​ប្រែ​សម្រួល : កញ្ញា​ដា​លី​ស (​បាល់ទាត់​) ៖ ម៉ារ៉ុក​ដែល​មិន​ទាន់​ស្គាល់​ពាក្យចាញ់ នឹង​ត្រូវ​បើក​ឆាក​ម៉ោង​២២៖០០ ប៉ះ​ជាមួយ​ព័រ​ទុយ​ហ្គាល់​ក្នុង​វគ្គ​៨​ក្រុម​ចុងក្រោយ​នៃ​វើល​ខាប់​ដោយ​លទ្ធភាព​ឈ្នះ​គឺ​មិនសូវ​
​ជា​មាន​ខ្ពស់​ទេ ព្រោះ​ព័រ​ទុយ​ហ្គាល់​កំពុង​លេងល្អ​ដូចផ្កា​។ នៅ​រំលង​អាធ្រា​ត្រ ក្រុម​អង់គ្លេស ដែល​មិនសូវ​ល្អ​ជាមួយ​គីឡូ​ធ្ងន់​មកពី​អឺរ៉ុប​នោះ ត្រូវ​ប៉ះ​ក្រុម​ការពារ​តំណែង​ជើងឯក​បារាំង​ដែល​មាន​ប្រយុទ្ធ​
​ស្រួច​ជាងគេ​នៅវើ​លខាប់​នេះ​។

– ម៉ារ៉ុក vs ព័រ​ទុយ​ហ្គាល់​

* ព័រ​ទុយ​ហ្គាល់​បាន​យក​ឈ្នះ​ស្វីស ៦-១ ក្នុង​ការប្រកួត​វគ្គ​១៦​ក្រុម​ចុងក្រោយ​របស់​ពួកគេ​។​
* ម៉ារ៉ុក​បានទម្លាក់​អេ​ស្ប៉ា​ញ​ដោយ​បាល់​ប៉េ​ណា​ល់​ទី​។​
* ព័រ​ទុយ​ហ្គាល់​ស៊ុត​បញ្ចូល​ទីបាន ១២ គ្រាប់​ក្នុង ៤ ប្រកួត ប៉ុន្តែ​ម៉ារ៉ុក​របូតតែ​១​គ្រាប់​គត់​។​
* ខ្សែប្រយុទ្ធ​វ័យក្មេង Goncalo Ramos ស៊ុត​បាន​៣​គ្រាប់​ទល់​នឹង​ស្វីស​។​

​ម៉ារ៉ុក​បានក្លាយជា​ក្រុម​ឡើង​មក​វគ្គនេះ​ដ៏​គួរឱ្យភ្ញាក់ផ្អើល ប៉ុន្តែ​សន្ទុះ​ខ្យល់​របស់​ពួកគេ​ក្នុងវើ​ល​ខាប់ហាក់​ត្រូវ​បញ្ចប់​ជាមួយនឹង​ព័រ​ទុយ​ហ្គាល់​នៅ​ថ្ងៃសៅរ៍​នេះហើយ​។​

​ក្រុម​តោ​កំណាច​អាហ្វ្រិក​បាន​ទម្លាក់​អេ​ស្ប៉ាញ​ដោយការ​ស៊ុតបាល់​ប៉េណាល់​ទីក្នុង​ជុំមុន ដោយ​បំផ្លាញ​ឱកាស​នៃ​ជំនួប Iberian Derby វគ្គ ១/៤ ផ្តាច់ព្រ័ត្រ ប៉ុន្តែ​ព័រ​ទុយ​ហ្គាល់​នឹង​ផ្តល់​តេស្តិ៍​ផ្សេងដ​ល់​ម៉ារ៉ុក​។​

