​នៅ​វគ្គ ១/៤ នៃ​វើល​ខាប់​២០១០ ដែល​ហ្គា​ណា​ស៊ុត​ប៉េណាល់​ទី​មិន​ចូល​នៅ​នាទីចុងក្រោយ​នៃ​ម៉ោង​បន្ថែម បន្ទាប់​ពី Luis Suarez បាន​យកដៃ​ទះ​បាល់​ចេញ​ពី​ទី​ដោយ​ចេតនា​។ អ៊ុយ​រូ​ហ្គាយ​បាន​បន្ត​ឈ្នះ​ដោយ​ការ​ស៊ុត​បាល់​ប៉េណាល់​ទី និង​ឡើងទៅ​វគ្គ​ពាក់កណ្តាល​ផ្តាច់ព្រ័ត្រ​ដោយ​ការធ្វេសប្រហែស​របស់​ហ្គា​ណា​។ នៅ ១២ ឆ្នាំ​ក្រោយមក ហ្គា​ណា​មាន​ឱកាស​សងសឹក​លើ​បរាជ័យ​នេះហើយ​។​

​អ៊ុយ​រូ​ហ្គាយ​លេង​ប្រយ័ត្ន​ពេក​មិន​ទាន់​រក​គ្រាប់​បាល់​បាន​នៅឡើយ​ទេ​ក្នុងវើ​លខាប់​កាតា ហើយ​កំពុង​ឈរ​នៅ​បាត​តារាង​ពូ​ល H ដោយ​ទទួលបាន​១​ពិន្ទុ​ពី​ការប្រកួត​ពីរ​លើក​ដំបូង​របស់​ពួកគេ​។ កូនក្រុម​របស់លោក Diego Alonso ត្រូវតែ​បោះបង់ចោល​វិធីសាស្ត្រ​ប្រុងប្រយ័ត្ន​ជ្រុល​ដែល​ពួកគេ​បាន​អនុវត្ត​នៅក្នុង​ការប្រកួត​ពីរ​លើក​ដំបូង​របស់​ពួកគេ ខណៈ​ឥឡូវ​ពួកគេ​ត្រូវតែ​យកឈ្នះ​ឱ្យខាងតែបាន​។ គម្លាត​គ្រាប់​បាល់​អាច​ជា​កត្តា​កំណត់​ជោគវាសនា​នៅក្នុង​ពូ​ល H ប្រសិនបើ​កូរ៉េខាងត្បូង​យកឈ្នះ​ព័រ​ទុយ​ហ្គាល់ ដូច្នេះ​យើង​អាច​រំពឹង​អ៊ុយ​រូ​ហ្គាយ​លេងវាយ​សម្រុ​កមិន​ដក​ដៃ​នោះ​ឡើយ​។​

​មួយ​ពិន្ទុ​គឺ​គ្រប់គ្រាន់​សម្រាប់​ហ្គា​ណាក្នុង​ការ​ឆ្លង​ផុត​វគ្គ​ជម្រុះ​ក្នុង​ពូ​ល H ប៉ុន្តែ​នៅ​ទីបំផុត​ពួកគេ​ទទួលបាន​ឱកាស​ដើម្បី​សងសឹក​វើល​ខា​ប់​២០១០ ហើយ​ក្រុម​ផ្កាយ​ខ្មៅ​ហ្គា​ណា​ត្រូវ​គេ​រំពឹងថា​នឹង​វាយ​សម្រុក​មិន​ដក​ដៃ​ទេ​។ គ្រាប់​បាល់​ចំនួន ១០ គ្រាប់​ត្រូវបាន​ស៊ុត​បញ្ចូល​ទី​ក្នុង​ការប្រកួត​បើកឆាក​ពូ​ល H ចំនួន​ពីរ​លើ​ក​របស់​ហ្គា​ណា ហើយ​ក្រុម​ផ្កាយ​ខ្មៅ​ត្រូវ​គេ​រំពឹងថា​នឹង​ប្រើ​វិធីសាស្ត្រ​ស្រដៀង​គ្នា​លើ​ក្រុម​អ៊ុយ​រូ​ហ្គាយ​នៅ​ថ្ងៃ​សុក្រ​នេះ​។​

