​ប្រែ​សម្រួលៈ​បំណង​(​ដេល្លី​ម៉េល​)៖ ប្រធានាធិបតី​ចិន​លោក ស៊ី ជីន​ភីង បាន​ទៅ​ដល់​អា​រ៉ាប៊ីសាអូឌីត កាលពី​ថ្ងៃ​ពុធ​ទី​៧​ធ្នូ សំរាប់​ចូលរួម​កិច្ចប្រជុំ​បី​ថ្ងៃ​ជាមួយ​ក្រុម​មេដឹកនាំ​តំបន់ ដោយ​ទំនងជា​ផ្តោតលើ​​បញ្ហា​ថាមពលនិងគំរោងធំៗ​។​

​វា​ជា​ដំណើរ​ចេញ​ក្រៅ​ប្រទេស​លើក​ទី​បី​សំរាប់​លោក​ស៊ី​ចាប់តាំងពី​ពេល​ពិភពលោក​ផ្ទុះ​ជំងឺ​កូវី​ដ​១៩​នៅ​ឆ្នាំ​២០២០ និង​ជា​លើកដំបូង​ដែល​លោក​ធ្វើ​ទស្សនកិច្ច​អា​រ៉ាប៊ីសាអូឌីត ដែល​ជា​ប្រទេស​នាំចេញ​ប្រេង​​លំដាប់​កំពូល​លើ​លោក ចាប់តាំងពី​ឆ្នាំ​២០១៦​។​

​ក្នុង​ដំណើរ​នេះ​លោក​នឹង​ជួប​ស្តេច សាល់​ម៉ាន់​(Salman)​និង​រជ្ជទាយាទ​អា​រ៉ាប៊ីសាអូឌីត ព្រះអង្គម្ចាស់ ម៉ូ​ហា​ម៉េដ ប៊ីន សាល់​ម៉ាន់​(Mohammed bin Salman)​ដែល​ជា​មេដឹកនាំ​តាម​ការជាក់ស្តែង​​របស់​ព្រះរាជាណាចក្រ​សំបូរ​ប្រេង​នេះ ចូលរួម​ជំនួប​កំពូល​នៃ​ក្រុមប្រឹក្សា​កិច្ចសហការ​ឈូង​សមុទ្រ​ និង​ជំនួប​កំពូល​ចិន​-​អារ៉ាប់​។​

​ប្រធានាធិបតី​ស៊ី​បាន​ទៅ​ដល់​អា​រ៉ាប៊ីសាអូឌីត​កាលពី​ថ្ងៃ​ពុធ​និង​ត្រូវបាន​ទទួល​ស្វាគមន៍​ដោយ​ព្រះអង្គម្ចាស់ ម៉ូ​ហា​ម៉េដ ប៊ីន សាល់​ម៉ាន់​

​បញ្ហា​ទីផ្សារ​ប្រេង​ត្រូវ​រំពឹងថា​នឹង​ជា​របៀបវារៈ​កំពូល​នៃ​កិច្ច​ពិភាក្សា​រវាង​ចិន​ដែល​ជា​ប្រទេស​ប្រើ​ប្រេង​ធំ​បំផុត​លើ​កលោក និង​អា​រ៉ាប៊ីសាអូឌីត ក្នុងពេល​ទីផ្សារ​ប្រេង​ជួប​ចលាចល​ក្រោយ​រុស្ស៊ី​ចូល​ឈ្លានពាន​​អ៊ុយ​ក្រែន​កាលពី​ខែ​កុម្ភៈ​។​

​សូមបញ្ជាក់​ថា ក្រុម​ប្រទេស​G7 និង​សហភាព​អឺរ៉ុប​កាលពី​សប្តាហ៍​មុន​បាន​ព្រមព្រៀងគ្នា​លើ​ការកំណត់ថ្លៃ​ប្រេង​រុស្ស៊ី​៦០​ដុល្លារ​ក្នុង​មួយ​បារ៉ែល ក្នុង​បំណង​ខ្ទប់​ចំណូល​របស់​រុស្ស៊ី​សំរាប់​សង្គ្រាម​នៅ​អ៊ុ​យក្រែន​​ដែល​វា​កាន់តែ​បង្ក​ភាពមិនប្រាកដប្រជា​នៅក្នុង​ទីផ្សារ​ប្រេង​។​

