​ប្រែ​សម្រួល : កញ្ញា​ដា​លី​ស (​បាល់ទាត់​) ៖ ជប៉ុន​ទើបតែ​បំបាក់​ក្រុម​យក្ស​អេ​ស្ប៉ាញ​និង​អាល្លឺម៉ង់​ដើម្បី​ឡើង​មក​វគ្គ​១៦​ក្រុម​ចុងក្រោយ ដូច្នេះ​ពួកគេ​នឹង​មិន​ខ្លាច​ក្រូ​អាស៊ី​សូម្បី​ប៉ុន​សរសៃសក់​នៅក្នុង​ជំនួប​ថ្ងៃ​ចន្ទ​នេះ ចំណែក​កូរ៉េខាងត្បូង​មាន​ការងារ​ធ្ងន់​ត្រូវ​រំលង​សាកសព​ស្តេច​បាល់ទាត់​ប្រេ​ស៊ី​លសិន មុន​នឹង​សុបិន​ចង់​ឡើងទៅ​វគ្គ ១/៤​។ 

– ជប៉ុន vs ក្រូ​អាស៊ី​

* ជប៉ុន​ស៊ុត​ចូល​៤​គ្រាប់​ទល់​នឹង​អេ​ស្ប៉ាញ​និង​អាល្លឺម៉ង់​ក្នុង​វគ្គ​ចែក​ពូ​ល​។​
* ក្រូ​អាស៊ី​បាន​ស៊ុត​បញ្ចូល​ទី​ក្នុង ១២ ប្រកួត​នៃ ១៦ ប្រកួត​ចុងក្រោយ​របស់​ពួកគេ និង ស៊ុត​ចូល ៦ ប្រកួត​ជាប់ៗ​គ្នា​មុនពេល​មក​ដល់​កាតា​។​
* Ivan Perisic បាន​ស៊ុត​បញ្ចូល​ទី​យ៉ាងហោចណាស់​២​គ្រាប់​ក្នុង​ការប្រកួត​សំខាន់ៗ​ចំនួន​៤​លើកចុងក្រោយ​។​
* ក្រូ​អាស៊ីលេង​ស្មើ​៥​លើក​ក្នុងចំណោម​ការ​វគ្គ​ជម្រុះ​៦​លើក​ចុងក្រោយ​របស់​ពួកគេ រួម​ទាំង​ការ​ស្មើ​១-១​ដល់​ទៅ​៣​លើក​នៅ​រុស្ស៊ី​ឆ្នាំ​២០១៨​។​

​ជប៉ុន​បាន​កក់​កៅអី​ក្នុង​វគ្គ​១៦​ក្រុម​ចុង​ក្រោយ​ជា​លើក​ទី​៤ ខណៈ​នេះ​ជា​ឆ្លង​ផុត​វគ្គ​ចែក​ពូ​ល​លើក​ទី​៣​ជាប់​គ្នា​របស់​ពួកគេ​។ ទោះយ៉ាងណា ពួកគេ​មិន​ដែល​ឡើង​ដល់​វគ្គ ៨ ក្រុម​ចុង​ក្រោយ​ឡើយ​។ ក្រោយ​ឈ្នះ​សុទ្ធតែ​គីឡូ​យក្ស​ដើម្បី​ឡើងឈរ​លេខ​១​ក្នុង​ពូ​ល តើ​នេះ​នឹង​ក្លាយជា​ការប្រកួត​វើល​ខាប់ដ៏​អស្ចារ្យ​បំផុត​របស់​ជប៉ុន​មិន​ធ្លាប់​មាន​មែន​ទេ​?

​ទោះយ៉ាងណា ឆ្អឹង​ទទឹង​ក​របស់​ពួកគេ​គឺ​ក្រូ​អាស៊ី ដែល​តែង​មាន​ទម្លាប់​ឈ្នះ​ឡើង​ដល់​វគ្គ​ជ្រៅៗ​។ នេះ​គ្រាន់តែ​ជា​លើក​ទី​៣​ដែល​ពួកគេ​បាន​ឆ្លង​ផុត​វគ្គ​ចែក​ពូ​លវើ​លខាប់​ប៉ុណ្ណោះ ប៉ុន្តែ​ក្នុង​ឆ្នាំ ១៩៩៨ និង ២០១៨ ពួកគេ​បាន​បន្ត​ឡើង​ដល់​វគ្គ ៤ ក្រុម​ចុងក្រោយ ដោយ​បាន​បញ្ចប់​ក្នុង​ចំណាត់​ថ្នាក់​ជើងឯក​រង​កាលពី ៤ ឆ្នាំមុន​។ តើ​ពួកគេ​អាច​ឡើង​ដល់​វគ្គ​ពាក់កណ្តាល​ផ្តាច់ព្រ័ត្រ​បាន​ទៀត​ទេ​?

