​ប្រែ​សម្រួលៈ​បំណង​(​ដេល្លី​ម៉េល​)៖ ទាហាន​ថៃ​បាន​ប៉ះទង្គិច​ជាមួយ​ពួក​រត់ពន្ធ​និង​ឈ្មួញ​គ្រឿងញៀន​នៅ​តំបន់​ព្រៃ​ក្រាស់​មួយ​នៅ​ភាគ​ខាងជើង​ប្រទេស​ក្បែរ​ព្រំដែន​មី​យ៉ាន់​ម៉ា ដោយ​បាន​សម្លាប់​ជនសង្ស័យ​ជា​​អ្នក​លួច​ដឹកជញ្ជូន​ថ្នាំញៀន​ឆ្លងកាត់​ព្រំដែន​ចំនួន​១៥​នាក់ នេះ​បើ​តាម​ការបញ្ជាក់​ពី​អាជ្ញាធរ​ថៃ​កាលពី​ថ្ងៃ​ព្រហស្បតិ៍​ទី​៨​ធ្នូ​។​

​ទាហាន​ល្បាត​បាន​ពើបប្រទះ​ជនសង្ស័យ​មួយក្រុម​ដែល​ស្ពាយ​សាក់​កាដូ​កាលពី​ល្ងាច​ថ្ងៃ​ពុធ​និង​បាន​បញ្ជា​អោយ​ពួក​គេ​ឈប់ តែ​ពួកគេ​បាន​បាញ់​លើ​កង​យោធា​ដែល​ទទួលបន្ទុក​សន្តិសុខ​នៅ​បណ្តា​ខេត្ត​​ជាប់​ព្រំដែន​ភាគ​ខាងជើង​។​

​ការបាញ់​គ្នា​បាន​ចំណាយពេល​អស់​ប្រមាណ​ដប់​នាទី​។​មិន​មាន​ទាហាន​ថៃ​ណា​ម្នាក់​ស្លាប់​ឬ​រងរបួស​ពី​ការ​ប៉ះទង្គិច​គ្នា​នេះ​ទេ​តែ​កាលពី​ព្រឹក​ថ្ងៃ​ព្រហស្បតិ៍​យោធា​ថៃ​បាន​រក​ឃើញ​ជនសង្ស័យ​ជា​ពួក​លួច​ដឹក​​ជញ្ជូន​ថ្នាំញៀន​១៥​នាក់​ស្លាប់​នៅ​កន្លែង​ផ្ទុះអាវុធ​និង​រកឃើញ​សាក់​កាដូ​ចំនួន​២៩​ផ្ទុក​ថ្នាំញៀន​មេតំ​ហ្វេ​តា​មីន​ពេញៗ​។​

​អាជ្ញាធរ​កំពុងធ្វើការ​ស៊ើបអង្កេត​ថា​ជនសង្ស័យ​ទាំងនេះ​បាន​នាំ​ថ្នាំញៀន​មក​ពី​មី​យ៉ាន់​ម៉ា​ឬ​យ៉ាងណា ទោះជា​យ៉ាងណា​កន្លែង​ផ្ទុះ​អាវុធ​នេះ​ជា​ផ្លូវ​ដឹកជញ្ជូន​ថ្នាំញៀន​ដ៏​សាមញ្ញ​មួយ​សំ​រាប់ការ​លួច​ដឹក​ជញ្ជូន​ថ្នាំ​​ញៀន​មកពី​ខាង​មី​យ៉ាន់​ម៉ា​ចូល​ថៃ​។​

​ចំនួន​ថ្នាំញៀន​ដែល​រឹបអូស​បាន​មាន​ចំនួន​ប៉ុន្មាន​នៅ​មិន​ទាន់​បញ្ចេញ​អោយដឹង​ភ្លាម​នៅ​ឡើយ និង​ក្រុមការងារ​ក៏​មិន​បាន​បញ្ជាក់ថា​តើ​មាន​ជនសង្ស័យ​ប៉ុន្មាន​នាក់​បាន​រត់​គេចខ្លួន​រួច​៕

​ទាហាន​ថៃ​ចុះ​ឆែកឆេរ​និង​ស្វែងរក​ក្នុងព្រៃ កន្លែង​ដែល​មាន​ការប៉ះទង្គិច​គ្នា​កាលពី​យប់​ថ្ងៃ​ពុធ ដោយ​មាន​រកឃើញ​សាកសព​ជនសង្ស័យ​ជាមួយនឹង​ថ្នាំញៀន​ជាច្រើន​សាក់​កាដូ​នៅក្បែរ​ព្រំដែន​មី​យ៉ាន់​ម៉ា​