​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋបាល​លោកបៃ​ដិន​កំពុង​ចោទប្រកាន់​រុស្ស៊ី​ថា​ងាក​ទៅរក​ការផ្តល់​ជំនួយ​យោធា​កម្រិត​ខ្ពស់​ដល់​អ៊ីរ៉ង់ រួម​ទាំង​ប្រព័ន្ធ​ការពារ​ដែនអាកាស ឧទ្ធម្ភាគចក្រ​និង​យន្ត​​ហោះ​ចម្បាំង ដែល​ជា​ផ្នែក​មួយ​នៃ​ការពង្រឹង​កិច្ចសហប្រតិបត្តិកា​ររ​វា​ង​ប្រទេស​ទាំង​ពីរ ខណៈ​រដ្ឋាភិបាល​ក្រុងតេអេ​រ៉ង់​ផ្តល់​ដ្រូ​ន​ដើម្បី​គាំទ្រ​ការ​លុកលុយ​របស់​លោក​វ៉ា្ល​ឌី​មៀ ពូ​ទីន នៅ​អ៊ុ​យក្រែន​។​

​អ្នកនាំពាក្យ​ក្រុមប្រឹក្សាសន្តិសុខ​ជាតិ​សេត​វិមាន​លោក ច​ន កឺ​ប៊ី (John Kirby) កាលពី​ថ្ងៃ​សុក្រ​បាន​ដកស្រង់​ការវាយតម្លៃ​របស់​ទីភ្នាក់ងារ​ស៊ើបការណ៍​សម្ងាត់​អាម៉េរិក​សម្រាប់​ការចោទប្រកាន់​នេះ ដោយ​និយាយថា រុស្ស៊ី​កំពុង​ផ្តល់​ឱ្យ​អ៊ីរ៉ង់​នូវ “​កម្រិត​មិន​ធ្លាប់​មាន​ពីមុនមក​នៃ​ការគាំទ្រ​ផ្នែក​យោធា​និង​បច្ចេកទេស ដែល​កំពុង​ផ្លាស់​ប្តូរ​ទំនាក់ទំនង​របស់​ពួកគេ​ទៅ​ជា​ភាព​ជា​ដៃគូ​ការពារ​ពេញលេញ​”​។​

​លោក​កឺប៊ី​បាន​និយាយថា រុស្ស៊ី​និង​អ៊ីរ៉ង់​កំពុង​ពិចារណា​ដំឡើង​រោងចក្រ​ផលិត​ដ្រូ​ន​នៅក្នុង​ប្រទេស​រុស្ស៊ី​សម្រាប់​ជម្លោះ​អ៊ុ​យក្រែន ខណៈ​រុស្ស៊ី​កំពុង​បណ្តុះបណ្តាល​អាកាសយានិក​អ៊ីរ៉ង់​លើ​យន្តហោះ​ចម្បាំង Sukhoi Su-35 ហើយ​អ៊ីរ៉ង់​អាច​ទទួល​យន្តហោះ​ក្នុងឆ្នាំនេះ​។​

​លោក​កឺប៊ី​បាន​និយាយថា “​យន្តហោះ​ចម្បាំង​ទាំងនេះ​នឹង​ពង្រឹង​កម្លាំង​ទ័ពអាកាស​របស់​អ៊ីរ៉ង់​យ៉ាង​សំខាន់​ទាក់ទង​ទៅ​នឹង​ប្រទេស​ជិតខាង​ក្នុង​តំបន់​”​។​

​ការចោទប្រកាន់​របស់​សហរដ្ឋ​អាម៉េរិក​គឺជា​ផ្នែក​មួយ​នៃ​កិច្ចខិតខំ​ប្រឹងប្រែង​ដោយ​ចេតនា​របស់​អាម៉េរិក​ដើម្បី​ជំរុញ​ឱ្យ​រុស្ស៊ី​មាន​ភាព​ឯកោ​ជា​សកល​ក្នុងករណី​នេះ​គឺ​ផ្តោត​លើ​បណ្តា​ប្រទេស​អារ៉ាប់​​ដែល​មើលទៅ​នាំគ្នា​ទប់ទល់​នឹង​ភាព​ទុច្ចរិត​ក្នុង​តំបន់​របស់​អ៊ីរ៉ង់ តែ​មិន​ប្រកាន់​ជំហរ​រឹងមាំ​ប្រឆាំងនឹង​ការឈ្លានពាន​របស់​រុស្ស៊ី​លើ​អ៊ុ​យក្រែន​។​

​មុននេះ រដ្ឋបាល​លោកបៃ​ដិនបាន​ចោទប្រកាន់អា​រ៉ា​ប៊ីសា​អូឌីត​ថា​បាន​ចូល​ដៃ​ជាមួយ​រុស្ស៊ី​ក្នុង​ជម្លោះ​ដោយ​ដឹកនាំ​ការកាត់បន្ថយ​ការផលិត​ប្រេង​ដោយ​ក្រុម OPEC+ ដើម្បី​បង្កើន​តម្លៃ​ប្រេង​ដែលមាន​​សារៈសំខាន់​ក្នុង​ការផ្តល់​មូលនិធិ​ដល់​កិច្ចខិតខំ​ប្រឹងប្រែង​សង្គ្រាម​របស់​រដ្ឋាភិបាល​ក្រុង​មូ​ស្គូ​។ អា​រ៉ាប៊ីសាអូឌីត​និង​អ៊ីរ៉ង់​គឺ​ប្រឆាំង​គ្នា​ក្នុង​សង្គ្រាម​ដោយ​ក្រុម​តំណាង​របស់​គេ​អស់​រយៈពេល​ជាច្រើន​ឆ្នាំ​នៅ​​ក្នុងប្រទេស​យេ​ម៉ែន​៕

អ្នកនាំពាក្យ​ក្រុមប្រឹក្សាសន្តិសុខ​ជាតិ​សេត​វិមាន​លោក ច​ន កឺ​ប៊ី