​ក្រោយ​ទម្លាក់​ជំនាន់​មាស​វ័យចាស់​របស់​បែលហ្ស៊ិក​ចេញ​ពីវើ​លខាប់ ក្រូ​អាស៊ី​ឥឡូវ​កំពុង​ព្យាយាម​បង្កើត​ជំនាន់​មាស​របស់ខ្លួន​វិញ​ម្តង​។ ក្រុម​នេះ​មាន​ឫសគល់​ចេញពី​ក្រុម​ដែល​បាន​ទម្លាក់​អង់គ្លេស​នៅ​យូរ៉ូ​២០០៨ ជាពិសេស​ខ្សែបម្រើ Luka Modric ដែល​លេង​ល្អ​មិនចេះ​ធ្លាក់​ជើង​តាំងពី​ពេលនោះ​មក​។​

​កីឡាករ Ivan Perisic របស់ Tottenham គឺជា​សមាជិក​ដ៏​យូរអង្វែង​ម្នាក់​ទៀត​នៃ​ក្រុមក្រូ​អាស៊ី​នេះ ដោយ​បាន​បង្ហាញខ្លួន​ជា​លើកដំបូង​ឱ្យ​ជម្រើសជាតិ​កាលពី​ជាង ១០ ឆ្នាំមុន​។ រូបគេ​បាន​បង្ហាញខ្លួន​ជា​លើកដំបូង​ក្នុងវើ​លខាប់​ឆ្នាំ ២០១៤ ហើយ​គ្មាន​កីឡាករ​ណា​ម្នាក់​អាច​ស៊ុត​បាន​៩​គ្រាប់​ក្នុង​ការប្រកួត​សំខាន់ៗ​ដូច​រូបគេ​នោះឡើយ​។ មួយ​គ្រាប់​ទៀត​នឹង​ធ្វើឱ្យ​រូបគេ​វ៉ា​ដាច់​កំណត់​ត្រា​របស់​កីឡាករ Davor Suker ហើយ​រូបគេ​ពិតជា​អន្ទះសារ​ចង់​ស៊ុត​ចូល​នៅ​ថ្ងៃនេះ​។​

​មួយវិញទៀត គ្មាន​កីឡាក​រណា​ស៊ុត​ចំ​គោលដៅ​ច្រើនជាង Perisic នៅវើ​លខាប់​២០២២​នោះឡើយ ដោយ​បាន​ព្យាយាម​ស៊ុត​ចំ​គោលដៅ ៥ ដង​ក្នុង ៣ ប្រកួត​។ រូបគេ​បាន​ស៊ុត​បញ្ចូល​ទី​យ៉ាងហោចណាស់​២​គ្រាប់​ក្នុង​ការប្រកួត​ធំៗ​ចំនួន ៤ លើកចុងក្រោយ ដូច្នេះ​រូបគេ​គឺជា​ជម្រើស​ដ៏​ល្អ​ក្នុង​ការ​រក​គ្រាប់​បាល់​បាន​នៅ​ថ្ងៃនេះ​ក្នុង​អ្វី​ដែល​អាច​ជា​ការប្រកួត​ចុងក្រោយ​របស់​គេ​ក្នុ​ងវើល​ខា​ប់​។​