​ព័រ​ទុយ​ហ្គាល់​បាន​យក​ឈ្នះ​ស្វីសក្នុង​លទ្ធផល ៦-១ ក្នុង​ការប្រកួត​វគ្គ ១៦ ក្រុម​ចុងក្រោយ​របស់​ពួកគេ ក្នុង​អ្វី​ដែល​ជា​ទម្រង់​លេង​ល្អ​បំផុត​នៅវើ​លខាប់​រហូតមកទល់​ពេលនេះ​។ កូនក្រុម​របស់លោក Fernando Santos បានប្រកាស​ខ្លួនឯង​ជា​អ្នក​ប្រជែង​ពាន​មួយ​ដែរ​ជាមួយនឹង​ការ​ឈ្នះ​នោះ និង​ការលេង​ដ៏​ល្អ​ដែល​ពួកគេ​បានបង្ហាញ ហើយ​ការប្រកួត​នេះ​អាច​បញ្ជាក់បាន​ថា​ជាតេ​ស្តិ៍​ដ៏​លំបាក​សម្រាប់​ម៉ា​រ៉ុ​ក​។​

​ការលេង​ដ៏​រលូន​របស់​ព័រ​ទុយ​ហ្គាល់​អាច​ទម្លុះ​តំបន់​ការពារ​ដ៏​រឹងមាំ​របស់​ម៉ារ៉ុក​។ ភាពជោគជ័យ​របស់​ម៉ា​រ៉ុកក្នុង​ប្រទេសកាតា​ត្រូ​វ​បាន​កសាងឡើង​ផ្អែក​លើ​តំបន់​ការពារ​ដ៏​ល្អ ខណៈ​ពួកគេ​បាន​របូត​តែ​មួយ​គ្រាប់​ប៉ុណ្ណោះ​ក្នុងចំណោម​៤​ប្រកួត ដោយ​រក្សា​បាន Clean Sheet ទល់​នឹងក្រូ​អាស៊ី បែលហ្ស៊ិក និង​បន្ទាប់​មក​អេ​ស្ប៉ាញ​។​

​វា​ជា​រឿង​អយុត្តិធម៌​ដែល​និយាយថា​ម៉ារ៉ុក​ឈ្នះ​អេ​ស្ប៉ា​ញទាំង​សំណាង ប៉ុន្តែ​ពួកគេ​ពិតជា​របូត​ការគ្រប់គ្រង​បាល់​ច្រើនណាស់ ហើយ​បើ​ឱ្យ​ព័រ​ទុយ​ហ្គាល់​គ្រប់គ្រ​ងបាល់​ច្រើនដូច​អេ​ស្ប៉ាញ នោះ​ច្បាស់​ជា​ស្ពៃ​ហើយ​។​

​កូនក្រុម​របស់លោក Walid Regragui គ្រប់គ្រង​បាល់​បានត្រឹមតែ ២៣% ទល់​នឹង​ក្រុម​គោល​ជល់​អេ​ស្ប៉ា​ញ ហើយ​ប្រសិនបើ​ពួក​គេ​អនុញ្ញាត​ឱ្យ​ព័រ​ទុយ​ហ្គាល់​គ្រប់គ្រ​ងបាល់​ច្រើន​បែបនោះ វា​ពិតជា​ពិបាក​នឹង​ឃើញ​ពួក​គេ​ទប់​ជាប់​បាន ៩០ នាទី​ណាស់​។​

​ខ្សែប្រយុទ្ធ​វ័យ ២២​ឆ្នាំ Goncalo Ramos របស់ Benfica ដែល​ស៊ុត​បាន ៣ គ្រាប់​តែ​ឯង​លើ​ស្វីស នឹង​ក្លាយ​ជា​ការ​គំរាម​ធំ​បំផុត​សម្រាប់​ម៉ារ៉ុក​។

