ដោយៈ ដកស្រង់​ពី​វចនានុក្រម​សម្តេច​សង្ឃរាជ ជួន ណាត​

​វិញ្ញាសា​

(​វិញ​-​ញា​-​សា​)

នាមសព្ទ​

(​បា​. វិ​ញ្ញា “​កិរិយា​ដឹង​ច្បាស់​, ការយល់​ជាក់លាក់​” + អាសា “​បំណង​, ប្រាថ្នា​” ) បំណង​ដើម្បី​ដឹង​ឲ្យ​ច្បាស់លាស់​, ការពិសោធ​, ការ​ល្បង​សាកមើល​នូវ​របស់​អ្វីមួយ​; ក្រដាស​អក្សរ​ផ្ដិត​ពុម្ព​ដែល​ត្រូវ​ពិនិត្យ​កែ​
​ពិនិត្យ​វិញ្ញាសា​, កែ​វិញ្ញាសា​ពុម្ព​; ការងារ​ដែល​បំពេញ​ជា​លាយ​ល័ក្ខណ៍​អក្សរ ឬ​ផ្ទាល់មាត់​ក្នុងការ​ប្រឡង : វិញ្ញាសាសរសេរ​, វិញ្ញាសា​សួរ​ផ្ទាល់មាត់​; សន្លឹក​ក្រដាស​ផែនទី ឬ​រូបថត​ដែល​ផ្តិត​ចម្លង​ចេញពី​គំរូ​ដើម ។ ( បារ​. épreuve ) ។​

​វិសោធន​

(–​ធៈនៈ​)

​នាមសព្ទ​

( បា​. វិសោធន​; សំ​. វិ​ឝោ​ធន ) ការសម្អាត​, ជម្រះ​, រម្លីង​សេចក្ដី​; ការ​ល្បងមើល​, ការពិនិត្យ​ឬ​សាកមើល​ឲ្យ​ឃើញ​ពិត ( ម​. ព​. ពិសោធ​, ពិសោធន៍ ) ។ វិសោធនការណ៍ ហេតុ​នៃ​ការពិសោធន៍​, ហេតុដែល​ត្រូវ​ពិសោធន៍ ។ វិសោធនកិច្ច កិច្ច​ដែល​ត្រូវ​ពិនិត្យ​, ដែល​ត្រូវ​សាកមើល​ឲ្យ​ឃើញ​ពិត ។ វិសោធនភាព ភាវៈ​ឬ​បែប​ពិសោធន៍ ។ ល ។​

​វីមង្សា​

(–​ម័​ង​-​សា​)

​នាមសព្ទ​

( បា​. វីមំសា​; សំ​. វី​មាំ​សា អ​.​ថ​. –​ម៉ា​ម​-​សា ) ការពិចារណា​ដោយ​ល្អិត​; ប្រាជ្ញា​សម្រាប់​ស្រាល់​ជ្រើសរើស​រក​ឲ្យ​ឃើញ​ការណ៍​ពិត​, ការពិសោធ​, ការ​ល្បងមើល​; ការប្រឡង ។ វីមំសាវិជ្ជា វិជ្ជា​ដែល​កើត​អំពី​ការពិចារណា​ឈ្លេចឈ្លី​រក ឬ​វិជ្ជា​ដែល​សម្រេច​ដោយ​ការប្រឡង​ហើយ ។​

​សាក​

​កិរិយាសព្ទ​

​ចម្លង​យកបែប​ឲ្យ​ដូច​ភាព​ដើម​
​សាក​យក​ក្បាច់​ប្រាសាទបន្ទាយស្រី ។​
​ល្បងមើល​ឲ្យ​ដឹង​, ពិសោធ​មើល​
​សាកមើល​ឲ្យ​ដឹង​សិន​, យក​របស់​នុះ មក​សាក​គ្នា​មើល​, ជាង​សាក​មាស ។​