​សមត្ថភាព​បច្ចេកទេស​របស់​ក្រូ​អាស៊ី​គឺ​អស្ចារ្យ​ណាស់ ដោយ​ខ្សែបម្រើ​ទាំង​បី​របស់​ពួកគេ​មាន​ភាពប៉ិនប្រសព្វ​ក្នុង​ការរក្សា​សាច់​បាល់​និង​ដណ្តើម​យក​បាល់​មកវិញ​។ ពួកគេ​ទំនងជា​គ្រប់គ្រង​សាច់​បាល់​ច្រើន​ក្នុង​ការប្រកួត​នេះ ប៉ុន្តែ​នោះ​ជា​អ្វី​ដែល​ជប៉ុន​អាច​ស៊ូ​ទ្រាំ​បាន​។ ជប៉ុន​មាន​សា​ច់បា​ល់លេង​ជា​មធ្យម​ត្រឹមតែ ៣២,៣% ប៉ុណ្ណោះ​ក្នុង​ការប្រកួត​វគ្គ​ចែក​ពូ​ល​ចំនួន​៣​របស់​ពួកគេ​នៅវើ​លខាប់​នេះ​។ ការ​ឈ្នះ​២​ប្រកួត​របស់​ពួកគេ​លើ​អេ​ស្ប៉ាញ​និង​អាល្លឺម៉ង់ គឺ​មាន​ភាគរយ​គ្រប់គ្រង​សាច់​បាល់​ត្រឹមតែ ១៧,៧% និង ២៦,១% រៀងៗ​ខ្លួន ដោយ​ស៊ុត​បញ្ចូល​ទី​បាន ៤ គ្រាប់ ត្បិត​ពុំ​សូវ​មាន​ពេល​គ្រប់គ្រង​សាច់​បាល់​។​

​ទន្ទឹមនឹងនេះ​ដែរ ក្រូ​អាស៊ី​ខកខាន​ស៊ុត​បញ្ចូល​ទី​ក្នុង​ការប្រកួត​វគ្គ​ចែក​ពូ​ល​២​ប្រកួត​នៃ​៣​ប្រកួត​របស់​ពួកគេ​នៅវើ​លខាប់​នេះ ប៉ុន្តែ​ពួកគេ​បាន​ស្មើ​ទល់​សូន្យ​២​ដង​ប៉ុណ្ណោះ​ក្នុងចំណោម ១៣ ប្រកួត​ក្នុ​ងវើល​ខា​ប់ ២០០៦, ២០១៤ និង ២០១៨ រួម​បញ្ចូល​គ្នា​។ ពួកគេ​បាន​ទៅ​ប្រទេស​កាតា​ដោយ​បាន​ស៊ុត​បញ្ចូល​ទី​ក្នុង​ការប្រកួត​ចំនួន ៦ លើ​ក​ជាប់ៗ​គ្នា ហើយ​ពួកគេ​នឹង​ជួប​ជប៉ុន ដែល​របូត​គ្រាប់​បាល់​ក្នុង​ការប្រកួត​វើល​ខា​ប់ ៨ ប្រកួត​ជាប់ៗ​គ្នា​។​

​ដូច្នេះ​លទ្ធភាព​ដែល​ក្រុម​ទាំង​ពីរ​ស្មើគ្នា​និង​ស៊ុត​ចូល​គ្នា​គឺ​មាន​ពេញ ៩០ នាទី​។

​លទ្ធផល​ទស្សនទាយ​គឺ ១-១​។​

– ប្រេ​ស៊ីល vs កូរ៉េខាងត្បូង​

* ប្រេ​ស៊ីល​រកបាន ២៩ គ្រាប់​ក្នុង ១០ ប្រកួត​ចុងក្រោយ​របស់​ពួកគេ​។​
* ពួកគេ​បាន​យកឈ្នះ​កូរ៉េខាងត្បូង ៥-១ កាលពីដើមឆ្នាំ​នេះ​។​
* កូរ៉េខាងត្បូង​បាន​ស៊ុត​បញ្ចូល​ទី​២​គ្រាប់​ក្នុង​រាល់​ការប្រកួត​២​លើក​ចុងក្រោយ​របស់​ពួកគេ​ក្នុងវើ​លខាប់​។​
* កីឡាករ Vinicius Jr ស៊ុត​ចំ​គោលដៅ ២,៥ ជើង​ក្នុង​មួយ​ប្រកួត​ក្នុង​ប្រទេស​កាតា​។​

