​ប្រែ​សម្រួលៈ​បំណង​(​ដេល្លី​ម៉េល​)៖ រដ្ឋាភិបាល​អែល​សាល់​វ៉ាឌ័​របាន​បញ្ជូនទា​ហាននិ​ង​ប៉ូលិស​១០.០០០​នាក់​ទៅ​បិទ​ខ្ទប់​ទីប្រជុំជន​មួយ​នៅ​ជាយ​រដ្ឋធានី​របស់ខ្លួន​ដើម្បី​តាម​ប្រម៉ា​ញ់​សមាជិក​ក្រុមសង្គមងងឹត​។​

​វា​ជា​ប្រតិបត្តិការ​ដែល​មាន​ការ​កេណ្ឌ​កម្លាំង​ច្រើន​បំផុត​ក្នុង​ការបង្ក្រាប​ចំណាស់​ប្រាំបួន​ខែ​មក​នេះ​របស់​ប្រធានាធិបតី ណា​យី​ប ប៊ូ​កេ​ឡេ​(Nayib Bukele)​លើ​ក្រុម​ជន​អន្ធពាល​តាម​ដង​វិថី​ដែល​ល្បី​ខាង​​ចាប់​ជំរិត​ប្រាក់​ពី​អ្នករកស៊ី និង​បាន​ធ្វើ​ផ្គរ​ភ្លៀង​នៅតាម​សង្កាត់​ជាយក្រុង សាន់ សាល់​វ៉ាឌ័​រ (San Salvador)​អស់​ពេល​យូរ​ឆ្នាំ​មកហើយ​។​

​ទាហាន​បាន​បិទ​ផ្លូវ​ចូល​និង​ចេញពី​ទីប្រជុំជន សូយ៉ា​ប៉ាន​ហ្គោ​(Soyapango)​ដើម្បី​ពិនិត្យមើល​ឯកសារ​របស់​ប្រជាជន​នៅ​ពេល​ក្រុម​ពិសេស​បាន​ចូល​ក្នុង​ទីប្រជុំជន​ដើម្បី​តាមរក​ជនសង្ស័យ​ជា​សមាជិក​​ក្រុម​ឧក្រិដ្ឋកម្ម​។​លោក​ប៊ូ​កេ​ឡេ បាន​សរសេរ​បង្ហោះ​ក្នុង​គណនី​ទ្វី​ត​ធឺ​របស់​លោក​ថា «​ចាប់ពី​ពេល​ឥឡូវ ទីប្រជុំជន​សូយ៉ា​ប៉ាន​ហ្គោ​ត្រូវបាន​ឡោម​ព័ទ្ធ​ទាំងស្រុង​»​។​

​សូមបញ្ជាក់​ថា មនុស្ស​ជាង​៥៨.០០០​នាក់​ត្រូវបាន​ចាប់​ដាក់គុក​ចាប់តាំងពី​រដ្ឋ​ប្រកាស​ដាក់​ប្រទេស​ក្នុងស្ថានភាព​គ្រាអាសន្ន​ក្រោយ​មាន​ឃាតកម្ម​ជា​បន្តបន្ទាប់​កាលពី​ខែ​មីនា​។​ក្រុម​សិទ្ធិ​មនុស្ស​​បាន​រិះគន់​ការប្រមូល​ចាប់​មនុស្ស​ទ្រង់ទ្រាយ​ធំៗ ដោយ​ភាគច្រើន​ផ្តោត​លើ​ពួក​យុវជន​អាស្រ័យ​លើ​ការ​ចេញ​មុខមាត់​និង​ទីកន្លែង​ដែល​ពួកគេ​រស់នៅ​។​

​វា​ជា​ផ្នែក​មួយ​នៃ​អ្វី​ដែល​លោក​ប៊ូ​កេ​ឡេ បាន​ហៅ​កាលពី​ខែ​វិច្ឆិកា​ថា​«​ការបង្ក្រាប​ដំណាក់កាល​ទី​ប្រាំ​»​។​លោក​ថា យុទ្ធវិធី​ដូច្នេះ​បាន​អោយ​លទ្ធផល​ល្អ​នៅ​ទីប្រជុំជន កូម៉ា​សា​ហ្កា (Comasagua)​អស់​ពេល​​ពីរ​ខែ​មក​ហើយ​។​

​កាលពី​ខែ​តុលា ទាហាន​និង​ប៉ូលីស​ជាង​២.០០០​នាក់​បាន​បិទ​ខ្ទប់​ទីប្រជុំជន​កូម៉ា​សា​ហ្កា ដើម្បី​តាម​ស្វែងរក​សមាជិក​ក្រុម​ជន​អន្ធពាល​ចំពោះ​ឃាតកម្ម​។​ដ្រូ​នត្រូវ​បាន​បង្ហោះ​លើ​ទីប្រជុំជន​និង​អ្នក​ដែល​ចូល​​ឬ​ចាកចេញ​ពី​ទីប្រជុំជន​ត្រូវបាន​ពិនិត្យ​និង​សាកសួរ​។​ជា​លទ្ធផល ជនសង្ស័យ​ប្រមាណ​៥០​នាក់​ត្រូវបាន​ចាប់​ខ្លួន​ក្នុង​រយៈពេល​ពីរ​ថ្ងៃ​។​

​ទាហាន​ក្នុង​ប្រតិបត្តិការ​បង្ក្រាប​ជនពាល​នៅ​ទីប្រជុំជន សូយ៉ា​ប៉ាន​ហ្គោ ប្រទេស​អែល សាល់​វ៉ាឌ័​រ កាលពី​ថ្ងៃ​សៅរ៍​

​រំលឹកថា លោក​ប៊ូ​កេ​ឡេ បាន​សុំ​សភា​ផ្តល់​អំណាច​ពិសេស​ដល់​លោក បន្ទាប់​ពី​ពួកឧក្រិដ្ឋជន​សម្លាប់​ម​នុស្ស​៦២​នាក់​កាលពី​ខែ​មីនា និង​សុំ​អោយ​សភា​បន្ត​ស្ថានភាព​គ្រាអាសន្ន​មួយ​ខែ​ម្តង​ចាប់តាំងពី​ពេល​​នោះមក​។​វា​ផ្អាក​សិទ្ធិ​មាន​ចែង​ក្នុង​រដ្ឋធម្មនុញ្ញ​និង​ផ្តល់​អោយ​ប៉ូលិស​នូវ​អំណាច​ចាប់​ខ្លួន​ជនសង្ស័យ​ដោយ​មិនចាំបាច់​ឆ្លងកាត់​នីតិវិធី​តុលាការ​។​

​គេ​ប៉ាន់ប្រមាណ​ថា ក្រុម​ឧក្រិដ្ឋជនជាច្រើននៅ​អែល សាល់​វ៉ាឌ័​រមាន​សមាជិក​ប្រមាណ​៧០.០០០​នាក់​និង​បាន​គ្រប់គ្រង​តំបន់​ជាច្រើន​ក្នុង​ប្រទេស​នេះ​ដោយ​បាន​ចាប់ជំរិត​និង​សម្លាប់​មនុស្ស​អស់​ពេល​រាប់​ឆ្នាំ​៕