​ដោយៈ​យោធិន​/​កណ្តាលៈសិក្ខាកាម​កង​យោធា​មួក​ខៀវ​កម្ពុជា​ចំនួន​៣៨​រូប នា​ព្រឹក​ថ្ងៃទី​២ ខែធ្នូ ឆ្នាំ​២០២២​បានបង្ហាញ​ពី​សមត្ថភាព​ជំនាញ​បច្ចេកទេស​ប្រើប្រាស់​ស្ពាន​បណ្តែត​ទឹក​លើ​ផ្ទៃ​ទឹក​ដង​ទន្លេសាប​ដែលមាន​ចរន្តទឹក​ហូរ បន្ទាប់ពី​សិក្ខាកាម​ខាងលើនេះ​បានទទួល​ការហ្វឹកហាត់​អស់​រយៈកាល​ជាង​បី​សប្តាហ៍​កន្លង​ទៅដោយ​ក្រុម​គ្រូ​ជំនាញ​បច្ចេកទេស​ស្ពាន​បណ្តែត​ទឹក​នៃ​សាធារណរដ្ឋ​ប្រជាមានិត​ចិន​នៅ​សាលា​ហ្វឹកហ្វឺន​កងកម្លាំង​រក្សា​សន្តិភាព​ពហុ​ជាតិ​ស្ថិត​ក្នុងស្រុក​ភ្នំស្រួច​ខេត្តកំពង់ស្ពឺ​។​


លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ​បាន​អញ្ជើញ​ចុះ​ត្រួតពិនិត្យ​ការហ្វឹកហ្វឺន​និង​សំណេះសំណាល​ជាមួយ​កងកម្លាំង​ស្ពាន​បណ្តែត​ទឹក​ត្រៀម​ចេញ​បំពេញបេសកកម្ម​អង្គការសហប្រជាជាតិ​នៅ​តំបន់​បេសកកម្ម​សាធារណរដ្ឋ​អាហ្វ្រិក​កណ្តាល​នាពេលខាងមុខ​។​
ថ្លែង​ទៅកាន់​កងកម្លាំង​មួក​ខៀវ​ស្ពាន​បណ្តែត​ទឹក​លោក​ឧបនាយករដ្ឋមន្ត្រី ប្រាក់ សុខុន បាន​កោតសរសើរ​និង​វាយតម្លៃ​ខ្ពស់​ទៅលើ​សមត្ថភាព​កងកម្លាំង​ស្ពាន​បណ្តែត​ទឹក​ដែល​ខិតខំ​ប្រឹងប្រែង​យក​អស់​ស្មារតី​និង​ឆន្ទៈ​មោះមុត​សម្រេច​ទទួលបាន​ជំនាញ​ស្ពាន​បណ្តែត​ខាងលើនេះ​ដែលជា​ជំនាញ​ថ្មី​មួយទៀត​ឆ្លើយតប​តាម​តម្រូវការ​របស់​អគ្គលេខា​ធិ​ការ​អង្គការសហប្រជាជាតិ​សម្រាប់​បម្រើ​ឲ្យ​ដល់​បេសកកម្ម​រក្សា​សន្តិភាព​ក្រោម​ឆត្រ​អង្គការសហប្រជាជាតិ​។​


បេសកកម្ម​រក្សា​សន្តិភាព​ក្រោម​ឆត្រ​អង្គការសហប្រជាជាតិ ដែល​កង​យោធា​មួក​ខៀវ​កម្ពុជា​សម្រេចបាន​រយៈ​កាល​ជាង​១៦​ឆ្នាំ​កន្លងទៅនេះ​ទទួលបាន​ការកោតសរសើ​រ​និង​វាយតម្លៃ​ខ្ពស់​ពីស​ម្តេច​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា​ខណៈ​ដែល​សាធារណមតិ​ជាតិ​និង​អន្តរជាតិ​ទទួលស្គាល់​ជា​សកល​នូវ​កិត្យានុភាព​កម្ពុជា​លើ​វិស័យ​រក្សា​សន្តិភាព​ដើម្បី​មនុស្សជាតិ​លើ​សកលលោក​។​
លោក​ឧបនាយករដ្ឋមន្ត្រី ប្រាក់ សុខុន រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ​និង​ជា​ប្រធាន​គណកម្មាធិការ​ជាតិ​សម្របសម្រួល​កិច្ច​ការបញ្ជូន​កងកម្លាំង​ចូលរួម​បេសកកម្ម​រក្សា​សន្តិភាព​ក្នុងឱកាស​អញ្ជើញ​ចុះ​ត្រួតពិនិត្យ​ការងារ​ហ្វឹកហ្វឺន​និង​សំណេះសំណាល​ជាមួយ​កងកម្លាំង​ស្ពាន​បណ្តែត​ទឹក​ត្រៀម​ចេញ​បំពេញបេសកកម្ម​អង្គការសហប្រជាជាតិ​នៅ​តំបន់​បេសកកម្ម​សាធារណរដ្ឋ​អាហ្វ្រិក​កណ្តាល​ក៏បាន​ថ្លែង​ការ​កោត​សរ​សរសើរ​នូវ​រាល់​កិច្ចខិតខំ​ប្រឹងប្រែង​រប​ស់នាយ​ឧ​ត្ត​ម​សេនីយ៍ សែម សុវណ្ណនី អនុប្រធាន​គណកម្មាធិកា​រ​ជាតិ និង​ជា​អគ្គនាយក​មជ្ឈមណ្ឌល​ជាតិ​រក្សា​សន្តិភាព​ដែល​បាន​បង្កើតឡើង​នូវ​ជំនាញ​ថ្មី​បច្ចេកវិទ្យា​ប្រើប្រាស់​ស្ពាន​បណ្តែត​ទឹក​ក្រោម​កិច្ចសហប្រតិបត្តិការ​ជាមួយ​ក្រុមហ៊ុន​សាធារណរដ្ឋ​ប្រជាមានិត​ចិន​។​


ជា​កិច្ច​ឆ្លើយតប​និង​លើកទឹកចិត្ត​ដល់​កងកម្លាំង​ស្ពាន​បណ្តែត​ទឹក​លោក​ឧបនាយករដ្ឋមន្ត្រី រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ​និង​ជា​ប្រធាន​គណកម្មាធិការ​ជាតិ​សម្របសម្រួល​កិច្ចការ​បណ្តាញ​ជូន​កងកម្លាំង​ចូលរួម​បេសកកម្ម​រក្សា​សន្តិភាព​របស់​អង្គការសហប្រជាជាតិ​បានផ្តល់​វិ​ញ្ញាប​ន​ប័ត្រ​បញ្ជាក់​ការហ្វឹកហ្វឺន​ជំនាញ​បច្ចេកទេស​ប្រើប្រាស់​ស្ពាន​បណ្តែត​ទឹក​ជូន​ដល់​សិក្ខាកាម​ទាំង​៣៨​រូប និង ក្រុម​គ្រូ​ជំនាញ​ចិន និង​ផ្តល់​ថវិកា​ជូន​ដល់​កងកម្លាំង​ស្ពាន​បណ្តែត​ទឹក​ក្នុង​ម្នាក់ៗ​ចំនួន​១០​ម៉ឺន​រៀល​ផងដែរ​។​.mara