Luis Suarez ត្រូវបាន​ដាក់​ឱ្យ​សម្រាក​សម្រាប់​ការប្រកួត​ចុងក្រោយ​របស់​អ៊ុយ​រូ​ហ្គាយ​ទល់​នឹង​ព័រទុយហ្គាល់ ជា​ការប្រកួត​ដែល​អ៊ុយ​រូ​ហ្គាយ​ចាញ់ ២-០​។ Suarez ត្រូវ​គេ​រំពឹងថា​នឹង​ត្រឡប់​ចូល​ជម្រើស​ដំបូង​ទល់​នឹង​ហ្គា​ណា ជា​ការប្រកួត​ដែលមាន​អនុស្សាវរីយ៍​ខ្លាំង​សម្រាប់​អតីត​ខ្សែ​ប្រយុទ្ធ Liverpool រូបនេះ​។ Suarez គឺជា​អ្នក​ស៊ុត​បញ្ចូល​ទី​ច្រើនជាងគេ​របស់​អ៊ុយ​រូ​ហ្គាយ​ក្នុង​យុទ្ធនាការ​ជម្រុះ​វើ​ល​ខាប់​របស់​ពួកគេ ដោយ​ស៊ុត​បញ្ចូល​ទី​បាន ៨ គ្រាប់ ដោយ​មាន​តែ​កីឡាករ​បូ​លី​វី​ប៉ុណ្ណោះ គឺ Marcelo Morena (១០ គ្រាប់​) ស៊ុត​បញ្ចូល​ទី​បាន​ច្រើន​ជាង Suarez ក្នុង​ក្រុមជម្រុះ​វើល​ខាប់​នៅ​អាម៉េរិក​ខាងត្បូង​។ Suarez គឺ​មាន​ហាងឆេង ៧/៤ ក្នុង​ការ​រក​គ្រាប់​បាល់​បាន​នៅ​ថ្ងៃ​សុក្រ​នេះ ហើយ​ឱកាស​គួរតែ​អាច​កើត​ឡើង​សម្រាប់​កីឡាក​រវ័យ ៣៥ ឆ្នាំ​ដែល​មាន​បទពិសោធន៍​ច្រើន​នៅលើ​ឆាក​ប្រកួត​ធំៗ​។​

​ការ​ស៊ុត​ចូល​ទី​គ្នា​លើស ២,៥ គ្រាប់​ជា​ជម្រើស​ល្អ​បំផុត​សម្រាប់​ក្រុម​ទាំង​ពីរ ប៉ុន្តែ​ភាគរយ​ឈ្នះ​គឺ​លម្អៀង​ទៅខាង​អ៊ុយ​រូ​ហ្គាយ​បន្តិច​។

​លទ្ធផល​ព្យាករណ៍ អ៊ុយ​រូ​ហ្គាយ​ឈ្នះ ២-១​។​

– កូរ៉េខាងត្បូង vs ព័រ​ទុយ​ហ្គាល់ (​ពូ​ល H)

* កូរ៉េខាងត្បូង​បាន​ស៊ុត​បាល់​បញ្ចូល​ទី​ក្នុង​ការប្រកួត​ចំនួន ១០ ក្នុងចំណោម ១២ ប្រកួត​ចុងក្រោយ​របស់​ពួកគេ​។​
* ព័រ​ទុយ​ហ្គាល់​របូត​២​គ្រាប់​ជាមួយហ្គា​ណាក្នុង​ការប្រ​កួតបើកឆាក​វើល​ខាប់​។​
* Bruno Fernandes មាន​ការចូលរួម​ចំនួន​៨​គ្រាប់​ក្នុង​ការបង្ហាញ​ខ្លួន​ឱ្យ​ព័រ​ទុយ​ហ្គាល់​៥​លើកចុងក្រោយ​។​

​កូរ៉េខាងត្បូង​ត្រូវការ​ឈ្នះ​ទាំងអស់​សង្ឃឹម​ដើម្បី​មាន​ឱកាស​ឆ្លង​ផុតពី​ពូ​ល H ប៉ុន្តែ​ការ​ផ្តួល​ក្រុម​ព័រ​ទុយ​ហ្គាល់​អាច​ជា​កិច្ចការ​ធំ​ជាង​ភ្នំ​ទៅទៀត​។​

​កូនក្រុម​របស់លោក Paulo Bento បាន​បណ្តោយ​ឱ្យ​ហ្គា​ណា​ស៊ុត​ចូល​៣​គ្រាប់ ហើយ​ស្មើ​អ៊ុយ​រូ​ហ្គាយ​ក្នុង​ជុំទីមួយ​ទាំងសំណាង​។ ទោះបីជា​ពួកគេ​ប្រឈម​មុខ​នឹង​ក្រុម​បម្រុង​ព័រ​ទុយ​ហ្គាល់​ក៏ដោយ ក៏​ឱកាស​ដែល​ពួកគេ​ឈ្នះ​ក៏​មិនសូវ​មាន​នោះ​ដែរ​។​