​កាលពី​ថ្ងៃអាទិត្យ អង្គការ​នៃ​ក្រុម​ប្រទេស​នាំចេញ​ប្រេង​ហៅថា អូប៉ិច​បូក​(OPEC+ oil)​ដឹកនាំ​ដោយ​អា​រ៉ាប៊ីសាអូឌីត និង​រុស្ស៊ី​បាន​ជ្រើស​យក​ការកាត់បន្ថយ​ទិន្នផល​ប្រេង​មួយ​ថ្ងៃ​២​លាន​បារ៉ែល ដូចដែល​​ខ្លួន​បាន​អនុម័ត​កាលពី​ខែ​តុលា​ ជាចំណាត់ការដែលរដ្ឋាភិបាលទីក្រុងវ៉ាស៊ីនតោនមិនពេញចិត្តដោយសារអាម៉េរិកចង់អោយOPEC+ oilបង្កើនការផលិតប្រេង។

​ពួក​មន្ត្រី​អា​រ៉ាប៊ីសាអូឌីត​និងចិន បាន​ផ្តល់​ព័ត៌មាន​ត្រួសៗ​អំពី​របៀបវារៈ​នៃ​កិច្ចពិភាក្សា តែ​លោក​អា​លី ស៊ី​ហា​ប៊ី​(Ali Shihabi)​អ្នកវិភាគ​អា​រ៉ាប៊ីសាអូឌីត ដែល​ស្និទ្ធ​នឹង​រដ្ឋាភិបាល​បាន​និយាយថា​លោក​​រំពឹងថា​នឹង​មាន​«​ការចុះហត្ថលេខា​លើ​កិច្ចព្រមព្រៀង​មួយ​ចំនួន​»​។​

​ក្រៅពី​ថាមពល ពួក​អ្នកវិភាគ​និយាយ​ថា​មេដឹកនាំ​នៃ​ប្រទេស​ទាំង​ពីរ​ក៏​ទំនង​ជា​នឹង​ពិភាក្សា​អំពី​កិច្ចព្រមព្រៀង​ធំៗ ដែល​នឹង​អនុញ្ញាត​អោយ​ក្រុមហ៊ុន​ចិន​ចូល​ពាក់ព័ន្ធ​កាន់តែ​ជ្រៅ​ទៅក្នុង​គំរោង​ធំៗ​ដែល​​សំខាន់​សំរាប់​ទស្សនៈវិស័យ​របស់​ព្រះអង្គម្ចាស់​ម៉ូហា​ម៉េដ ប៊ីន សាល់​ម៉ាន់ ស្តីពី​ការធ្វើ​ពិពិធ​កម្ម​(​ការធ្វើអោយ​មាន​ភាព​ផ្សេងៗ​គ្នា​ឬ​ច្រើនបែប​)​សេដ្ឋកិច្ច​អា​រ៉ាប៊ីសាអូឌីតអោ​យ​ហួស​ពី​ប្រេង​។​​គំរោងធំៗ​ទាំង​​នោះ​រួមមាន មហា​ទីក្រុង​តំលៃ​៥០០​ពាន់​លាន​ដុល្លារ​មួយ​ហៅថា​NEOM ជា​ទីក្រុង​ដែល​ពឹងផ្អែក​ខ្លាំង​លើ​ការប្រើ​បច្ចេកវិទ្យា​សំគាល់​ផ្ទៃមុខ​និង​បច្ចេកវិទ្យា​តាមដាន​ស៊ើប​ការណ៍​។​

​ដំណើរ​របស់​ស៊ី​ត្រូវ​រំពឹងថា​នឹង​តាមឃ្លាំមើល​យ៉ាង​ដិតដល់​ពី​រដ្ឋធានី​វ៉ាស៊ីនតោន ។​

​ចិន​និង​អា​រ៉ាប៊ីសាអូឌីត ក៏​បាន​ធ្វើការ​ជាមួយគ្នា​លើ​ការផលិត​និង​លក់​សព្វាវុធ​៕