​ដោយៈ​តារា​រិ​ទ្ធ / ព្រះសីហនុៈ ដើម្បី​ចូលរួម​ដល់​កិច្ចពិភាក្សា ក្នុង​អង្គ​មហាសន្និបាត លើក​ទី​១៦ ក៏ដូចជា​រួមចំណែក​ដ​ល់​ការគ្រប់គ្រង និង​អភិវឌ្ឍ​ឆ្នេរសមុទ្រ​កម្ពុជា ប្រកបដោយ​និរន្តរភាព ប្រសិទ្ធភាព និង​ការទទួលខុសត្រូវ សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា បានលើកឡើង​នូវ អនុសាសន៍​គន្លឹះ​មួយចំនួន ដូចខាងក្រោម​៖

​ទី​១៖ ត្រូវ​រក្សា​វត្តមាន​ជា​អចិន្ត្រៃយ៍ នៃ​សន្តិភាព ដែល​នេះ​ជា​ចំណុច​ធំជាងគេ ក្នុងចំណោម ចំណុច​ដែល​ទាក់ទង​ជាមួយ​ការអភិវឌ្ឍ នៃ​បណ្តា​ប្រជាជាតិ នៅលើ​សាកលលោក ។ គ្មាន​ទេសចរ​ណា ប្រថុយប្រថាន​គ្រោះថ្នាក់ ធ្វើដំណើរ​ទៅកាន់​ប្រទេស ដែលមាន​សង្គ្រាម នោះទេ ។

​ទី​២៖ កម្ពុជា ប្តេជ្ញា​រក្សា​ឱ្យបាន​នូវ​សមា ជិ​ក​ភាព ក្នុង​ក្លិប ហើយ​ខេត្ត​តំបន់ឆ្នេរ សមុទ្រ​របស់​កម្ពុជា ទាំង ៤ ក៏ត្រូវ​រក្សា​ឱ្យបាន​នូវ ខ្សែក្រវាត់ និង​កិត្តិនាម​ជា​សមាជិក ក្លិប​ឆ្នេរ​ស​មុទ ដែល​ស្អាត​បំផុត លើ​សកលលោក ។ យើង​ត្រូវ​ប្តេជ្ញា​ធ្វើឱ្យ​ទីក្រុង ជាប់​ឆ្នេរសមុទ្រ​របស់​យើង មាន​និរន្តរភាព ដូចដែល​យើង​បានកំណត់​ជា​យុទ្ធសាស្ត្រ ក្នុងការ​អភិវឌ្ឍ​វិស័យ​ទេសចរណ៍ ខេត្ត​តំបន់ឆ្នេរ គឺ​៖

– ខេត្ត​ព្រះសីហនុ​៖ ជា ” គោលដៅ​ទេសចរណ៍ សម្រាកលម្ហែ និង​ជា​តំបន់​សេដ្ឋកិច្ច ពហុ​បំណង​”​។​

– ខេត្ត​កែប​៖ ជា ” គោលដៅ​ទីក្រុង​ទេសចរណ៍​លំដាប់​ខ្ពស់ និង ប្រណិត ”​។​

– ខេត្តកំពត​៖ ជា «​គោលដៅ​ទីក្រុង​ទេសចរណ៍ បេតិកភណ្ឌ​វប្បធម៌ និង​ក​សិ​-​ទេសចរណ៍ តំបន់ឆ្នេរ​»​។​

– ខេត្តកោះកុង​៖ ជា “​គោលដៅ​អេកូ​ទេសចរណ៍ តំបន់​ទេសចរណ៍​លំដាប់​ពិភពលោក​”​។​

​ទី​៣៖ ខ្ញុំ​ស្នើឱ្យ​មានការ​រៀបចំ​វេទិកា​ជាតិ តំបន់ឆ្នេរ​ប្រចាំឆ្នាំ ដើម្បី​ជួបជុំ​, ពិភាក្សា និង​ផ្លាស់ប្ដូរ​យោបល់ ជុំវិញ​ការអភិវឌ្ឍ​តំបន់ឆ្នេរ​សមុទ្រ​កម្ពុជា ដោយ​យើង​អាច​កំណត់ ថ្ងៃទី​២៦ ខែឧសភា ជា​រៀងរាល់ឆ្នាំ ដែលជា​ថ្ងៃ​កម្ពុជា បាន​ក្លាយជា​សមាជិក​ក្លិប ដើម្បី​រៀបចំ​វេទិកា​ជាតិ​នេះ ដោយ​អាច​ឆ្លាស់​វេន​គ្នា នៅតាម​បណ្តា​ខេត្ត តំបន់ឆ្នេរ​ទាំង ៤​។​

ទី​៤៖ ខ្ញុំ​សូម​ស្នើឱ្យ​ក្រសួងទេសចរណ៍ និង​អាជ្ញាធរខេត្ត​ព្រះសីហនុ ពិនិត្យ​លទ្ធភាព​រៀបចំ សារមន្ទីរ​ឆ្នេរ (Maison de le Bale) ។ ក្នុងន័យនេះ​,​ខ្ញុំ​សូម​ស្នើឱ្យ​ឯកឧត្តម ប្រធាន​ក្លិប និង សមាជិក​ក្លិប​ទាំងអស់ ជួយ​ចែករំលែក អំពី​បទពិសោធន៍ និង​ដំណើរការ នៃ​ការរៀបចំ​សារមន្ទីរ​ឆ្នេរ​របស់ខ្លួន ។​

