ដោយ​៖ សុវណ្ណ​កុម្ភៈ​/​ភ្នំពេញ​៖ ព្រឹត្តិការណ៍​ប្រណាំង​ម៉ូតូ ELF Cup Race Endurance 2022 នឹងធ្វើ​នៅ​ខេត្តកំពង់ស្ពឺ​ពីថ្ងៃ​ទី​៩ ដល់ ១១ ខែធ្នូ ឆ្នាំ​២០២២​។​

​ក្នុង​សន្និសីទកាសែត​កាលពី​ថ្ងៃទី​២ ខែធ្នូ ភ្នាក់ងារ​រៀបចំ​ការប្រណាំង​យានយន្ត​កម្ពុជា “KARA” បញ្ជាក់​ឲ្យ​ដឹងថា​ព្រឹត្តិការណ៍​នេះ​នឹងធ្វើ​នៅ​ទីលាន​បើកបរ​យានយន្ត​យ៉ាម៉ា​ម៉ូតូ ខេត្តកំពង់ស្ពឺ ។​

​លោក ពៅ តិច​ឡេង អគ្គនាយក​ភ្នាក់ងារ​រៀបចំ​ការប្រណាំង​យានយន្ត​កម្ពុជា “KARA” បាន​ប្រាប់​ឲ្យ​ដឹងថា ព្រឹត្តិការណ៍​ការប្រកួត​ប្រណាំង​ម៉ូតូ​លើ​វាលរាប ELF Cup Race Endurance 2022 មាន​កីឡាករ​-​កីឡាការិនី ចំនួន ៤៥​នាក់​រួមមាន កម្ពុជា និង ជប៉ុន ដោយ​គណៈកម្មការ​រៀប​ចំការ ប្រកួត​បាន​បែង ចែកចេញ ទៅតាម​កម្រិត​របស់​កីឡាករ​-​កីឡាការិនី ចំនួន​៤​កម្រិត គឺ​កម្រិត “A” “B” “C” “D” ។​ការប្រកួត​លើក​មុន សម្រាប់​កីឡាករ​-​កីឡាការិនី គ្មាន​ប្រាក់រង្វាន់ លើកទឹកចិត្ត​ប៉ុន្តែ​ឆ្នាំនេះ​គណៈកម្មការ​រៀបចំ​ការ​ប្រកួត​នឹង​ផ្តល់ជូន ចំពោះ​ក្រុម​អត្ត​ព​លិ​ក ដែល​ទទួលបាន​ចំណាត់ថ្នាក់ ។​

​លោក​អគ្គនាយក​បា​នប​ន្ត​ថា កម្រិត “A” ដែលជា​កីឡាករ​ជំនាញ​ប្រណាំង​ម៉ូតូ​ប្រភេទ 150CC ចំណាត់ថ្នាក់​លេខ​១ ទទួលបាន​ប្រាក់រង្វាន់​លើកទឹកចិត្ត​ចំនួន​៤​លាន​រៀល ចំណាត់ថ្នាក់​លេខ​២ ទទួលបាន​ប្រាក់រង្វាន់​លើកទឹកចិត្ត​ចំនួន​៣​លាន​រៀល និង​ចំណាត់ថ្នាក់​លេខ​៣ ទទួលបាន​ប្រាក់រង្វាន់​លើកទឹកចិត្ត​ចំនួន ២​លាន​រៀល ។​

​ចំណែក​កម្រិត “B” “C” “D” ចំណាត់ថ្នាក់​លេខ​១ ទទួលបាន​ប្រាក់រង្វាន់​លើកទឹកចិត្ត ចំនួន ២ លាន​រៀល ចំណាត់ថ្នាក់​លេខ​២ ទទួលបាន ប្រាក់រង្វាន់ លើកទឹកចិត្ត​ចំនួន ១​លាន​២០​ម៉ឺន​រៀល និង​ចំណាត់ថ្នាក់​លេខ​៣ ទទួលបាន​ប្រាក់រង្វាន់​លើកទឹកចិត្ត​ចំនួន ៨០​ម៉ឺន​លាន​រៀល​។​

​លោកស្រី Dinah Kumer​នាយក​គ្រប់គ្រង Total Engergies Marketing (Cambodia)Co.,Ltd បាន​និយាយថា​ក្រុមហ៊ុន​លោកស្រី​បាន​ចូលរួម​ឧបត្ថម្ភ​ព្រឹត្តិការណ៍​ការប្រកួតប្រណាំង​ម៉ូតូ​លើ​វាលរាប ELF Cup Race Endurance នៅ​ព្រលានយន្តហោះ ខេត្តបាត់ដំបង ហើយ​ពេលនេះ ក្រុមហ៊ុន​ក៏​នៅតែ​គាំទ្រ​ដដែល​ដើម្បី​លើកស្ទួយ​វិស័យ​កីឡា​ប្រណាំង​ម៉ូតូ​លើ​វាលរាប​ឲ្យ​មានការ​រីកចម្រើន​កាន់តែខ្លាំង និង​អំពាវនាវ​ឲ្យ​យុវជន​ចូលរួម ព្រឹត្តិការណ៍​ការប្រកួត​ទាំងអស់គ្នា ៕​