ដោយៈ ដកស្រង់​ពី​វចនានុក្រម​សម្តេច​សង្ឃរាជ ជួន ណាត​

​ខាត់​

​កិរិយាសព្ទ​

​ដុស​រំលីង​ឲ្យ​ស្អាត ដោយ​គ្រឿង​ខាត់​
​ខាត់តុ​, ខាត់ទូ ជាដើម ។​

​នាមសព្ទ​

​ឈ្មោះ​ផ្តិល​មួយ​ប្រភេទ ធ្វើ​ដោយ​លោហធាតុ កាលបើ​ខាត់ ឡើង​សម្បុរ​ភ្លឺ​
​ផ្តិលខាត់ ។​

​ខាន់បៀត​

នាមសព្ទ​

​ឈ្មោះ​រោគ​មួយ​យ៉ាង កើត​បៀត​បំពង់ក ធ្វើ​ឲ្យ​លំបាក​លេបបាយ លេបទឹក​
​រោគ​ខាន់បៀត ។​

​ខាន់លឿង​

​នាមសព្ទ​

​ឈ្មោះ​រោគ​ដែល​បណ្តាល​ឲ្យ​សាច់មាន​សម្បុរ​លឿង​
​រោគ​ខាន់លឿង ។​

ខាន់ស្លាក់​

​នាមសព្ទ​

​ឈ្មោះ​រោគ​មួយ​យ៉ាង​កើត​កណ្តាល​-​ក ធ្វើ​ឲ្យ​លេបបាយ លេបទឹក​ពុំរួច​
​រោគ​ខាន់ស្លាក់ ។​

​ខាបខា​

​នាមសព្ទ​

​ឈ្មោះ​ប្រទាល​មួយ​ប្រភេទ មាន​ដើម​មូលៗ ឈរ​ត្រង់ៗ ដើម​ខ្លីៗ ល្មម មាន​ជ័រ​ស​, ខ្លះ​មាន​ស្លឹក​សព​ពាលៗ​, កាច់​ដាំ​ងាយ​រស់​, គេ​ច្រើន​កាច់​ដាំ​ធ្វើជា​របង​ទាបៗ ក្នុង​សួនច្បារ ឬ ដាំ​ក្នុង​ផើង​ប្រើ​ជា​គ្រឿង​តាំង​ក៏បាន​
​ប្រទាល​ខាបខា​ងាយ​ដាំ​ណាស់ ។​