​ដោយ​:​បូកគោ​/​កំ​ពតៈ នៅ​ព្រឹក​ថ្ងៃទី​៧ ខែធ្នូ ឆ្នាំ​២០២២ កម្លាំង​នគរបាល​នៃ​ស្នងការដ្ឋាន​ខេត្តកំពត​បាន​បញ្ជូន​មនុស្ស​ប្រុស​ស្រី​១០​នាក់ ដែលមាន​អាយុ​ចន្លោះ​ពី​១៥​ឆ្នាំ​ដល់​១៨​ឆ្នាំទៅ​សាលាដំបូង​បន្ទាប់ពី​កសាង​សំណុំរឿង​រួចរាល់​ពាក់ព័ន្ធ​បទ​សង្ស័យ​ឆក់​ទ្រព្យសម្បត្តិ​ប្រជាពលរដ្ឋ​តាម​ដងផ្លូវ​។​

​មន្ត្រីនគរបាល​នៃ​ស្នងការដ្ឋាន​ខេត្តកំពត​បាន​បាន​រំលឹកថា កាលពី​ម៉ោង​៩:២០​នាទី​ព្រឹក​ថ្ងៃទី​៥ ខែធ្នូ ឆ្នាំ​២០២២ មាន​ករណី​ក្រុមយុវជន​១០​នាក់ (​ស្រី​ម្នាក់​) ជិះ​ម៉ូតូ​បួន​គ្រឿង​មកពី​ភ្នំពេញ​បាន​ឆក់​ទូរ​សព្ទ​ដៃ​ម៉ាក Iphone 7 Plus ពី​នារី​ម្នាក់​នៅលើ​កំណាត់​ផ្លូវជាតិ​លេខ​៣​ត្រង់ចំណុច​មុខ​ស្ថានីយប្រេងឥន្ធនៈ​តេ​លា​ក្នុងភូមិ​ត្រពាំង​ច្រាប ឃុំ​ថ្មី ស្រុក​ទឹកឈូ​។ ក្រោយ​ធ្វើ​សកម្មភាព ពួកគេ​បាន​បន្តដំណើរ​មក​ក្រុង​កំពត និង​ឡើងទៅ​ភ្នំ​បូកគោ​។ ជាមួយ​ហេតុការណ៍​នេះ កម្លាំង​នៃ​អធិការដ្ឋាន​ស្រុក​ទឹកឈូ ក្រុង​កំពត និង​ក្រុង​បូកគោ​បាន​សហការ​តាមដាន ព្រមទាំង​កំណត់​មុខសញ្ញា​តាមរយៈ​ការរៀបរាប់​របស់​ជន​រងគ្រោះ​។ លុះ​វេលា​ម៉ោង​ប្រហែល​ម៉ោង​៣​រសៀល ពេល​ចុះ​ពី​ភ្នំ​បូកគោ​បម្រុង​ទៅ​ខេត្ត​ព្រះសីហនុ ម៉ូតូ​របស់​ពួកគេ​ពីរ​គ្រឿង​អស់​សាំង ទើប​ពីរ​នាក់​ក្នុងចំណោម​នោះបាន​ទៅ​ឆក់យក​សាំង​ពីរ​ដប​របស់​អ្នកលក់​តាមផ្លូវ​នា​សង្កាត់​កោះ​តូច ក្រុង​បូកគោ រួច​បើក​រត់​តែ​ត្រូវ​កម្លាំង​សមត្ថកិច្ច​នៅ​សង្កាត់​ព្រែក​ត្នោត​ឃាត់ខ្លួន​បាន​បួន​នាក់​ជាមួយ​ម៉ូតូ​ពីរ​គ្រឿង​។ ចំណែក​៦​នាក់​ទៀត​បាន​ជិះ​ម៉ូតូ​ត្រឡប់​ចូលមក​ក្រុង​កំពត​វិញ​ទើប​កម្លាំង​នគរបាល​ក្រុង​កំពត​ស្ទាក់​ចាប់បាន​ក្នុង​ទឹកដី​នៃ​សង្កាត់​អណ្តូង​ខ្មែរ ក្រុង​កំពត​តែម្តង​៕​/R