​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ស្តេច​បាល់ទាត់​ប្រេ​ស៊ីល ប៉េ​ឡេ បាន​អបអរសាទរ​នី​ម៉ា​សម្រាប់​ការ​តាម​ស្មើ​កំណត់ត្រា​គ្រាប់​បាល់​ស៊ុត​បញ្ចូល​ទី​សម្រាប់​ជម្រើសជាតិ​របស់គាត់​កាលពី​ថ្ងៃ​សុក្រ​ហើយ​​បន្ទាប់មក​បាន​សម្តែង​ការសោកស្តាយ​សម្រាប់​កីឡាករ​រូបនេះ​ចំពោះ​ការ​ខ្ទាត​ចេញពី​វើល​ខា​ប់​។​

​ប៉េ​ឡេ ដែល​កំពុង​ដេក​នៅ​មន្ទីរពេទ្យ​ដើម្បី​ព្យាបាល​ការឆ្លង​មេរោគ​ផ្លូវដង្ហើម បាន​បង្ហោះ​សារ​របស់​គាត់​នៅលើ Instagram បន្ទាប់​ពីប្រេ​ស៊ីល​ចាញ់ក្រូ​អាស៊ី​ក្នុង​វគ្គ​១/៤​ផ្តាច់ព្រ័ត្រ​ក្នុងការ​ស៊ុត​បាល់​​ប៉េ​ណាល់​ទីនៅឯការ​ប្រកួត​នៅ​ប្រទេសកាតា​។​

​ប៉េ​ឡេ អាយុ ៨២ ឆ្នាំ​បាន​សរសេរថា “​ខ្ញុំ​បាន​ឃើញ​អ្នក​រីកចម្រើន ខ្ញុំ​លើក​ទឹកចិត្ត​អ្នក​ជា​រៀងរាល់ថ្ងៃ ហើយ​ទីបំផុត​ខ្ញុំ​អាច​អបអរសាទរ​អ្នក​សម្រាប់​ការឈាន​ដល់​ចំនួន​គ្រាប់​បាល់​ស្មើ​ខ្ញុំ​ជាមួយ​ប្រេ​ស៊ីល​។ យើង​ទាំង​ពីរ​ដឹងថា នេះ​គឺ​លើស​ពី​តួលេខ​ទៅទៀត​។ កាតព្វកិច្ច​ដ៏​ធំ​បំផុត​របស់​យើង​ក្នុងនាម​ជា​អត្ត​ពលិក​គឺ​ការ​បំផុសគំនិត​។ លើកទឹកចិត្ត​ដល់​មិត្ត​រួម​ក្រុម​របស់​យើង​នាពេល​បច្ចុប្បន្ន ក្មេងជំនាន់ក្រោយ និង​សំខាន់​ជាងនេះទៅទៀត អ្នក​ទាំងអស់​ដែល​ស្រឡាញ់​កីឡា​របស់​យើង​”​។​

​លោក​ប៉េឡេ​បាន​បន្ថែមថា “​គួរ​ឱ្យ​ស្តាយ នេះ​មិនមែន​ជា​ថ្ងៃ​រីករាយ​បំផុត​សម្រាប់​យើង​ទេ​។ កំណត់ត្រា​របស់ខ្ញុំ​ត្រូវបាន​បង្កើតឡើង​កាលពី​ជិត ៥០ ឆ្នាំមុន ហើយ​គ្មាន​នរណាម្នាក់​អាច​ចូល​ទៅកៀក​វា​បាន​ទេ​រហូត​មក​ទល់​ពេលនេះ​។ អ្នក​ទៅ​ដល់​ទីនោះ​ហើយ កូនប្រុស​។ នោះ​បង្ហាញ​ថា​តើ​សមិទ្ធផល​របស់​អ្នក​អស្ចារ្យ​កម្រិតណា​”​។​

