​ប្រែ​សម្រួលៈ​បំណង​(​ដេល្លី​ម៉េល​)៖ អាជ្ញាធរ​ចិន​បាន​និយាយ​ងា ខ្លួន​កំពុង​បង្ក្រាប​លើ​ការដំឡើងថ្លៃ​ថ្នាំពេទ្យ​និង​គ្រឿ​ង​បរិក្ខា​វេជ្ជសាស្ត្រ និង​ស្វះស្វែង​ធានាថាថ្នាំ​និង​គ្រឿង​ផ្គត់ផ្គង់​វេជ្ជសាស្ត្រ​នឹងមាន​គ្រប់​​គ្រាន់​និង​ចែកចាយ​ដោយ​រលូន ចំ​ពេល​មាន​ការព្រួយបារម្ភ​កាន់តែ​ខ្លាំង​ថា កូវី​ដ​១៩​នឹង​ផ្ទុះ​ខ្លាំង​ឡើង​ជា​ថ្មី​ក្រោយ​អាជ្ញាធរ​លុបចោល​វិធានការ​តឹងរ៉ឹង​ក្នុង​ការគ្រប់គ្រង​ជំងឺ​នេះ​។​

​ចិន​កាលពី​ថ្ងៃ​ពុធ​បាន​ប្រកាស​ចេញ​វិធានការ​ចំនួន​ដប់​ដែល​បន្ធូរបន្ថយ​ផ្នែក​សំខាន់ៗ​នៃ​គោលនយោបាយ​សូន្យ​កូ​វីដ​របស់​ប្រធានាធិបតី ស៊ី ជីន​ភីង ក្នុង​ចំណាត់ការ​ចុង​ក្រោយ​មួយ​ដើម្បី​​បើក​សេដ្ឋកិច្ច​ឡើងវិញ​និង​សម្រាល​កំហឹង​ប្រជាជន ក្រោយ​ផ្ទុះ​ការតវ៉ា​ប្រឆាំង​នឹង​ការអនុវត្ត​វិធានការ​ប្រឆាំង​កូវី​ដ​តឹងតែង​និង​យូរពេក​។​

​តែ​ការព្រួយបារម្ភ​កាន់តែ​កើន​ខ្លាំង​ឡើង​នៅពេល​ចំនួន​ឆ្លងកូវី​ដ​ក្នុង​ប្រទេស​ចិន​នៅ​ជាង​១៣.០០០​នាក់​នៅ​ឡើយ​សំរាប់​ថ្ងៃ​សុក្រ ខណៈ​អាជ្ញាធរ​អនុញ្ញាត​អោយ​អ្នក​ឆ្លង​ស្រាលៗ​ខ្លះ​អាច​ដាក់ខ្លួន​នៅ​ដាច់​ពី​​គេ​និង​ព្យាបាល​នៅ​តាម​ផ្ទះ​។​ការព្រួយបារម្ភ​នាំ​អោយ​មនុស្ស​សំរុក​ទៅ​ទិញ​ថ្នាំ​ក្អក ផ្តាសាយ​និង​ម៉ាស់​អស់ៗ​ពី​ឳ​សថ​ស្ថាន​។​

​ក្រុមការងារ​មួយ​នៅក្រោម​ក្រុមប្រឹក្សារដ្ឋ ឬ​គណៈរដ្ឋមន្ត្រី​ចិន បាន​ចេញ​សេចក្តីជូនដំណឹង​មួយ​កាលពី​យប់​ថ្ងៃ​សុក្រ ដោយ​អំពាវនាវ​អោយ​រដ្ឋាភិបាល​មូល​ដ្ឋា​ន​ធានា​ការដឹក​ជញ្ជូន​និង​ឡូជី​ស្ទិច​ដោយ​រលូន​ដើម្បី​​ធានា​សណ្តាប់ធ្នាប់​នៃ​ការរស់នៅ​និង​ការងារ​ដំណើរការធម្មតា​។​

