​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ លោក​បាន​ព្យាយាម​បន្លំ​ខ្លួន​ឯង​ជា​ថៅកែ​ក្រុមហ៊ុន​ដឹកជញ្ជូន​តាម​ផ្លូវអាកាស ដែល​ដឹក​កង​រក្សាសន្តិភាព​រប​ស់​អង្គការ​សហប្រជាជាតិ​នៅ​ជុំវិញ​ទ្វីបអាហ្វ្រិក ជា​កន្លែង​ដែល​គាត់​បាន​ថតរូប​សត្វព្រៃ ប៉ុន្តែ​គាត់​មិន​ដែល​បរិភោគ​សាច់​ទេ​ក្នុងនាម​ជា​អ្នក​ហូប​បួស​។​

​ទោះយ៉ាងណា ចំពោះ​សេវាកម្ម​សន្តិសុខ​លោកខាងលិច​វិញ គាត់​គឺជា “​ឈ្មួញ​មជ្ជុរាជ​” ជា​អ្នក​ជួញដូរ​អាវុធ​ឯកជន​ដ៏​ធំ​បំផុត​របស់​ពិភពលោក​ដែល​គាំទ្រ​ដោយ​លោកពូ​ទីន​និង​ជា​អ្នកទទួលខុសត្រូវ​ចំពោះ​​ការស្លាប់​និង​ការបំផ្លិចបំផ្លាញ​ដល់​មនុស្ស​រាប់ពាន់​នាក់​។​

​ហើយ​ចំពោះ​ហូលីវូដ គាត់​គឺជា​សាច់រឿង​ដែល​លក់​សំបុត្រ​ដាច់​បំផុត ពោល​ជាការ​បំផុសគំនិត​សម្រាប់​តួឯក ដែល​សម្តែង​ដោយ​លោក នី​កូឡាស ខេ​ច (Nicholas Cage) ក្នុង​រឿង Lord of War ដែល​កើប​លុយ​បាន ១០០ លាន​ដុល្លារ​ក្នុង​ការ​ដាក់​បញ្ចាំង​ទូទាំង​ពិភពលោក​។​

​លោក វី​កទ័រ បោត (Viktor Bout) អាយុ ៥៥ ឆ្នាំ​បាន​ជាប់អន្ទាក់​របស់​រដ្ឋបាល​គ្រប់គ្រ​ង​គ្រឿងញៀន (DEA)​នៅក្នុង​ប្រតិបត្តិការ​ដ៏​ស្មុគស្មាញ​មួយ​ក្នុង​ឆ្នាំ ២០០៨​ដែល​ក្នុងនោះ​គាត់​គិតថា​​គាត់​កំពុង​លក់​អាវុធ​ឱ្យទៅ​ពួក​ឧទ្ទាម FARC របស់​កូឡុំប៊ី​ដើម្បី​បាញ់ទម្លាក់​យន្តហោះ​ដឹក​អ្នកដំណើ​ររបស់​អាម៉េរិ​ក​។​

​ឥឡូវនេះ លោកបៃ​ដិនបាន​ដោះលែង​គាត់យ៉ាង​ចម្រូងចម្រាស​ក្នុង​ការដោះដូរ​អ្នកទោ​សស​ម្រាប់​តារា​បាល់បោះ WNBA នាង ប្រ៊ីត​នី ហ្គ្រី​ណឺ (Brittney Griner)​។​

​លោក​បោតបាន​ចំណាយពេល ១២ ឆ្នាំ​ចុងក្រោយ​នៅក្នុង​ពន្ធនាគារ​សហព័ន្ធ​នៅ​ទីក្រុង​ម៉ា​រៀន (Marion) រដ្ឋ​អ៊ី​ល​លី​នណ​យ (Illinois)​។ លោក​នៅ​សល់​ទោស​ជាប់គុក ១៣ ឆ្នាំ​ទៀត​។​

​ក្នុង​អំឡុងពេល​នៃ​ការជួញដូរ​អាវុធ​អាជីព​របស់​គាត់ បោតបាន​ក្លាយ​ជា​ល្បីល្បាញ​សម្រាប់ឆន្ទៈ​របស់​គាត់​ក្នុងការ​បំពាក់អាវុធ​ដល់​ស្ទើរ​គ្រប់គ្នា រាប់​ចាប់ពី​ក្រុម​អាល់​កៃ​ដា​រហូត​ដល់​កងជីវពល​នៅ​សៀ​រ៉ា​ឡេ​អូន​រហូត​ដល់​របប​លី​បេរី​យ៉ាដ៏​ឃោរឃៅ​របស់លោក ឆា​ល ថៃល័​រ (Charles Taylor) និង​រហូត​ដល់​ពួក​តា​លី​បង់​។​

​ជំនួញ​របស់​បោតបាន​ជួយ​បំផុសគំនិត​ឱ្យគេ​ផលិត​ខ្សែភាពយន្ត​ហូលីវូដ​ឆ្នាំ ២០០៥ រឿង Lord of War ដែល​សម្តែង​ដោយ​លោក នី​កូឡាស ខេ​ច ដែល​ផ្អែកលើ​ជីវិត​ពិត​របស់បោត​។ នៅក្នុង​ខ្សែភាពយន្ត​នេះ លោក​ខេ​ច​ដើរតួ​ជា យូ​រី អ័​រឡូវ (Yuri Orlov)​។​

​ក្នុងចំណោម​ទង្វើ​ដ៏​អាក្រក់​បំផុត​របស់បោត​គឺ​ការលួចអាវុធ​តម្លៃ ៣២ ពាន់​លាន​ដុល្លារ​ពី​អ៊ុយ​ក្រែន​នៅ​ចន្លោះ​ឆ្នាំ ១៩៩២ និង ១៩៩៨​។ លោក​បោតក៏​មាន​កងទ័ពអាកា​ស​ផ្ទាល់ខ្លួន​ផង​ដែរ​ជាមួយនឹង​យន្តហោះ​ប្រហែល ៦០ គ្រឿង​។​

​ក្នុង​ខែសីហា វេបសាយ DailyMail.com បាន​លាតត្រដាង​ថា បោតបាន​ក្លាយ​ជា​ផ្នែក​មួ​យ​នៃ​ការចរចា​ដើម្បី​នាំ​យក​នាង​ហ្គ្រី​ណឺមក​ផ្ទះ​វិញ​។ ក្រសួងការបរទេស​រុស្ស៊ី​បាន​បញ្ជាក់​ពី​ការដោះដូរ​នេះ ដោយ​និយាយ​នៅក្នុង​សេចក្តីថ្លែងការណ៍​មួយ​ថា ការដោះដូរ​បាន​ធ្វើឡើង​នៅក្នុង​ទីក្រុង​អា​ប៊ូ​ដា​ប៊ី (Abu-Dhabi) ហើយ​ថា បោតបាន​ជិះយន្តហោះ​ទៅផ្ទះ​វិញ​ដូច​គ្នា​៕

លោក វី​កទ័រ បោត នៅសល់​១៣​ឆ្នាំ​ទៀត​ទើប​អាច​ចេញពី​គុក​អាម៉េរិក តែ​ត្រូវបាន​យក​មក​ដោះ​ដូរ​ជាមួយ​នាង​ហ្គ្រី​ណឺ​