​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ លក្ខខណ្ឌ​អាកាសធាតុ​ប្រសើរ​ឡើង​កាលពី​ថ្ងៃ​ចន្ទ​ទី​៥​ធ្នូ​បាន​អនុញ្ញាត​ឱ្យ​ក្រុម​អ្នក​ជួយ​សង្គ្រោះ​បន្ត​កិច្ចខិតខំ​ប្រឹងប្រែង​ជម្លៀស និង​ការស្វែងរក​ជនរងគ្រោះ​ដែល​​អាច​កប់​ក្រោម​ផេះ បន្ទាប់​ពី​ភ្នំភ្លើង​ខ្ពស់​បំផុត​នៅលើ​កោះ​សម្បូរ​មនុស្ស​បំផុត​របស់​ឥណ្ឌូនេស៊ី​បាន​ផ្ទុះ ដែល​បង្កឡើង​ដោយ​ភ្លៀង​មូសុង​។​

អាជ្ញាធរបានជម្លៀសមនុស្សថែមទៀតកាលពីថ្ងៃចន្ទបន្ទាប់ពីភ្នំភ្លើងផ្ទុះជាថ្មី

​ភ្នំ​សេ​មេ​រុ (Semeru) ក្នុងស្រុក​លូ​ម៉ា​ចាង (Lumajang) នៅ​កោះ​ជ្វា​ភាគ​ខាងកើត បាន​បញ្ចេញ​ផេះ​យ៉ាង​ក្រាស់​ឡើង​លើ​មេឃ​កម្ពស់ ១.៥០០ ម៉ែត្រ​កាលពី​ថ្ងៃអាទិត្យ​។​ភូមិ​និង​ទីប្រជុំជន​ក្បែរ​នោះ​ត្រូវ​​បាន​គ្របដណ្តប់​ដោយ​ផេះ​ដែល​ធ្លាក់​ចុះ​មក ដោយ​បាំង​ពន្លឺ​ថ្ងៃ ប៉ុន្តែ​មិន​មាន​សេចក្តីរាយការណ៍​អំពី​អ្នកស្លាប់​ឬ​របួស​នោះទេ​។​

​ក្រុម​អ្នក​ជួយសង្គ្រោះ​រាប់រយ​នាក់​ត្រូវបាន​បញ្ជូន​កាលពី​ថ្ងៃ​ចន្ទ​ទៅកាន់​ភូមិ​ដែល​រងគ្រោះ​ខ្លាំង​បំផុត​គឺ ស៊ុម​បឺ​វូ​លូ (Sumberwuluh) និង​ស៊ូ​ភី​ទូ​រ៉ា​ង (Supiturang) ជា​កន្លែង​ដែល​ផ្ទះ​និង​វិហារ​​អ៊ីស្លាម​ត្រូវបាន​កប់​រហូតដល់​ដំបូល​ផ្ទះ​ដោយ​ផេះភ្នំភ្លើង​រាប់​តោន​។​

​ភ្លៀង​ធ្លាក់​ខ្លាំង​បានធ្វើឱ្យ​សឹករេចរឹល​ហើយ​ទីបំផុត​បាន​ធ្វើឱ្យ​ដួលរលំ​មាត់​ភ្នំភ្លើង​នៅលើ​កំពូល​ភ្នំភ្លើង ៣.៦៧៦ ម៉ែត្រ ដែល​បណ្តាល​ឱ្យ​មាន​ការ​បញ្ចេញ​ហ្គាស​និង​កម្អែល​ចុះ​តាម​ជម្រាលភ្នំ​ឆ្ពោះទៅកាន់​​ទន្លេ​ក្បែរ​នោះ​។​

​ជាតិ​ហ្គាស​បាន​ហៀរ​ចុះ​តាម​សងខាង​ភ្នំ ដោយ​បាន​បំផ្លាញ​ភូមិ​ទាំងមូល​និង​បំផ្លាញ​ស្ពាន​ដែល​ទើបតែ​សាងសង់​ឡើង​វិញ​បន្ទាប់​ពី​ការផ្ទុះ​ដ៏​ខ្លាំង​មួយ​កាលពី​ឆ្នាំមុន​។​

​ការផ្ទុះ​ដ៏​ធំ​ចុងក្រោយ​របស់​ភ្នំ​សេ​មេរុ​គឺ​នៅក្នុង​ខែ​ធ្នូ ឆ្នាំ ២០២១ នៅពេល​ដែល​វា​បាន​ផ្ទុះ​ឡើង​ជាមួយ​នឹង​កម្អែល​ដែល​បាន​បណ្តាលឱ្យ​មនុស្ស​ស្លាប់ ៥១ នាក់​នៅក្នុង​ភូមិ​នានា ដែល​ត្រូវ​បាន​កប់​នៅក្រោម​ស្រទាប់​ភក់​។​

​មនុស្ស​រាប់រយ​នាក់​ផ្សេងទៀត​បាន​រងរបួស​ធ្ងន់ធ្ងរ ហើយ​ការផ្ទុះ​នោះ​បាន​បង្ខំ​ឱ្យមាន​ការជម្លៀស​មនុស្ស​ជាង ១០.០០០ នាក់​៕

​ភូមិ​ស៊ុម​បឺ​វូ​លូ​និង​ស៊ូ​ភី​ទូ​រ៉ាង​រងគ្រោះ​ខ្លាំងជាងគេ​ពី​ការផ្ទុះ​ភ្នំភ្លើង​សេ​មេរុ​កាលពី​ថ្ងៃអាទិត្យ