​នី​ម៉ា​បាន​ស៊ុត​បញ្ចូល​ទី​តែ​មួយ​គ្រាប់​គត់​សម្រាប់ប្រេ​ស៊ីល​ទល់​នឹង​ក្រូ​អាស៊ី​នៅ​កីឡដ្ឋាន Education City ដែល​ផ្តល់ឱ្យ​គាត់​នូវ​គ្រាប់​ទី ៧៧ សម្រាប់​ក្រុម​ជម្រើស​ជាតិ​។ ក្រោយមក ក្រូ​អាស៊ី​បាន​តាម​ស្មើ​វិញ​និង​ឡើង​ទៅ​វគ្គ​ពាក់កណ្តាល​ផ្តាច់ព្រ័ត្រ ដោយ​ឈ្នះ​ការ​ស៊ុត​បាល់​បញ្ចូល​ទី ៤-២ បន្ទាប់​ពី​ស្មើ ១-១ ក្នុង ១២០ នាទី​។​

​នី​ម៉ា​យំ​ក្រោយ​ប្រេ​ស៊ីល​ធ្លាក់​ពីវើ​លខាប់

​ទន្ទឹមនេះ កីឡាករ​លូ​កា ម៉ូ​ឌ្រិ​ក (Luka Modric) អាយុ ៣៧ ឆ្នាំ​របស់​ក្រូ​អាស៊ី ដែល​គេ​យល់​ថា​អស់​សមត្ថភាព​ក្នុង​ការជួយ​ជម្រើសជាតិ​ហើយ​នោះ បែរ​ជា​ក្លាយ​ជា​តារា​រះ​ក្នុង​ក្រុម​តាម​រយៈ​ក្បាច់​ញាក់ ការ​ប៉ះ​សេ​ច្បាស់ៗ និង​ការគ្រប់គ្រង​បាល់​ដ៏​ឆ្លាត​វៃ​ដើម្បី​រក្សា​ស្ថានភាព​លើ​ទីលាន​ឱ្យ​ស្ងប់ស្ងាត់​ទៅ​តាម​ជំនោរ​សាច់​បាល់​របស់​ក្រូ​អាស៊ី​។

​ការគ្រប់គ្រង​ទាំងស្រុង​លើ​តំបន់​បម្រើ​បាន​ជួយ​ឱ្យ​ក្រូ​អាស៊ី​បញ្ចប់​ការលេង​ដ៏​ស៊ីចង្វាក់​របស់​ប្រេ​ស៊ីល និង​បាន​ទម្លាក់​ក្រុម​ដែល​គេ​រំពឹង​លើ​កពាន​ចេញ​ពីវើ​លខាប់​មួយនេះ​។

​គ្រូបង្វឹក​ក្រូ​អាស៊ី​លោក ស្លាត់​កូ ដា​លី​ក (Zlatko Dalic) បាន​និយាយថា “​វា​ពិតជា​ពិបាក​ណាស់​ក្នុង​ការស្វែងរក​នរណា​ម្នាក់​នៅ​អាយុ ៣៧ ឆ្នាំ​ជាមួយនឹង​សមត្ថភាព​លេង​បែប​នេះ​ជាមួយនឹង​​ភាពខ្លាំង​បែបនេះ​នៅពេល​ដែល​គាត់​លេង​ឱ្យ​ក្រុម Real Madrid និង​ក្រុម​ជម្រើស​ជាតិ ហើយ​លូ​កា ម៉ូ​ឌ្រិ​ក​បាន​បង្ហាញ​ពី​គុណភាព​របស់គាត់​។ នៅពេល​ដែល​គាត់​មក​ដល់​វើល​ខាប់​មនុស្ស​បាន​​ចាប់ផ្តើម​ផាត់​គាត់​ចេញ ហើយ​បន្ទាប់មក​គាត់​បាន​ត្រឡប់​មក​វិញ​យ៉ាង​ត្រចះត្រចង់​បំផុត​នៃ​ការប្រកួត​របស់​គាត់​ហើយ​គាត់​បាន​នាំ​ក្រូ​អាស៊ី​ចូលទៅក្នុង​វគ្គ​ពាក់កណ្តាល​ផ្តាច់ព្រ័ត្រ​”៕

​ម៉ូ​ឌ្រិ​ក​គឺជា​ក្បាល​ម៉ាស៊ីន​នៅ​តំបន់​បម្រើ​សម្រាប់ក្រូ​អាស៊ី