​ព័រ​ទុយ​ហ្គាល់​កំពុងសម្លឹង​យកចំណា​ត់​ថ្នាក់​កំពូល​ក្នុង​ពូ​ល H ហើយ​គ្រាន់តែ​ត្រូវការ​មួយ​ពិន្ទុ​ដើម្បី​ធានា​វា​ប៉ុណ្ណោះ ប៉ុន្តែ​កីឡាករ​ដូចជា Cristiano Ronaldo និង Bruno Fernandes សុទ្ធ​តែ​ចង់​ចូល​លេង ត្បិត​មិនបាន​ចូលរួម​ហ្វឹកហាត់​ម្សិលមិញ​ក៏ដោយ ដូច្នេះ​វា​មិន​ទំនង​ទេ​ដែល​យើង​នឹង​ឃើញ​គ្រូបង្វឹក Fernando Santos ដាក់​កីឡាករ​បម្រុង​ឱ្យ​ចូល​លេង​ច្រើន​នៅថ្ងៃនេះ​។​

​ព័រ​ទុយ​ហ្គាល់​បាន​ទទួល​ជ័យជម្នះ ២-០ លើ​អ៊ុយ​រូ​ហ្គាយ​ដោយសារ​ពីរ​គ្រាប់​ពី​សំណាក់​កីឡាករ Fernandes brace និង​បាន​លេង​ឈ្នះ​យ៉ាង​រំភើប ៣-២ លើ​ហ្គា​ណាក្នុង​ការប្រ​កួតបើកឆាក​របស់​ពួកគេ ហើយ​ដូច្នេះ​យើង​សង្ឃឹម​ពួកគេ​នឹង​យកឈ្នះ​លើ​កូរ៉េខាងត្បូង តែ​មិន​ឈ្នះ​ទល់​សូន្យ​នោះទេ​។​

​លទ្ធផល​ព្យាករណ៍ ព័រ​ទុយ​ហ្គាល់​ឈ្នះ ២-១​។​

– កា​មេ​រូ​ន vs ប្រេ​ស៊ីល (​ពូ​ល G)

* ប្រេ​ស៊ីល​មិនស្គាល់​ចាញ់សោះ​ក្នុង​ការប្រកួត​១៧​លើក ហើយ​ក្នុងនោះ​បាន​ឈ្នះ​ទល់​សូន្យ​១០​លើក​។​
* ប្រេ​ស៊ីល​មិនទាន់​មាន​ក្រុម​ណា​ស៊ុត​ចំ​គោលដៅ​ទេ​នៅ​វើល​ខា​ប់​២០២២​នេះ​។​
* Richarlison បាន​ស៊ុត​បញ្ចូល​ទី ៩ គ្រាប់​ក្នុង​ការ​បង្ហាញខ្លួន ៨ លើក​ចុងក្រោយ​របស់​គេ​សម្រាប់ប្រេ​ស៊ីល​។​

​កា​មេ​រូ​ន​ដាច់ខាត​ត្រូវ​ឈ្នះ​ឱ្យបាន​៣​គ្រាប់​ឡើងទៅ​ទើប​មាន​ឱកាស​ឆ្លង​ទៅ​វគ្គ​បន្ទាប់ ប៉ុន្តែ​ការបំបា​ក់ប្រេ​ស៊ីល​ក្នុង​ចំនួន​គ្រាប់​បាល់​បែប​នោះ​មិន​អាច​ទៅរួច​សូម្បី​ក្នុងការ​យល់សប្តិ​។​

​ក្រុម​តោ​កំណាច​អាហ្វ្រិក​បាន​នាំមុខ​មុន​លើ​សែ​ប៊ី មុនពេល​គេ​វាយ​បក​២​គ្រាប់​វិញ​ក្នុង​ម៉ោង​របួស​ក្នុង​តង់​ទី​១ និង​គ្រាប់​ទី​បី​ភ្លាមៗ​បន្ទាប់​ពី​សម្រាក ប៉ុន្តែ​ពីរ​គ្រាប់​ក្នុង​រយៈពេល​បី​នាទី​បាន​ធ្វើឱ្យ​ពួកគេ​តាម​ស្មើ​និង​ទទួលបាន​១​ពិន្ទុ​ដ៏​ស័ក្តិសម​។​

