ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រុស្ស៊ី​បាន​ដោះលែង​តារា​បាល់បោះ​ក្របខណ្ឌ WNBA កីឡា​ការិនី ប្រ៊ីត​នី ហ្គ្រី​ណឺ (Brittney Griner)​កាលពី​ថ្ងៃ​ព្រហស្បតិ៍​ទី​៨​ធ្នូ​ក្នុង​ការដោះដូរ​អ្នកទោស​ដ៏​​ល្បី​មួយ ខណៈ​សហរដ្ឋ​អាម៉េរិក​បាន​ដោះលែង​ឈ្មួញ​អាវុធ​រុស្ស៊ី​ដ៏​ល្បី​អសោច​ឈ្មោះ វិកទ័រ បោត (Viktor Bout) ។ ប៉ុន្តែ​អាម៉េរិក​បាន​បរាជ័យ​ក្នុង​ការផ្តល់​សេរីភាព​សម្រាប់​ជនជាតិ​អាម៉េរិក​ម្នាក់​ទៀត​គឺ​លោក ផូល វេ​លែន (Paul Whelan) ដែល​រុស្ស៊ី​ដាក់​ពន្ធនាគារ​ជិត​បួន​ឆ្នាំ​។​

​កីឡា​ការិនី ប្រ៊ីត​នី ហ្គ្រី​ណឺ ត្រូវបាន​ដោះលែង​កាលពី​ថ្ងៃ​ព្រហស្បតិ៍​

​កិច្ចព្រមព្រៀង​នេះ ដែល​ធ្វើ​ជា​លើក​ទី​ពីរ​ក្នុង​រយៈពេល​ប្រាំបី​ខែ​ចំ​ពេល​មាន​ភាព​តានតឹង​ជុំវិញ​ការឈ្លានពាន​របស់​រុស្ស៊ី​លើ​អ៊ុយ​ក្រែន​នោះ​ធានាបាន​នូវ​ការ​ដោះលែង​អ្នកទោ​ស​អាម៉េរិក​លេចធ្លោ​បំផុត​​ដែល​ត្រូវបាន​ឃុំខ្លួន​នៅ​បរទេស និង​សម្រេចបាន​នូវ​គោលដៅ​កំពូល​សម្រាប់​ប្រធានាធិបតី ចូ បៃ​ដិន​។ ប៉ុន្តែ​វា​បាន​ពាំនាំ​មក​នូវ​អ្វី​ដែល​ក្រុមមន្ត្រី​អាម៉េរិក​ទទួលស្គាល់ថា​ជា​ការបង់​តម្លៃ​ដ៏​ធ្ងន់​។​

​លោកបៃ​ដិនបាន​និយាយ​ពីសេត​វិមាន កន្លែង​ដែល​គាត់​ត្រូវបាន​អមដោយ​ភរិយា​របស់​នាង​ហ្គ្រី​ណឺ (​ស្រឡាញ់​ភេទ​ដូចគ្នា​) គឺ​នាង ឆឺ​រែល (Cherelle)​និង ក្រុមមន្ត្រី​រដ្ឋបាល យ៉ាង​ដូច្នេះ​ថា “​នាង​មាន​សុវត្ថិភាព នាង​នៅ​លើ​យន្តហោះ នាង​កំពុង​ធ្វើដំណើរ​មក​ផ្ទះ​”​។​

​ការអនុញ្ញាត​របស់​បៃ​ដិន​ឱ្យ​ដោះ​លែងបោត ដែល​ជា​ឧក្រិដ្ឋជន​រុស្ស៊ី​ធ្លាប់​មាន​រហស្សនាម​ថា “​ឈ្មួញ​មជ្ជុរាជ​” បាន​គូសបញ្ជាក់​ពី​ភាព​បន្ទាន់​យ៉ាងខ្លាំង​ដែល​រដ្ឋបាល​របស់​គាត់​កំពុង​ប្រឈមមុខ​ដើម្បី​​នាំ​នាង​ហ្គ្រី​ណឺមក​ផ្ទះ​វិញ ជាពិសេស​បន្ទាប់ពី​សេចក្តីសម្រេច​អំពី​រឿង​ក្តី​ព្រហ្មទណ្ឌ​ថ្មីៗ​នេះ​របស់​នាង​លើ​ការចោទប្រកាន់​អំពី​គ្រឿងញៀន និង​ការផ្ទេរ​នាង​ទៅកាន់​កន្លែង​ឃុំឃាំង​ដាច់ស្រយាល​។ នាង​ហ្គ្រី​ណឺ ដែល​ធ្លាប់​លេង​បាល់បោះ​ក្នុងប្រទេស​រុស្ស៊ី​ផង​ដែរ​នោះ ត្រូវបាន​ចាប់ខ្លួន​នៅ​អាកាសយានដ្ឋាន​នៅ​ទីនោះ បន្ទាប់ពី​អាជ្ញាធរ​រុស្ស៊ី​បាន​និយាយថា នាង​បាន​កាន់​បំពង់​ជក់​មួយ​ជាមួយ​ប្រេង​កញ្ឆា​។​

​ក្រសួងការបរទេស​រុស្ស៊ី​បាន​បញ្ជាក់​ពី​ការដោះដូរ​នេះ ដោយ​និយាយ​នៅក្នុង​សេចក្តីថ្លែងការណ៍​មួយ​តាមរយៈ​ទីភ្នាក់ងារ​សារព័ត៌មាន​រុស្ស៊ី​នានា​ថា ការដោះដូរ​បាន​ធ្វើឡើង​នៅក្នុង​ទីក្រុង​អា​ប៊ូ​ដា​ប៊ី (Abu Dhabi)​ហើយ​ថា បោតបាន​ហោះ​មក​ស្រុក​វិញ​ហើយ​។ ប្រព័ន្ធ​ផ្សព្វផ្សាយ​រុស្ស៊ី​បានបង្ហាញ​នាង​ហ្គ្រី​ណឺ​ដើរចេញ​ពី​យន្តហោះ​រុស្ស៊ី​ក្នុង​ទីក្រុង​អា​ប៊ូ​ដា​ប៊ី ជា​កន្លែង​ដែល​នាង​ត្រូវបាន​ស្វាគមន៍​ដោយ​មន្ត្រី​អាម៉េរិក​។ ជនជាតិ​រុស្ស៊ី​ពីរ​នាក់​បាន​ស្វាគមន៍​បោត​ដោយ​ការឱប​៕

វិកទ័រ បោត