​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ខ្សែប្រយុទ្ធ​ជម្រើសជាតិ​អង់គ្លេស រ៉ា​ហ៊ីម ស្ទើ​លីង (Raheem Sterling) នឹង​ចាកចេញ​ពី​ប្រទេស​កាតា បន្ទាប់ពី​ក្រុម​ចោរ​ប្រដាប់អាវុធ​បាន​ចូល​ផ្ទះ​របស់​គាត់ ខណៈ​គ្រួសារ​របស់គាត់​កំពុងស្ថិត​នៅ​ក្នុងផ្ទះ​។​

​ខ្សែបម្រើ​ស្លាបរ​បស់ Chelsea បាន​អវត្តមាន​ពី​ជ័យជម្នះ ៣-០ របស់​តោ​កំណាច​អង់គ្លេស​លើ​សេណេ​ហ្គាល់​កាលពី​ថ្ងៃអាទិត្យ បន្ទាប់​ពី​ឧបទ្ទវហេតុ​កាលពី​ល្ងាច​ថ្ងៃ​សៅរ៍​។​

​ស្ទើ​លីង​ត្រូវ​គេ​និយាយថា​ភ័យញ័រ​ដៃជើង​និង​ព្រួយបារម្ភ​អំពី​សុខុមាលភាព​របស់​កូនៗ​របស់គាត់ បន្ទាប់​ពី​ការ​សម្រុកចូល​ប្លន់​ក្នុងផ្ទះ​។​

​ការគាំទ្រ​សម្រាប់​កីឡាករ​អន្តរជាតិ​អង់គ្លេស​រូបនេះ​បាន​ជោរជន់​ពេញ​បណ្តាញ​សង្គម ខណៈ​អ្នកធ្វើ​អត្ថាធិប្បាយ​ការប្រកួត​ប្រចាំថ្ងៃ លោក ហ្គារី លីនេ​កឺ (Gary Lineker) បាន​ចូល​ទៅក្នុង Twitter ផ្ញើ​សារ​ទៅកាន់​កីឡាក​រវ័យ ២៧ ឆ្នាំ​រូប​នេះ​។​

​គាត់​បាន​និយាយថា “​ខ្ញុំ​សូម​សម្តែង​ការព្រួយបារម្ភ​ជាមួយ រ៉ា​ហ៊ីម ស្ទើ​លីង និង​ក្រុមគ្រួសារ​របស់​គាត់ បន្ទាប់ពី​ហេតុការណ៍​ដ៏​អាក្រក់​របស់​ពួកគេ​”​។​

​នៅក្នុង​សន្និសីទ​សារព័ត៌មាន​បន្ទាប់​ពី​ការប្រកួត អ្នក​ចាត់ការ​ទូទៅ​ក្រុម​ជម្រើសជាតិ​អង់គ្លេស​លោក ហ្គា​រ៉េត សៅ​ហ្គេត (Gareth Southgate) បាន​ប្រាប់​អ្នកយកព័ត៌មាន​ថា “​រ៉ា​ហ៊ីម ដូចដែល​សេចក្តីថ្លែងការណ៍​របស់ FA បាន​និយាយ​ចឹង គឺ​គាត់​ត្រូវតែ​ដោះស្រាយ​ស្ថានភាព​គ្រួសារ ដូច្នេះ​គាត់​នឹង​ត្រឡប់​ទៅ​ប្រទេស​អង់គ្លេស​វិញ​”​។​

“​យើង​ត្រូវ​ទុកពេល​ឱ្យ​គាត់​ដើម្បី​ព្យាយាម​ដោះស្រាយ​រឿង​នោះ ឬ នៅ​ទីនោះ​សម្រាប់​គ្រួសារ​គាត់​។ នោះ​ជា​រឿង​សំខាន់​បំផុត​នៅពេលនេះ ដូច្នេះ​យើង​នឹង​ផ្តល់ឱ្យ​គាត់​នូវ​ចន្លោះ​ទំនេរ​នោះ​”​។​

“​ខ្ញុំ​បាន​ចំណាយ​ពេល​ច្រើន​ជាមួយ​រ៉ា​ហ៊ីម​នៅ​ព្រឹក​នេះ ប៉ុន្តែ​អ្នកដឹង​ទេ អ្នក​នឹង​មាន​ថ្ងៃ​ដែល​ព្រឹត្តិការណ៍​នោះ​កើតឡើង ហើយ​អ្នក​ត្រូវតែ​ដោះស្រាយ​ជាមួយ​ពួក​វា​”​។​

“​មែន​ហើយ គាត់​កំពុងធ្វើដំណើរ​ទៅផ្ទះ ហើយ​យើង​ពិតជា​យល់​ចំពោះ​គាត់​ដែល​ត្រូវបាន​អនុញ្ញាត​ឱ្យ​មាន​ចន្លោះ​ទំនេរ និង ការគោរព​ភាព​ឯកជន​របស់​គាត់ ដូច្នេះ​យើង​មិន​ចង់​និយាយ​លម្អិត​ច្រើនពេក​នោះទេ​”៕

​ស្ទើ​លីង​ត្រឡប់​ទៅ​អង់គ្លេស​វិញ​ក្រោយ​ចោរ​ប្រដាប់​អាវុធ​ចូល​ប្លន់​ក្នុងផ្ទះ