​យ៉ាងណាក៏ដោយ ក្រោយ​ចាញ់​ស្វីសក្នុង​ជុំ​បើកឆាក ពួកគេ​ត្រូវតែ​យកឈ្នះ​ក្រុម​កំពូល​តារាង​ពូ​ល G ប្រេ​ស៊ីល ដើម្បី​មាន​សង្ឃឹម​ក្នុងការ​ឆ្លង​ផុតពី​វគ្គ​ចែក​ពូ​ល​។​

​ការទទួល​ជ័យជម្នះ​របស់​ប្រេ​ស៊ីល​លើស្វីស​ក្នុង​ជុំ​ទី​ពីរ​គឺ​កើតចេញ​ពី​ការ​ស៊ុត​បញ្ចូល​ទី​ចុង​ម៉ោង​របស់​កីឡាករ Casemiro ហើយ​ពួកគេ​អាច​មាន​ទំនុកចិត្ត​ក្នុងការ​ឡើង​មក​ឈរ​លើ​កំពូល​តារាង ដោយ​ការ​យក​ឈ្នះ​នៅ​កីឡដ្ឋាន Lusail នៅ​ថ្ងៃ​សុក្រ​នេះ​។​

​ខណៈ​លោក Tite មាន​ប្រយុទ្ធ​អស្ចារ្យ​ជាច្រើន​នាក់ ប្រេ​ស៊ីល​ក៏​មាន​ប្រព័ន្ធ​ការ​ពារ​រឹងមាំ​ដូច​ដែកថែប​ផងដែរ ដូច្នេះ​លទ្ធភាព​ដែល​ពួកគេ​អាច​យកឈ្នះ​ទល់នឹង​សូន្យ​នឹង​អាច​កើតឡើង​ម្តងទៀត​។​

​ដោយហេតុ​ថា​ប្រេ​ស៊ីល​បាន​រក្សា Clean Sheet ចំនួន ១២ ក្នុង ១៧ ប្រកួត​ចុងក្រោយ ដូច្នេះ​ពួកគេ​ពិតជា​អាច​ឈ្នះ​លើ​កា​មេ​រូ​ន​នៅថ្ងៃនេះ​។​

​លទ្ធផល​ទស្សនទាយ ប្រេ​ស៊ីល​ឈ្នះ ២-០​។​

– សែ​ប៊ី vs ស្វីស (​ពូ​ល G)

* សែ​ប៊ី​ចាញ់តែ​២​ដង​ក្នុង​ចំណោម ២០ ប្រកួត​ចុងក្រោយ​របស់​ពួកគេ​។​
* ស្វីសស៊ុត​មិន​ចំ​គោលដៅ​ក្នុង​ការប្រកួត​ចុងក្រោយ​ក្នុង​ពូ​ល G របស់​ពួកគេ​ជាមួយ​ប្រេ​ស៊ីល​។​
* Aleksandar Mitrovic បាន​ស៊ុត​បញ្ចូល​ទី ៧ គ្រាប់​ក្នុង​ការប្រកួត​ចំនួន ៧ លើក​ចុងក្រោយ​របស់​សែ​ប៊ី​។​

​សែ​ប៊ី​ត្រូវបាន​មនុស្ស​ជាច្រើន​យល់ឃើញថា​ជា​ក្រុម​សេះ​ខ្មៅ​ដ៏​មាន​សក្តានុពល​នៅវើ​លខាប់​២០២២ ប៉ុន្តែ​កំពុង​ឈរ​នៅ​បាត​តារាង​នៃ​ពូ​ល G ដោយ​ទទួលបាន​មួយ​ពិន្ទុ​ពី​ការប្រកួត​ពីរ​លើក​ដំបូង​របស់​ពួកគេ​។ កូនក្រុម​របស់លោក Dragan Stojkovic ឥឡូវ​នេះ​ស្ថិតក្នុង​ស្ថានភាព​ត្រូវ​តែ​ឈ្នះ​ដាច់ខាត ហើយ​នោះ​អាច​ទាញយក​អ្វី​ដែល​ល្អ​បំផុត​ចេញពី​ក្រុម​ដែល​មាន​ទេពកោសល្យ​ដ៏​ធំ​របស់​គាត់​។ ក្រុម​សែ​ប៊ីគឺ​សម្បូរ​ដោយ​កីឡា​ករដែ​ល​លេង​ក្នុង​លី​ក​កំពូល​អឺរ៉ុប ហើយ​ពួកគេ​នឹង​លេង​ជា​មួយសន្ទុះ​ចិត្ត​ខ្ពស់ បន្ទាប់ពី​បាន​របូត​ការ​នាំមុខ​២​គ្រាប់​ជាមួយនឹង​កា​មេ​រូ​ន​។ សែ​ប៊ី​បាន​ចាញ់តែ​២​ដង​ពី​ការប្រកួត​ចំនួន ២០ លើក​ចុងក្រោយ​របស់​ពួកគេ ហើយ​មាន​ចិត្ត​ចង់​កត់ត្រា​ជ័យជម្នះ​ថ្ងៃនេះ​ដើម្បី​ទទួលបាន​កៅអី​មួយ​ក្នុង​វគ្គ ១៦ ក្រុម​ចុងក្រោយ​។​