​ទី​៥៖ ខ្ញុំ​សូម​ស្នើឱ្យ​ក្រសួងទេសចរណ៍ សហការ​ជាមួយ​ក្លិប​ឆ្នេរសមុទ្រ ដែល​ស្អាត​បំផុត លើ​សកលលោក សិក្សា​រៀប ចំ​ឱ្យ​មាននូវ​ស្ថាប័ន អង្កេត​ទេសចរណ៍ សម្រាប់​ឆ្នេរ (Coastal Tourism Observatory) ដើម្បី​ជា​យន្តការ​ស្ថាប័ន​មួយ បន្ថែមទៀត ក្នុង​ការជំរុញ​ការអភិវឌ្ឍ​វិស័យ​ទេសចរណ៍ តំបន់ឆ្នេរ​សមុទ្រ ដូចដែល សមាជិក​ក្លិប​ផ្សេងទៀត បានរៀបចំ ។​

​ទី​៦៖ ដើម្បី​បញ្ជាក់​អំពី​ការប្តេជ្ញាចិត្ត ក្នុងការ​អភិវឌ្ឍ​តំបន់ឆ្នេរ​សមុទ្រ កម្ពុជា ត្រៀមខ្លួន​ជា ស្រេច ក្នុងការ​ធ្វើជា​លេខាធិការដ្ឋាន សម្រាប់​ធានា​ដំណើរការ​រដ្ឋបាល និង​កិច្ចការ​ទូទៅ របស់​ក្លិប ហើយ​ក្រសួងទេសចរណ៍ និង​រដ្ឋបាលខេត្ត​ព្រះសីហនុ ត្រូវ​រៀបចំ​ឱ្យមាន​កន្លែង បំពេញការងារ​ជា​អចិន្ត្រៃយ៍​មួយ នៅ​ក្រសួងទេសចរណ៍ និង​មួយទៀត នៅ​ក្រុងព្រះសីហនុ សម្រាប់​ដំណើរការ លេខាធិការដ្ឋាន​នេះ ។ ទន្ទឹមនឹងនេះ​, ខ្ញុំ​ក៏​ស្វាគមន៍​ផងដែរ ចំពោះ​ការរៀបចំ​ឱ្យមាន កិច្ចប្រជុំ​ក្រុមប្រឹក្សាភិបាល​ក្លិប នៅ​ឆ្នាំ​២០២៣ ឬ ពេលខាងមុខ​ណាមួយ រួមជាមួយ​ព្រឹត្តិការណ៍​ផ្សេងៗ​ទៀត របស់​ក្លិប​នៅលើ​ទឹកដី​ឆ្នេរសមុទ្រ​កម្ពុជា ។​

ទី​៧៖ ជាមួយនឹង​ការបោះឆ្នោត​ជ្រើសរើស​គណៈ​ប្រតិបត្តិ​សម្រាប់​អាណត្តិ​បន្ទាប់ នាឱកាស​បិទ​មហាសន្និបាត កម្ពុជា សូម​គាំទ្រ​ចំពោះ​បេក្ខភាព ឯកឧត្តម ប៊ូ​ណូ បូ​ដា​ដ (Bruno Bodard) ជា​ប្រធាន​ក្លិប សម្រាប់​អាណត្តិ​បន្ទាប់ និង​សូមឱ្យ​គណៈ​ប្រតិបត្តិ និង​សមាជិក​ក្លិប​ទាំងអស់ គាំទ្រ​កម្ពុជា ជា​សមាជិក​ក្រុមប្រឹក្សាភិបាល​ក្លិប សម្រាប់​អាណត្តិ (២០២៣-២០២៥) ក្រោម​ការដឹកនាំ​របស់​ឯកឧត្តម ល្វី​ស ផើ​បុល (Louis Thébault) ដែល​នឹង​ចូលកាន់​តំណែង នា​អាណត្តិ​បន្ទាប់ ។​

​ទី​៨៖ ជាមួយ​ក្តី​រំពឹងថា អង្គ​មហាសន្និបាត នឹង​អនុម័ត​ដាក់ចេញ នូវ​ធម្មនុញ្ញ​ឆ្នេរ (Charter of Bay), ខ្ញុំ​សូម​ស្នើឱ្យ​អង្គ​មហាសន្និបាត រួមទាំង​កម្ពុជា​ផងដែរ យក​ឯកសារ​នេះ ជា​គោល ដើម្បី​ជា​ត្រីវិស័យ​មួយ​បន្ថែមទៀត ក្នុងការ​តម្រែតម្រង់ ការអភិវឌ្ឍ​តំបន់ឆ្នេរ​សមុទ្រ​របស់​ខ្លួន ។​

​សម្ដេច​តេ​ជោ បានផ្តល់​អនុសាសន៍​នេះ នៅក្នុង​ពិធី​បើក​មហាសន្និបាត​លើក​ទី ១៦ នៃ​ក្លិប​ឆ្នេរ​ស​មុទ ដ៏​ស្អាត​បំផុត លើ​សកលលោក នា​ថ្ងៃទី​១០ ខែធ្នូ ឆ្នាំ​២០២២ នៅ​សណ្ឋាគារ ឆ្នេរ​សុខា ខេត្ត​ព្រះសីហនុ​៕/V​