​ប្រែ​សម្រួលៈ​បំណង​(​ស្ត្រេត​ថែមស៍​)៖ ក្រសួងការពារជាតិ​រុស្ស៊ី​បាន​និយាយថា ខ្លួន​បាន​បញ្ជូន​ប្រព័ន្ធ​កាំជ្រួច​ការពារ​ដែនអាកាស​ទៅ​ដាក់​តាំង​នៅ​លើ​កោះ​គូ​រី​ល​(Kuril)​ភាគ​ខាងជើង​មួយ ជា​ផ្នែក​នៃ​កម្រង​​កោះ​យុទ្ធសាស្ត្រ​ដែល​លាតសន្ធឹង​រវាង​ជប៉ុន​និង​ឧបទ្វីប​កាំ​ចាត់កា​(Kamchatka)​របស់​រុស្ស៊ី​។​

​ជប៉ុន​អះអាង​កម្មសិទ្ធិលើបណ្តា​កោះ​គូ​រី​ល​ខាងត្បូង​ដែល​កាន់កាប់​ដោយ​រុស្ស៊ី ដែល​រដ្ឋាភិបាល​ទីក្រុង​តូ​ក្យូ​ហៅ​ថា​ទឹកដី​ខាងជើង ក្នុង​ជម្លោះទឹកដី​មួយ​ដែល​មាន​តាំងពី​ចុងបញ្ចប់​សង្គ្រាមលោកលើកទី​ពីរ​នៅ​ពេល​ទា​​ហាន​សូ​វៀត​ដណ្តើម​ទឹកដី​នេះ​ពី​ជប៉ុន​។​

​ប្រព័ន្ធ​កាំជ្រួច​បា​សសិន​(Bastion)​របស់​រុស្ស៊ី ដែល​កាំជ្រួច​របស់​វា​អាច​ហោះ​បាន​ចម្ងាយ​៥០០​គីឡូម៉ែត្រ ត្រូវបាន​ដាក់ពង្រាយ​នៅលើ​កោះ​ប៉ា​រ៉ា​មូសៀ​(Paramushir)​នៅ​ប៉ែក​ខាងជើង​នៅ​ប្រជុំ​កោះ​​គូ​រី​ល នេះ​បើ​តាម​ការបញ្ជាក់​ពី​ក្រសួង​ការពារជាតិ​រុស្ស៊ី​កាលពី​ថ្ងៃ​ចន្ទ​។​

​វា​បាន​និយាយថា​«​យាន​ផ្ទុក​ប្រព័ន្ធ​កាំជ្រួច​Bastion​បានចាប់ផ្តើម​បំពេញ​ការងារ​នៅ​លើ​កោះ​ប៉ា​រ៉ាមូ​សៀនៃ​ប្រជុំ​កោះ​គូរីល​របស់​រុស្ស៊ី​ចាប់ពី​ថ្ងៃ​៥​ធ្នូ ឆ្នាំ​២០២២​។​ទាហាន​នៃ​កង​នាវា​ប៉ាស៊ីហ្វិក​នឹង​រក្សា​ការ​​ឃ្លាំ​មើល​ពេញ​២៤​ម៉ោង​ដើម្បី​គ្រប់គ្រង​តំបន់​ដែនទឹក​ក្បែរ​ខាង​និង​ច្រក​សមុទ្រ​»​។​

​ក្រសួង​បាន​បន្ថែមថា ជំរំ​យោធា​មួយ​ត្រូវបាន​បង្កើតឡើង​នៅលើ​កោះ​ប៉ា​រ៉ា​មូសៀ ដែល​ផ្តល់​សេវា ជម្រក ការ​សម្រាក​សប្បាយ​និង​ស្បៀង​ពេញ​មួយ​ឆ្នាំ​សំរាប់​ទាហាន​ឈរជើង​នៅ​ទីនោះ​។​

​ការ​ដាក​តាំង​កាំជ្រួច​នេះ​កើត​ឡើង​មួយ​ឆ្នាំ​ក្រោយ​រុស្ស៊ី​ដាក់តាំង​ប្រព័ន្ធ​កាំជ្រួច​ដូច​គ្នា​នៅលើ​កោះ​ម៉ា​ទូ​អា​(Matua)​នៅ​ភាគ​កណ្តាល​នៃ​ប្រជុំ​កោះ​គូ​រី​ល​។​

​ក្រុម​ទីប្រឹក្សា​ហៅថា​មជ្ឈមណ្ឌល​ស្តីពី​ការសិក្សា​អន្តរជាតិ​និង​យុទ្ធសាស្ត្រ​មួយ​ដែល​មាន​មូលដ្ឋាន​នៅ​វ៉ាស៊ីនតោន បាន​និយាយ​នៅក្នុង​របាយការណ៍​កាល​ពី​ខែ​កញ្ញា​ថា​«​រុស្ស៊ី​បង្កើន​វត្តមាន​យោធា​នៅ​ទីនោះ​​ដើម្បី​បង្ហាញ​ថា​ប្រជុំ​កោះ​គូ​រី​ល​បន្ត​ដើរតួនាទី​ដ៏​សំខាន់​មួយ​នៃ​ទំនាក់ទំនង​រុស្ស៊ី​-​ជប៉ុន និង​ថា​ជប៉ុន​និង​អាម៉េរិក​គួរ​ពង្រឹង​ការប្រឹក្សា​យោបល់​ទាក់ទង​នឹង​សកម្មភាព​របស់​រុស្ស៊ី​នៅក្នុង​តំបន់នេះ​។​

​សូមបញ្ជាក់​ថា ជប៉ុន​ចូលរួម​ជាមួយ​សម្ពន្ធមិត្ត​លោកខាងលិច​ថ្កោលទោស​និង​ដាក់​ទណ្ឌកម្មសេដ្ឋកិច្ច​លើ​រុស្ស៊ី​ក្រោយ​រដ្ឋាភិបាល​ទីក្រុង​មូ​ស្គូ​បញ្ជូនទ័ព​រាប់ម៉ឺន​នាក់​ចូលលុកលុយ​ប្រទេស​ក្បែរ​ខាង​អ៊ុ​យក្រែន​។​​រុស្ស៊ី​បាន​ដកខ្លួន​ចេញពី​កិច្ចពិភាក្សា​បង្កើត​កិច្ចព្រមព្រៀង​សន្តិភាព​មួយ​ជាមួយ​ជប៉ុន​ព្រមទាំង​បង្កក​គំរោង​សេដ្ឋកិច្ច​រួម​នានា​ពាក់ព័ន្ធ​នឹង​កោះ​គូ​រី​ល​ដោយសារតែ​ជប៉ុន​ដាក់ទណ្ឌកម្ម​លើ​រុស្ស៊ី​៕

​ប្រព័ន្ធ​កាំជ្រួច​បាស​សិន​របស់​រុស្ស៊ី​ត្រូវបាន​ដាក់ពង្រាយ​នៅលើ​កោះ​ប៉ា​រ៉ាមូ​សៀនៅ​ប៉ែក​ខាងជើង​នៅ​ប្រជុំ​កោះ​គូ​រី​ល