​លទ្ធផល​ទស្សនទាយ ព័រ​ទុយ​ហ្គាល់​ឈ្នះ ២-០​។​

– អង់គ្លេស vs បារាំង​

* បារាំង​បាន​ឈ្នះ​៣​ប្រកួត​ក្នុងចំណោម​៤​ប្រកួត​របស់​ពួកគេ​នៅ​ប្រទេស​កាតា ហើយ​អាច​សម្រាក​កីឡាករ​សំខាន់ៗ​ក្នុង​ការប្រកួត​ចុងក្រោយ​ក្នុង​ពូ​ល​របស់​ពួកគេ​។​
* អង់គ្លេស​បាន​របូត​ឱកាស​ដំបូង​ជាច្រើន​លើក​ពេល​ជួប​សេណេ​ហ្គាល់​ក្នុង​វគ្គ​១៦​ក្រុម​ចុងក្រោយ​។​
* ខ្សែប្រយុទ្ធ​បារាំង Kylian Mbappe រកបាន ៥ គ្រាប់​ក្នុង​ការចាប់ផ្តើម ៣ ដង​។​
* អង់គ្លេស​យ៉ាប់​ជាមួយ​គីឡូ​ធ្ងន់​អឺរ៉ុប ដោយ​បរាជ័យ​ក្នុងការ​ផ្តួល​អាល្លឺម៉ង់ (​ស្មើ​ពីរ​) និង​អ៊ីតាលី (​ចាញ់​មួយ ស្មើ​មួយ​) ក្នុង​ពាន Nations League ឆ្នាំ ២០២២​។​

​អង់គ្លេស​បាន​ទម្លាក់​សេណេ​ហ្គាល់​ក្នុង​វគ្គ​១៦​ក្រុម​ចុង​ក្រោយ​កាលពី​ថ្ងៃអាទិត្យ​ដើម្បី​ឡើង​មក​ប៉ះ​បារាំង​ក្នុង​វគ្គ​៨​ក្រុម​ចុងក្រោយ​។​

​តោ​កំណាច​ត្រូវ​ប៉ះ​មាន់គក​នៅ​ថ្ងៃ​សៅរ៍​នេះ​នៅ​កីឡដ្ឋាន Al Bayt ក្នុង​អ្វីដែល​នឹង​ក្លាយជា​ការសាកល្បង​ដ៏​ធំ​មួយ​សម្រាប់​ក្រុម​របស់​លោក Gareth Southgate ។​

​អង់គ្លេស​ច្បាស់​ណាស់​គឺ​គ្មាន Ben White ហើយ Raheem Sterling ប្រហែលជា​មិន​អាច​លេង​បានទេ ព្រោះ​អ្នក​ទាំង​ពីរ​កំពុង​ហោះ​ត្រឡប់មក​ពី​ចក្រភព​អង់គ្លេស​វិញ ខណៈ​បារាំង​ប្រហែលជា​គ្មាន​ខ្សែការពារ​ឆ្វេង​ទេ ខណៈ Lucas Hernandez រងរបួស ហើយ​ប្អូនប្រុស​របស់​គេ Theo ត្រូវបាន​រាយការណ៍​ថា​បាន​រងរបួស​ក្នុង​ការហ្វឹកហាត់ ហើយ​ស្ថិត​ក្នុង​មន្ទិល​មិន​ដឹង​បាន​លេង​ឬ​អត់​។​

​អ៊ីតាលី​និង​ប្រេ​ស៊ីល​គឺជា​ក្រុម​តែ​ពីរ​គត់​ដែល​អាច​ការពារ​តំណែង​ជើងឯក​វើល​ខា​ប់បាន ហើយ​ប្រេ​ស៊ីល​គឺជា​ក្រុម​ចុងក្រោយ​ដែល​អាច​សម្រេច​រឿងនេះ​បាន​តាំងពី​ឆ្នាំ ១៩៦២ ប៉ុន្តែ​ក្រុម​បារាំង​មួយ​នេះ​មើលទៅ​ទំនងជា​អាច​សម្រេច​រឿង​នេះ​បាន​។​