​បច្ចុប្បន្ន ស្វ៊ី​ស​ឈរ​នៅ​លេខ​២​ក្នុង​ពូ​ល G ហើយ​ជោគវាសនា​គឺ​ស្ថិតក្នុង​ដៃ​របស់​ពួកគេ​។ ត្បិត​ឈរ​នៅ​លេខ​ល្អ​ក្នុង​ពូ​ល G ក៏ពិតមែន ក៏ប៉ុន្តែ​ស្វីស​លេង​មិន​បាន​ល្អ​ទេ​ក្នុង​ប្រទេស​កាតា​។ កូនក្រុម​របស់លោក Murat Yakin លេង​យ៉ាង​អន់​ក្នុង​ការប្រកួត​បើកឆាក​ក្នុង​ពូ​ល​របស់​ពួកគេ​ជាមួយនឹង​កា​មេ​រូ​ន ហើយ​ឈ្នះ​ទាំង​សំណាង ១-០ បន្ទាប់​ពី​កា​មេ​រូ​ន​យក​ឱកាស​រាប់​មិន​អស់​ទៅ​ចាក់ចោល​នៅក្នុង​តង់​ទីមួយ​។ ស្វីស​មិន​បាន​ស៊ុតចំ​គោលដៅ​ទល់​នឹង​ប្រេ​ស៊ីល​ទេ ហើយ​ឥឡូវ​ត្រូវ​ជួប​ជាមួយ​គីឡូ​ធ្ងន់ សែ​ប៊ី ដែល​ដឹង​ច្បាស់​ថា​ជ័យជម្នះ​នឹង​នាំ​ពួកគេ​ទៅ​វគ្គ ១៦ ក្រុម​ចុងក្រោយ​។​

​កីឡាករ Aleksandar Mitrovic បាន​ស៊ុត​បញ្ចូល​ទី​គ្រាប់​ដំបូង​របស់​គេ​ក្នុង​ការប្រកួត​ស្មើ ៣-៣ របស់​សែ​ប៊ី​ទល់​នឹង​កា​មេ​រូ​ន ហើយ​ខ្សែប្រយុទ្ធ Fulham រូប​នេះ​អាច​ជា​បុរស​ដែល​ជួយ​ឱ្យ​ជម្រើសជាតិ​របស់គាត់​ឡើង​ទៅ​កាន់​វគ្គ ១៦ ក្រុម​ចុងក្រោយ​។ Mitrovic ស៊ុត​បញ្ចូល​ទី​បាន ៧ គ្រាប់​ក្នុង​ការប្រកួត​ចំនួន ៧ លើក​ចុងក្រោយ​របស់​សែ​ប៊ី និង ជា​អ្នក​ស៊ុត​បញ្ចូល​ទី​ច្រើនជាងគេ​ក្នុង​ពូ​ល​នៅ​វគ្គ​ជម្រុះ​វើល​ខាប់​របស់សែ​ប៊ី ដោយ​ស៊ុត​បញ្ចូល​ទី​បាន​៨​គ្រាប់​ក្នុង​ការប្រកួត​ក្នុង​ពូ​ល​ទាំង​៨​លើ​ក​របស់​ពួកគេ​។ កីឡាក​រវ័យ ២៨ ឆ្នាំ​រូប​នេះ​មាន​គ្រាប់​បាល់វើ​លខាប់​២​គ្រាប់​សម្រាប់​ឈ្មោះ​របស់​គេ ហើយ​បច្ចុប្បន្ន​មាន​ហាងឆេង ៧/៤ ក្នុងការ​ស៊ុត​ចូល​ស្វីស​នៅ​ថ្ងៃ​សុក្រ​នេះ​។​

​លទ្ធផល​ព្យាករណ៍ សែ​ប៊ី​ឈ្នះ ២-១៕

កូរ៉េខាងត្បូង​មិន​រំពឹង​ឈ្នះ​ព័រ​ទុយ​ហ្គាល់