​កិរិយាសព្ទ​

​កាត់​សំបក​មែកឈើ​ក្រឡឹង​ជុំវិញ​ប្រវែង​ប្រហែល ១ ធ្នាប់​ឬ​យ៉ាង​វែង​ត្រឹម ២ ធ្នាប់ ( លៃ​តាម​ទំហំ​មែកឈើ ) ហើយ​យក​ស្រកីដូង​ខ្ចោប​ដី​ក្ដោប​រុំ​ព័ទ្ធជុំវិញ ចងរឹត​ចុង​របុំ​ខាងក្រោម​ខាងលើ​ឲ្យ​តឹង​ណែន​, ចោះ​គូទ​បំពង់​ស៊ក​កំណាត់សំពត់​ដែល​ត្របាញ់​ឲ្យ​មូល ដាក់​ទឹក​ក្នុង​បំពង់​ចង​បន្តោក​ពីលើ ឲ្យ​ទឹក​ស្រក់​មកលើ​របុំ​ដី ឲ្យ​ដី​សើម​ជានិច្ច​កុំ​ឲ្យ​ស្ងួត​, លុះដល់​មែកឈើ​នោះ​ដុះ​ឫស​ចាក់​ទម្លុះ​របុំ​ស្រកីដូង​ចេញមកក្រៅ ឃើញថា​ឫស​នោះ​ចាស់​ល្មម​កាត់​បាន​ហើយ អ្នក​សាក​ត្រូវ​កាត់ផ្ដាច់​យកមក​កប់​នៅ​ដី​សើម​, ត្រូវ​បំប៉ន​ឲ្យ​ដី​នោះ​សើម​ជានិច្ច គឺ​ផ្សាំ​ឲ្យ​មែក​សាក​រស់​លាស់​ស្រួល​ហើយ​សឹម​យកទៅ​ដាំ​; ធ្វើបែបនេះ​ហៅថា សាក គឺ​សាក​មែកឈើ​ឲ្យ​ដុះ​ឫស ។ មួយបែប​ផ្សេងទៀត បង្កប់​មែក​ឬ​ដើមឈើ​ពួក​ខ្លះ​មាន​ដើម​ម្លិះ​ជាដើម ដែល​ងាយ​ដុស​ឫស​ឲ្យ​កប់​ទៅក្នុង​ដី លុះ​ឈើ​នោះ​ដុះ​ឫស​ហើយ ក៏​កាត់​យកមក​ផ្សាំ​ឬ​ដាំ​សម្រេច​តែម្ដង​, ធ្វើបែបនេះ​ក៏​ហៅ សាក ដែរ ( បារ​. Marcotter )
​សាក​មែក​ល្មុត​, សាក​មែក​សែដា​, សាក​ដើម​ម្លិះលា … ( ម​. ព​. បំបៅ និង ផ្សាំ ទៀតផង​)​។​

នាមសព្ទ​

( ស​. សរសេរ ទ្រាក អ​. ថ​. សាក ) រូប​, រាង​, រូបរាង នៃ​មនុស្ស​សត្វ​ដែល​ស្លាប់​ហើយ ( ម​. ព​. តាយសាក ផង ) ។ សាកខ្មោច រូប​បុគ្គល​ស្លាប់ ។ សាក​ឆ្អឹង រាង​ឆ្អឹង ។ សាកសព រូបរាង​សព ។ សាកអសុភ រូប​អសុភ ( រូប​មនុស្ស​សត្វ​ដែល​ស្លាប់​ស្អុយ ) ។​

​ស្ទង់​

​កិរិយាសព្ទ​

​ដាក់​គ្រឿង​វាស់​ឬ​គ្រឿង​ពិសោធ គ្រឿង​លៃ​ឲ្យ​ដឹង​ជម្រៅ​, ​ឲ្យ​ដឹង​ភាគ​ខ្ព​ស់ទាប​, ​ឲ្យ​ដឹង​ទម្ងន់​; លៃ​ប្រមាណ​មើល​
​ស្ទង​ទឹក​, ​ស្ទង់​ភាគ​ផ្ទៃដី​, ​ដាក់​កែវស្ទង់​ឲ្យ​ដឹង​ខ្ពស់​ទាប​, ​ស្ទង់កម្ពស់ភ្នំ ។​
​លៃ​ប្រមាណ​មើល ឬ ស្មាន​មើល​ឲ្យ​ដឹង​, ​ដង្វិន​មើល​
​ស្ទង់ចិត្ត​, ស្ទង់ប្រាជ្ញា​, ស្ទង់ចំណេះមើល ។ ស្ទាបស្ទង់ ( ម​. ​ព​. ស្ទាប ) ។​