​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមហ៊ុន Airbus​កំពុង​អភិវឌ្ឍ​ម៉ាស៊ីន​អាគុយ​ឥន្ធនៈ​ដើរ​ដោយ​ថាមពល​អ៊ីដ្រូសែន​សម្រាប់​ជា​ដំណោះស្រាយ​ដ៏​មាន​សក្តានុពល​សម្រាប់​យន្តហោះ​គ្មាន​ការបំ​​ភាយ​ឧស្ម័ន​របស់ខ្លួន​។​

​កំណែ​យន្តហោះ A380 MSN001 ដែល​បាន​កែប្រែ​របស់​ក្រុមហ៊ុន នឹង​ផ្ទុក​ម៉ាស៊ីន​អាគុយ​ឥន្ធនៈ ហើយ​ធុងសាំង​របស់​យន្តហោះ​នេះ​នឹង​ក្លាយជា​ធុង​សម្រាប់​ផ្ទុក​អ៊ីដ្រូសែន​រាវ​។​

​ក្រុមហ៊ុន Airbus មាន​យន្តហោះ​គំរូ​មិន​បំភាយ​ឧស្ម័ន​ច្រើន ប៉ុន្តែ​យន្តហោះ​ដែល​ត្រូវបាន​ប្រើ​សម្រាប់​កិច្ចខិតខំ​ប្រឹងប្រែង​នេះ​គឺ​ជា​យន្តហោះ​ដឹក​អ្នកដំណើរ​ក្នុង​តំបន់ ១០០​កៅអី​ដែល​មាន​ស្លាប​​ចក្រ​ប្រាំបី​ភ្ជាប់​ទៅនឹង​ម៉ាស៊ីន​។​

​ម៉ាស៊ីន​គឺ​ផ្ទុក​អាគុយ​ឥន្ធនៈ​អ៊ីដ្រូសែន ដែល​ផលិត​អគ្គិសនី ដោយសារ​តែ​ប្រតិកម្ម​គីមី​អេឡិចត្រូ​ចំពោះ​ម៉ូទ័រ​អគ្គិសនី​។​

​លោក គ្លេ​ន ឡេវែ​ល​លីន (Glenn Llewellyn) ជា​អនុប្រធាន​ផ្នែក​យន្តហោះ​មិន​បញ្ចេញ​កាបូន​សម្រាប់ Airbus បាន​និយាយ​នៅក្នុង​សេចក្តីថ្លែងការណ៍​មួយ​ថា “​អាគុយ​ឥន្ធនៈ​គឺជា​ដំណោះស្រាយ​ដ៏​មាន​សក្តានុពល​មួយ​ដើម្បី​ជួយ​យើង​សម្រេចបាន​នូវ​មហិច្ឆតា​នៃ​ការបំភាយ​ឧស្ម័ន​សូន្យ​របស់​យើង ហើយ​យើង​កំពុង​ផ្តោតលើ​ការអភិវឌ្ឍ​និង​សាកល្បង​បច្ចេកវិជ្ជា​នេះ​ដើម្បី​ស្វែងយល់ថា​តើ​វា​អាច​ទៅរួច​និង​អាច​សម្រេច​បាន​ដែរឬទេ សម្រាប់​សេវាកម្ម​យន្តហោះ​គ្មាន​ការបំភាយ​ឧស្ម័ន​នៅ​ត្រឹម​ឆ្នាំ ២០៣៥”​។​

​សម្រាប់​ការបង្ហាញ​ភស្តុតាង​នៃ​គំនិត​នេះ អ៊ីដ្រូសែន​រាវ​ពី​ធុង​ឧស្ម័ន Cryogenic ត្រូវបាន​បំប្លែង​ទៅ​ជា​ហ្គាស មុន​ពេល​វា​ចែកចាយ​ទៅ​អាគុយ​ឥន្ធនៈ​តាមរយៈ​ខ្សែ​ផ្គត់ផ្គង់​ដែល​ដំណើរការ​ពី​ធុង​និង​តាមរយៈ​រចនា​សម្ពន្ធ​ខាងក្រៅ​ទៅកាន់​ចំណុច​ប្រទាក់​របស់​ម៉ាស៊ីនភ្លើង​។​

​ម៉ូទ័រ​អគ្គិសនី​នៅ​ជិត​ខាងមុ​ខ​ម៉ាស៊ីន បន្ទាប់​មក​បំប្លែង​ថាមពល​អគ្គិសនី​ទៅជា​ថាមពល​មេកា​និក ដោយ​ធ្វើ​ទំនាក់ទំនង​របស់​កម្លាំង​បង្វិល​ទៅ​ប្រអប់​លេខ​។ ស្លាបចក្រ​ជា​អ្នកផ្តល់​កម្លាំង​រុញច្រាន​។​

​ថាមពល​កម្តៅ​ដែល​បង្កើត​ដោយ​អាគុយ​ឥន្ធនៈ​ត្រូវបញ្ជូន​ដោយ​ប្រព័ន្ធ​ត្រជាក់​រាវ​ទៅកាន់​ឧបករណ៍​ផ្លាស់ប្តូរ​កម្តៅ ដែល​បន្ទាប់​មក​វា​នឹង​រលាយ​ចូលទៅក្នុង​ខ្យល់​។​

​ទឹក​ក៏​ត្រូវបាន​ផលិត​ដោយសារតែ​ប្រតិកម្ម​គីមី ដែល​ត្រូវ​បាន​បណ្តេញ​ពី​ច្រក​ចេញ​នៅ​ខាងក្រោយ​ម៉ាស៊ីន​។​

​ក្រុមហ៊ុន​បាន​និយាយថា យន្តហោះ A380 គឺជា​ជម្រើស “​ជាក់ស្តែង​” សម្រាប់​ការបង្ហាញ​ម៉ាស៊ីន​អ៊ីដ្រូសែន​ឥន្ធនៈ ព្រោះ​វា​មាន​ទំហំ​ធំ​ទូលាយ​នៅ​ខាងក្នុង ដែល​អនុញ្ញាត​ឱ្យ​ក្រុមហ៊ុន​អាច​សាកល្បង​ការកំណត់​រចនា​សម្ពន្ធ​ជាច្រើន​៕

ក្រុមហ៊ុន Airbus កំពុង​ផលិត​ម៉ាស៊ីន​អាគុយ​ឥន្ធនៈ និង​សាកល្បង​វា​លើ​យន្តហោះ​កែប្រែ A380