​ប្រែ​សម្រួល : កញ្ញា​ដា​លី​ស (VNExpress) ៖ សមាគម​បាល់ទាត់​អង់គ្លេស​(FA) បាន​និយាយ​កាលពី​ថ្ងៃ​ព្រហស្បតិ៍​ទី​៨​ធ្នូ​ថា កីឡាករ រ៉ា​ហ៊ីម ស្ទើ​លីង (Raheem Sterling)​របស់​អង់គ្លេស​ត្រឡប់​​ទៅ​ជំរំ​វើល​ខាប់​របស់​ពួកគេ​វិញ​ទាន់​ពេល​សម្រាប់​ការប្រកួត​វគ្គ ១/៤ ផ្តាច់ព្រ័ត្រ​ជាមួយនឹង​បារាំង​នៅ​ចុង​សប្តាហ៍​នេះ​បន្ទាប់ពី​ខ្សែប្រយុទ្ធ​រូបនេះ​បាន​ត្រឡប់ទៅផ្ទះ​វិញ​បន្ទាប់ពី​មាន​ចោរប្លន់​នៅឯ​គេ​​ហ​ដ្ឋា​ន​របស់​គ្រួសារ​គាត់​។​

​រ៉ា​ហ៊ីម ស្ទើ​លីង ចេញដំណើរ​ពី​អង់គ្លេស​មក​កាន់​កាតា​វិញ​

​ស្ទើ​លីង​មិនបាន​ចូលរួម​ក្នុង​ជ័យជម្នះ ៣-០ លើ​សេណេ​ហ្គាល់​ក្នុង​វគ្គ ១៦ ក្រុម​ចុង​ក្រោយ​ឡើយ ដោយ​ចាកចេញ​ពី​កាតា​កាលពី​ចុង​សប្តាហ៍​មុន​ដើម្បី​ត្រឡប់​ទៅ​ជួប​ក្រុម​គ្រួសារ​វិញ​។​

FA បាន​និយាយ​នៅក្នុង​សេចក្តីថ្លែងការណ៍​មួយ​ថា “​ខ្សែ​ប្រយុទ្ធ Chelsea បាន​ចាកចេញ​ជា​បណ្ដោះអាសន្ន​ដើម្បី​ដោះស្រាយ​បញ្ហា​គ្រួសារ​ប៉ុន្តែ​ឥឡូវ​នេះ​ត្រូវ​គេ​រំពឹងថា​នឹង​ចូលរួម​ក្រុម​ឡើង​វិញ​​នៅ​កីឡដ្ឋាន Al Wakrah នៅ​ថ្ងៃ​សុក្រ មុន​ការប្រកួត​វគ្គ ១/៤ ផ្តាច់ព្រ័ត្រ​ជាមួយ​បារាំង​”​។​

​អង់គ្លេស​នឹង​ប្រកួត​ជាមួយ​បារាំង​នៅ​កីឡដ្ឋាន Al Bayt នៅ​ថ្ងៃ​សៅរ៍ ដោយ​រំពឹង​ផ្តួល​ម្ចាស់​ការពារ​តំណែង​ជើងឯក​មួយ​នេះ និង​ឡើងទៅ​វគ្គ​ពាក់កណ្តាល​ផ្តាច់ព្រ័ត្រ​ម្តង​ទៀត​បន្ទាប់​ពី​ពួក​​គេ​បាន​ធ្លាក់​ក្នុង​វគ្គ​៤​ចុង​ក្រោយ​នៅ​រុស្ស៊ី​កាលពី​បួន​ឆ្នាំ​មុន​។​

​ស្ទើ​លីង​បាន​បង្ហាញ​ខ្លួន​ពីរលើក​ក្នុង​វគ្គ​ចែក​ពូ​ល ដោយ​រក​បាន​មួយ​គ្រាប់ និង​បញ្ជូន​បាល់​ឱ្យ​មិត្ត​រួម​ក្រុម​ស៊ុត​មួយ​គ្រាប់​ក្នុង​ជ័យជម្នះ ៦-២ លើ​អ៊ីរ៉ង់​ក្នុង​ការប្រកួត​បើកឆាក​របស់​អង់គ្លេស​។​

​ប៉ុន្តែ​រូបគេ​នឹង​ប្រជែង​យក​កន្លែង​មួយ​ក្នុង​ជម្រើស​ដំបូង​ជា​មួយ ប៊ូ​កាយ៉ូ សា​កា (Bukayo Saka) និង ម៉ាកូ​ស រ៉ា​ស្វត (Marcus Rashford) ដែល​ស៊ុត​បញ្ចូល​ទី​បាន​បី​គ្រាប់​នៅ​កាតា​ក៏ដូចជា ហ្វីល ហ្វូ​ដិន (Phil Foden) ផងដែរ​។​

​ប្រសិនបើ​អង់គ្លេស​ឆ្លង​ផុត នោះ​ពួកគេ​នឹង​លេង​វគ្គ​៤​ក្រុម​ចុង​ក្រោយ​ជា​មួយ​ព័រ​ទុយ​ហ្គាល់​ឬ​ម៉ារ៉ុក​៕

​ស្ទើ​លីង​ត្រឡប់​មក​ជំរំ​ហ្វឹកហាត់​របស់​អង់គ្លេស​មុន​ជំនួប​វគ្គ​៨​ក្រុម​ចុង​ក្រោយ​ជា​មួយ​បារាំង