​មាន់គក​បានឈ្នះ​ការប្រកួត​វគ្គ​ចែក​ពូ​ល​ចំនួន​២​ប្រកួត​ដំបូង​យ៉ាង​ងាយស្រួល មុន​ពេល​ដាក់​បម្រុង​ឱ្យ​លេង​ហើយ​ចាញ់​ទុយ​នី​ស៊ី​។ បន្ទាប់មក បារាំង​បាន​យកឈ្នះ​ប៉ូឡូញ​ក្នុង​លទ្ធផល ៣-១ ក្នុង​ការប្រកួត​វគ្គ ១៦ ក្រុម​ចុងក្រោយ​របស់​ពួកគេ ដោយ​ក្រុម​ប៉ូឡូញ​បាន​ស៊ុត​បាល់​ប៉េណាល់​ទីចូល​នៅ​នាទី​៩៤​។​

​អង់គ្លេស​មើល​ទៅ​ល្អ​ដូច​ផ្កា​ពេល​យក​ឈ្នះ​អ៊ីរ៉ង់ ៦-២ មុន​នឹង​បង្ហាញ​ទម្រង់​លេង​អន់​ទល់​នឹង​អាម៉េរិក​។ ការទទួល​ជ័យជម្នះ ៣-០ លើ​វែលបា​ន​កើត​ឡើង​តាម​ក្រោយ មុន​ពេល​ពួកគេ​យកឈ្នះ​សេណេ​ហ្គាល់ ប៉ុន្តែ​មាន​សញ្ញា​គួរឱ្យ​ព្រួយបារម្ភ​នៅក្នុង​ការប្រកួត​នោះ​ជាមួយនឹង​ក្រុម​តោ​អាហ្វ្រិក​។​

​សេណេ​ហ្គាល់​មានឱ​កាសស៊ុ​ត​ជាច្រើនលើក​លើ​អង់គ្លេស​នៅ​ដើមតង់​ហើយ​បាន​ក្រឡុក​តំបន់​ការពារ​អង់គ្លេស​ឡើង​វិលក្បុង​។ កុំ​តែ​បាន​ប្រយុទ្ធ​ល្អ​ទើប​ធ្វើឱ្យ​អង់គ្លេស​ឈ្នះ​សេណេ​ហ្គាល់​នៅ​ទីបំផុត ហើយ​បារាំង​ឯណេះ​វិញ​មាន​ខ្សែប្រយុទ្ធ​ល្អ​បំផុត​នៅវើ​លខាប់​កាតា​។ អង់គ្លេស​តែង​ជួប​ការលំបាក​ជាមួយ​គីឡូ​ធ្ងន់​មកពី​អឺរ៉ុប ហើយ​ពួកគេ​បាន​បរាជ័យ​ក្នុង​ការ​ផ្តួល​ទាំង​អាល្លឺម៉ង់ (​ស្មើ​២) និង​អ៊ីតាលី (​ស្មើ​១ ចាញ់​១) ក្នុង Nations League ហើយ​នោះ​បង្ហាញថា បារាំង​មាន​ប្រៀប​ជាង​។​

Kylian Mbappe មើលទៅ​គួរ​ឱ្យ​ខ្លាច​ណាស់​ក្នុងវើ​លខាប់ ហើយ​កីឡាករ​ជើងចាស់ Olivier Giroud ក៏​ស៊ុត​បញ្ចូល​ទី​ច្បាស់​ផងដែរ​ដោយ​រកបាន​២​គ្រាប់​ហើយ​។ មុន​នឹង​លេង​វើល​ខា​ប់ បារាំង​ហាក់​លាក់​ជើង ដោយ​លេង​អន់​ខ្លាំង​មែនទែន ប៉ុន្តែ​ពួកគេ​ស្រាប់តែ​លេង​ល្អ​ខ្លាំង​ក្នុង​ប្រទេស​កាតា ហើយ​ក្នុងពេល Mbappe កំពុង​លេង​សាហាវ​បែបនេះ វា​អាច​ធ្វើឱ្យ​តំបន់​ការពារ​របស់​អង់គ្លេស​រវល់​ខ្លាំង​ជាមិនខាន​។​

​លទ្ធផល​ព្យាករណ៍ បារាំង ឈ្នះ ២-១៕

​អង់គ្លេស​អាច​ហក់​រួច​ជាមួយ​គីឡូ​ធ្ងន់​បារាំង​ដែរឬទេ​?​