​បន្ទាប់​ពី​ឡើង​មក​វគ្គ ១៦ ក្រុម​ចុង​ក្រោយ​មិន​គួរ​ឱ្យ​ជឿ កូរ៉េខាងត្បូង​បាន​ត្រឡប់​មក​ធ្វើ​សកម្មភាព​វិញ​យ៉ាង​រហ័ស ហើយ​ពួកគេ​ស៊យ​ត្រូវ​ប៉ះ​ចំ​ស្តេច​បាល់ទាត់​ប្រេ​ស៊ីល​នៅ​វគ្គ​នេះ​។ ពួកគេ​ជួប​ជាមួយ​ក្រុមប្រេ​ស៊ីល ដែល​គេ​ព្យាករណ៍​ថា​នឹង​ឈ្នះ​វើល​ខា​ប់ សូម្បី​បន្ទាប់ពី​ពួកគេ​ចាញ់​កា​មេ​រូ​ន​យ៉ាង​ភ្ញាក់ផ្អើល​ក៏ដោយ​។ ប្រេ​ស៊ីល​បាន​ឆ្លង​ទៅ​វគ្គ ១៦ ក្រុម​ចុង​ក្រោយ​មុន​បរាជ័យ​នោះ ប៉ុន្តែ​ឈុត​ទី​ពីរ​របស់​ពួកគេ​ធ្វើ​មិន​បា​ល្អ​ទេ​ក្នុង​បរាជ័យ​នោះ​។​

​ឈុត​ធំ​នឹង​ត្រឡប់​មក​វិញ ជាមួយនឹង​ក្តីសង្ឃឹម​ថា Neymar អាច​នឹង​ត្រឡប់​មក​វិញ​ដែរ ដែល​នោះ​ជា​ការព្រួយបារម្ភ​សម្រាប់​កូរ៉េខាងត្បូង​។ ពួកគេ​បាន​ចាញ់​ក្រុម​សាំ​បា​ក្នុង​លទ្ធផល ៥-១ កាលពី​ខែ​មិថុនា ដូច្នេះ​ពួកគេ​ដឹង​ច្បាស់​ថា​តើ​ជំនួប​នេះ​នឹង​តឹង​ខ្លាំង​កម្រិតណា​។ ទោះយ៉ាងណា ពួកគេ​បាន​បង្ហាញ​ពី​ស្មារតី​ប្រយុទ្ធ​ពិតប្រាកដ​នៅ​ថ្ងៃ​ចុងក្រោយ​របស់​ពួកគេ ដូច្នេះ​ពួកគេ​ច្បាស់​អាច​ធ្វើឱ្យប្រេ​ស៊ីល​ជួប​ការលំបាក​ខ្លះ​ដែរ​។​

​ប្រេ​ស៊ីល​មាន​កីឡាក​រទេព​កោសល្យ​ខាង​វាយ​សម្រុក​ច្រើនណាស់ បើទោះជា Neymar មិនទាន់​ត្រឡប់មកវិញ​សម្រាប់​ការប្រកួត​នេះ​ក៏​ដោយ​។ ដោយ​បាន​ចៀស​ផុត​ពី​ជំនួប​ជាមួយ​ព័រ​ទុយ​ហ្គាល់​ឬ​អ៊ុយ​រូ​ហ្គាយ ពួកគេ​អាច​នឹង​ផ្តល់​ពេល​ឱ្យ​តារា PSG សម្រាក​ម្តងទៀត​។ ពួកគេ​មាន​ជម្រើស​ប្រយុទ្ធ​គ្រប់គ្រាន់ ដោយ Vinicius Jr ក៏​ជា​ការគំរាមកំហែង​ខ្លាំង​ផង​ដែរ​។​

​ក្នុង​ពីរ​ប្រកួត​ដំបូង​របស់​គេ ខ្សែបម្រើ​ស្លាបរ​បស់ Real Madrid រូប​នេះ​ស៊ុត​ចំ​គោលដៅ​ជា​មធ្យម ២,៥ ជើង​ក្នុង​មួយ​ប្រកួត​។ រូបគេ​ក៏​ស៊ុត​ចូល ៦ គ្រាប់​ក្នុង ១៤ ប្រកួត​នៅ La Liga រដូវ​កាល​នេះ​ផង​ដែរ​។ រូបគេ​ក៏​រកបាន​១​គ្រាប់​អក​ហ្សឺ​ជាមួយ​ស្វី​ស​ផងដែរ ដូច្នេះ​រូបគេ​ពិតជា​អាច​បង្ក​បញ្ហា​ដល់​កូរ៉េខាងត្បូង​។​

​លទ្ធផល​ទស្សនទាយ ប្រេ​ស៊ីល​ឈ្នះ ៣-១៕

ជប៉ុន​នឹង​មិន​ខ្លាច​ក្រូ​អាស៊ី​ប៉ុន​សរសៃសក់