​សេចក្តីជូនដំណឹង​បាន​និយាយថា​« ត្រូវខិតខំ​ធានា​ការដឹកជញ្ជូន​ថ្នាំ​គ្រឿង​ផ្គត់ផ្គង់​វេជ្ជសាស្ត្រ​ដោយ​រលូន រួម​មាន​វ៉ាក់សាំង ឧបករណ៍​តេស្តិ៍ ថ្នាំ​និង​ម៉ាស់​»​។​វា​ក៏​ហាម​ដាច់ខាត​មិន​អោយ​បិទ​ផ្លូវគោក ផ្លូវទឹក​​កំពង់ផែ និង​ស្ថានីយ​ផ្លូវដែក ព្រមទាំង​អាកាសយានដ្ឋាន​ដោយ​គ្មាន​ការអនុញ្ញាត ក្នុងពេល​អនុវត្តតាម​វិធានការ​បន្ធូរបន្ថយ​ការ​រឹតបន្តឹង​ប្រឆាំង​កូវី​ដ​។​

​ក្នុង​លិខិត​ព្រមាន​មួយ​កាលពី​ថ្ងៃ​សុក្រ ក្រុម​ការងារ​នេះ​ក៏​ហាម​សកម្មភាព​នានា​រួម​មាន​ការដំឡើង​ថ្លៃទំនិញ ការ​សមគំនិត​គ្នា ការរើសអើង​ថ្លៃ​និង​ការឃោសនា​ណា​ដែលនាំអោយ​មាន​ការយល់​ខុស​រួមទាំង​ការ​​ទិញ​ទំនិញ​ស្តុក​ទុក​ដើម្បី​លក់​យកចំណេញ​។​វា​បាន​និយាយថា ឈ្មួញ​មិនត្រូវ​ដំឡើងថ្លៃ​នៅពេល​មិនមាន ភស្តុតាង​ណា​បង្ហាញ​ពី​ការឡើង​ថ្លៃដើម​។​គេ​មិន​ត្រូវ​ទិញ​ស្តុក​ទុក​គ្រឿង​បរិក្ខារ​ប្រឆាំង​ជំងឺឆ្លង​ដែល​​កំពុង​ខ្វះ​លើ​ទីផ្សារ​និង​មាន​តំរូវការ​ខ្ពស់ ឬ​ផ្សព្វផ្សាយ​ពាក្យ​ចចាមអារ៉ាម​អំពី​ការ​ឡើងថ្លៃ​ទំនិញ​ដែល​រារាំង​ដល់​សណ្តាប់ធ្នាប់​ទីផ្សារ​។​

​សូមបញ្ជាក់​ថា នៅ​ថ្ងៃ​សៅរ៍​នេះ​អាជ្ញាធរ​សុខាភិបាល​ចិន​បាន​រាយការណ៍​ចំនួន​ឆ្លង​ប្រចាំ​ថ្ងៃ​ថ្មី ១៣.៨១១​នាក់​សំរាប់​ថ្ងៃ​សុក្រ ដោយ​ចុះ​ពី​ចំនួន​ឆ្លង​១៦.៧៩៧​នាក់​កាល​ពី​មួយ​ថ្ងៃមុន​។​មិន​មាន​អ្នកស្លាប់​ថែម​​ដោយ​ជំងឺ​នេះ​ទេ ដោយ​ចំនួន​ស្លាប់​សរុប​នៅ​បី​ឆ្នាំ​មកនេះ​មាន​ចំនួន​៥.២៣៥​នាក់​ដដែល​គិត​ត្រឹម​ថ្ងៃ​១០​ធ្នូ ២០២២៕

​ប្រជាជន​នាំគ្នា​មក​ទិញ​ថ្នាំ​តាម​ឳ​សថ​ស្ថាន បន្ទាប់​ពី​អាជ្ញាធរ​បន្ធូរបន្ថយ​ការគ្រប់គ្រង​កូវី​ដ​១៩​និង​អនុញ្ញាត​អោយ​អ្នក​ឆ្លង​ស្រាលៗ​ព្យាបាល​នៅ​តាម​ផ្ទះ​