​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ នៅ​ថ្ងៃ​សុក្រ​ទី​៩​ធ្នូ​នេះ​ចិន​បាន​ប្រកាស​ពី​ការប្រគល់​យន្តហោះ​ដឹក​អ្នកដំណើរ​ថ្មី​ដែល​ផលិត​ក្នុងស្រុក​ជា​លើកដំបូង​ដោយ​យន្តហោះ​នេះ​ត្រូវ​គេ​រំពឹងថា​នឹង​បង្ហាញ​ខ្លួន​ក្នុង​វិស័យ​ដឹ​ជញ្ជូន​ពាណិជ្ជកម្ម​ជា​លើកដំបូង​នៅ​ដើម​ឆ្នាំ​ក្រោយ​។​

​រដ្ឋាភិបាល​ក្រុង​ប៉េកាំង​សង្ឃឹមថា យន្តហោះ​ពាណិជ្ជកម្ម C919 នឹង​ប្រកួតប្រជែង​ជាមួយ​យន្តហោះ​ម៉ូ​ដែល​បរទេស​ដូចជា Boeing 737 MAX និង Airbus A320​ទោះបីជា​គ្រឿងបន្លាស់​(​គ្រឿង​​បង្គំ​)​ភាគច្រើន​របស់​វា​មាន​ប្រភព​មក​ពី​បរទេស​ក៏ដោយ​។​

​ប្រព័ន្ធ​ផ្សព្វផ្សាយ​រដ្ឋ​បាន​រាយការណ៍​ថា ម៉ូ​ដែល​ទី​មួយ​នៃ​យន្តហោះ​តួ​តូច ដែល​ផ្ទុក​អ្នកដំណើរ ១៦៤ នាក់ ត្រូវបាន​ប្រគល់​ជា​ផ្លូវការ​ឱ្យទៅ​ក្រុមហ៊ុន​អាកាសចរណ៍ China Eastern​ក្នុង​ពិធី​មួយ​នៅ​​ឯ​អាកាសយានដ្ឋាន​ក្នុង​ទីក្រុង​សៀង​ហៃ​។​

​ទូរទស្សន៍​រដ្ឋ CCTV បាន​និយាយថា ការប្រគល់​នេះ​កត់សម្គាល់​នូវ “​ព្រឹត្តិការណ៍​ដ៏​សំខាន់​” នៅក្នុង​ដំណើរ​នៃ​ឧស្សាហកម្ម​យន្តហោះ​របស់​ចិន​។​

​វីដេអូ​ដែល​ចាក់​ផ្សាយ​នៅ​ថ្ងៃ​សុក្រ​នេះ​ដោយ CCTV បានបង្ហាញ​យន្តហោះ​នេះ​សរសេរ​អក្សរ China Eastern ពីលើ ហើយ​បាន​បង្ហាញ​ឱ្យឃើញ​ផ្នែក​ខាង​ក្នុងនៃ​កាប៊ីន​យន្តហោះ​។​

​ទូរទស្សន៍ CCTV បាន​រាយការណ៍​ថា ក្រុមហ៊ុន​យន្តហោះ​ពាណិជ្ជកម្ម​ចិន (COMAC) ដែល​ជា​របស់​រដ្ឋ បាន​ហុច​សោ​យន្តហោះ C919 ដំបូងបង្អស់​របស់​ពិភពលោក​ដល់​ក្រុមហ៊ុន​អាកាសចរណ៍​ខាងលើ​។​

​ក្រុមហ៊ុន COMAC បាន​និយាយ​នៅក្នុង​កម្មវិធី​តាំង​ពិ​ព័​រណ៌យន្ត​ហោះ​កាលពី​ខែ​មុន​ថា ខ្លួន​បាន​ទទួល​ការបញ្ជា​ទិញ​សម្រាប់​យន្តហោះ C919 ចំនួន​៣០០​គ្រឿង ប៉ុន្តែ​មិន​បាន​បញ្ជាក់​ពី​ថា​តើ​ការបញ្ជាទិញ​ទាំងនោះ​ត្រូវ​បាន​បញ្ជាក់​ពេញលេញ​ឬ​យ៉ាងណា ហើយ​មិន​បាន​ផ្តល់​ព័ត៌មាន​លម្អិត​អំពី​តម្លៃ​នៃ​កិច្ចព្រមព្រៀង​ឬ​កាលបរិច្ឆេទ​ចែកចាយ​នោះទេ​៕

​យន្តហោះ C919 ទី​មួយ​ត្រូវបាន​ប្រគល់ជូន​ក្រុមហ៊ុន​អាកាសចរណ៍ China Eastern នៅ​ថ្ងៃ​សុក្រ​នេះ