​ប្រែ​សម្រួលៈ​បំណង​(​ដេល្លី​ម៉េល​)៖​អាជ្ញាធរ​រុស្ស៊ី​កាលពី​ថ្ងៃ​សៅរ៍​បាន​ច្រាន​ចោល​ការកំណត់ថ្លៃ​ប្រេង​របស់​ខ្លួន​ពី​សំណាក់​ដៃគូ​លោកខាងលិច​របស់​អ៊ុយ​ក្រែ​ន​និង​បាន​គំរាម​បញ្ឈ​ប់​ការ​ផ្គង់​ផ្គង់​ប្រេង​ដល់​ប្រទេស​​ណា​ដែល​ចូលរួម​គាំទ្រ​ផែនការ​នេះ​។​

​អូស្ត្រាលី អង់គ្លេស កាណាដា ជប៉ុន អាម៉េរិក​និង​ប្លុក​សហភាព​អឺរ៉ុប​២៧​ប្រទេស​កាលពី​ថ្ងៃ​សុក្រ​បាន​ព្រមព្រៀង​គ្នា​ថា​នឹង​កំណត់​ថ្លៃ​ប្រេង​រុស្ស៊ី​ត្រឹម​៦០​ដុល្លារ​ក្នុង​មួយ​បារ៉ែល​។​ការ​កំហិត​ថ្លៃ​ដែល​នឹង​ចូល​ជា​​ធរមាន​ចាប់ពី​ថ្ងៃ​ចន្ទ​ទី​៥​ធ្នូ​ទៅ​បូក​រួម​ទាំង​ការហ៊ុមព័ទ្ធ​របស់​សហ​ភាព​អឺរ៉ុប​លើ​ប្រេង​រុស្ស៊ី​ដែល​នាំ​ចេញ​តាម​សមុទ្រ​។​

​អ្នកនាំពាក្យ​វិមាន​ក្រឹម​ឡាំង​លោក ឌី​មី​ទ្រី ប៉េ​ស្កូវ បាន​និយាយថា​រុស្ស៊ី​ត្រូវ​ធ្វើ​ការវិភាគ​សភាពការណ៍​មុន​សំរេច​អំពី​ចម្លើយ​តប​ជាក់លាក់​ណាមួយ តែ​ថា​ខ្លួន​នឹង​មិន​ទទួលយក​ការកំណត់ថ្លៃ​នេះ​ទេ​។​ចំណែក​​តំណាង​អចិន្ត្រៃយ៍​របស់​រុស្ស៊ី​ប្រចាំ​បណ្តា​អង្គការ​អន្តរជាតិ​នៅ​ក្រុង​វី​យែន​លោក មី​ខា​អ៊ី​ល អ៊ុល​យ៉ា​ណូវ បាន​ព្រមាន​ថា ពួក​អ្នកចូលរួម​កំណត់​ថ្លៃ​នេះ​នឹង​ស្តាយក្រោយ​ចំពោះ​ការសំរេចចិត្ត​របស់​គេ​។​

​លោក​អ៊ុលយ៉ា​ណូវ បាន​សរសេរ​បង្ហោះ​ថា «​ចាប់ពី​ឆ្នាំ​នេះ​ទៅ អឺរ៉ុប​នឹង​រស់នៅ​ដោយ​គ្មាន​ប្រេង​រុស្ស៊ី​។​រដ្ឋាភិបាល​ទីក្រុង​មូ​ស្គូ​បានបញ្ជាក់​ច្បាស់​ហើយ​ថា​ខ្លួន​នឹង​មិន​ផ្គត់ផ្គង់​ប្រេង​អោយ​ប្រទេស​ណា​ដែល​គាំទ្រ​​ការកំណត់ថ្លៃ​ប្រឆាំងនឹង​គោលការណ៍​ទីផ្សារ​ទេ​។ សូម​រង់ចាំ​មើល មិន​យូរ​ទេ​សហភាព​អឺរ៉ុប​នឹង​ចោទប្រកាន់​រុស្ស៊ី​ថា​ប្រើប្រាស់​ប្រេង​ជា​សព្វាវុធ​មួយ​»​។​

​អ្នកនាំពាក្យ​វិមាន​ក្រឹម​ឡាំង​លោក ឌី​មី​ទ្រី ប៉េ​ស្កូវ បាន​និយាយថា​រដ្ឋាភិបាល​ទីក្រុង​មូ​ស្គូ នឹង​វាយ​តំលៃ​សភាពការណ៍​មុន​ឆ្លើយតប​នឹង​ចំណាត់ការ​របស់​G7​និង​សហភាព​អឺរ៉ុប​

​ក្នុងពេល​ជាមួយគ្នា​ការិយាល័យ​ប្រធានាធិបតី​អ៊ុយ​ក្រែនលោក​វ៉ូ​ឡូឌី​មៀ ហ្សេ​ឡេន​ស្គី បាន​អំពាវនាវ​អោយ​កំណត់​ថ្លៃ​ប្រេង​រុស្ស៊ី​ទាប​ជាង​នេះ ដោយ​ថា​ថ្លៃ​កំណត់ដោយ​G7​និង​សហភាព​អឺរ៉ុប​មិនទាន់​សមល្មម​​នៅឡើយ​ទេ​។​

​អង់ឌ្រីយ យឺ​ម៉ាក​(Andriy Yermak)​ប្រធានការិយាល័យ​របស់​ហ្សេ​ឡេន​ស្គី បាន​សរសេរ​បង្ហោះ​ក្នុងតេឡេ​ហ្ក្រា​ម​ថា « ចាំបាច់​ត្រូវ​បញ្ចុះ​វា​មក​នៅត្រឹម​៣០​ដុល្លារ​ក្នុង​មួយ​បារ៉ែល​ដើម្បី​បំផ្លាញចោល​សេដ្ឋកិច្ច​​រុស្ស៊ី​អោយបាន​ឆាប់​»​។​

​សូមបញ្ជាក់​ថា ក្រោម​កិច្ច​ព្រមព្រៀង​កាលពី​ថ្ងៃ​សុក្រ បណ្តា​ក្រុមហ៊ុន​ធានារ៉ាប់រង​និង​ក្រុង​ហ៊ុន​នាំចេញ​ប្រេង​រុស្ស៊ី​ចាំបាច់​ត្រូវតែ​នាំ​ចេញ​ក្នុង​តំលៃ​ដែល​បាន​កំណត់​ឬ​ទាប​ជាង​។​ក្រុមហ៊ុន​ធានារ៉ាប់រង​ភាគ​​ច្រើន​តាំងនៅ​អឺរ៉ុប​និង​អង់គ្លេស ហើយ​ពួកគេ​មុខ​ជា​ស្ថិត​ក្រោម​ការត្រួតពិនិត្យ​។​

​តាមពិត​ប្រេង​រុស្ស៊ី​ត្រូវ​បាន​លក់​ចេញ​ក្នុង​តំលៃ​ប្រមាណ​៦០​ដុល្លារ​ក្នុង​មួយ​បារ៉ែល​រួច​ជា​ស្រេច​ហើយ ដោយ​វា​ត្រូវ​បាន​លក់​បញ្ចុះ​ថ្លៃ​ទាប​ជាង​ប្រេង​ក្នុង​ផ្សារ​អន្តរជាតិ​ដែល​មាន​តំលៃ​ប្រមាណ​៨៥​ដុល្លារ​ក្នុង​​មួយ​បារ៉ែល​។​

​ស្ថានទូត​រុស្ស៊ី​ប្រចាំ​ទីក្រុង​វ៉ាស៊ីនតោន នៅតែ​អះអាងថា ប្រេង​រុស្ស៊ី​នៅតែ​មាន​តំរូវការ​និង​បាន​រិះគន់​ការកំណត់ថ្លៃ​នេះ​ថា​ជា​«​រុះរើ​គោលការណ៍​គ្រឹះ​នៃ​មុខងារ​ទីផ្សារសេរី​ឡើងវិញ​»​។​សារ​បង្ហោះ​ក្នុងតេឡេ​ក្រាម​​របស់​ស្ថានទូត​បាន​និយាយថា​«​ការកំណត់ថ្លៃ​ក្នុង​មួយ​បារ៉ែល​នេះ​នឹង​នាំ​ដល់​កំណើន​ភាពមិនប្រាកដ​ប្រជា​ជាទូទៅ​មួយ និង​ការចំណាយ​ខ្ពស់​ឡើង​សំរាប់​អតិថិជន​វត្ថុធាតុដើម​មិន​ទាន់​កែ​ច្នៃ​»៕