​ប្រែ​សម្រួល : កញ្ញា​ដា​លី​ស (​ញូវយ៉ក​ថែមស៍​) ៖ លោក ហ្គ្រែ​ន វ៉ា​ល់ (Grant Wahl) ជា​អ្នកកាសែត​បាល់ទាត់​មាន​ការគោរព​ខ្ពស់​មួយរូប ដែល​បាន​សរសេរ​យ៉ាង​ទូលំ​ទូលាយ​អំពី​ការប្រកួត​វើល​ខាប់ បាន​ទទួលមរណភាព​កាលពី​ថ្ងៃ​សុក្រ​ទី​៩​ធ្នូ​ក្នុង​ប្រទេស​កាតា ជា​កន្លែង​ដែល​គាត់​កំពុង​យក​ព័ត៌មាន​អំពី​ការប្រកួត​វគ្គ​៨​ក្រុម​ចុងក្រោយ​នៃ​វើល​ខាប់​រវាង​អា​ហ្សង់​ទីននិង​ហូឡង់​។​

​ភ្នាក់ងារ​របស់​វ៉ាល់ លោក ធី​ម ស្កា​ន​លែ​ន (Tim Scanlan) បាន​បញ្ជាក់​ពី​ការស្លាប់​នេះ​នៅក្នុង​បទ​សម្ភាសន៍​តាម​ទូរស័ព្ទ​កាលពី​យប់​ថ្ងៃ​សុក្រ​។ លោក​ស្កា​ន​លែ​ន​និយាយថា លោក​វ៉ាល់​បាន​ស្ថិតនៅក្នុង​ប្រអប់​សម្រាប់​អ្នក​សារពត៌មាន​នៅ​នា​ទីជិត​ចប់​ការប្រកួត នៅពេល​ដែល​គាត់​នៅ​សុខៗ​ស្រាប់តែ​មិន​ស្រួល​ខ្លួន​យ៉ាង​ស្រួចស្រាវ​។​

​លោក​ស្កា​ន​លែ​ន​បាន​និយាយថា​គេ​ជឿ​ថា​គាត់​បាន​ស្លាប់​នៅ​ឯ​មន្ទីរពេទ្យ​ក្នុង​ប្រទេស​កាតា​ឬ​ខណៈពេល​ដែល​គាត់​ត្រូវបាន​បញ្ជូន​ទៅ​មន្ទីរពេទ្យ បន្ទាប់ពី​មាន​អារម្មណ៍​មិន​ស្រួលខ្លួន នៅពេល​ដែល​ការប្រកួត​កំពុងដំណើរការ​។​

​លោក​ស្កា​ន​លែ​ន​និយាយថា “​គាត់​មិនបាន​គេង​លក់​ស្រួល​ទេ ហើយ​ខ្ញុំ​បាន​សួរ​គាត់​ថា​តើ​គាត់​អាច​សាក​លេបថ្នាំ Melatonin ឬ​ថ្នាំ​អី​ផ្សេង​ទេ​។ គាត់​និយាយថា គាត់​គ្រាន់តែ​ចង់​សម្រាក​បន្តិច​ប៉ុណ្ណោះ​”​។​

​យោង​តាម​អ្នកកាសែត New York Times ពីរ​នាក់​ដែល​មាន​វត្តមាន​នៅ​កាតា បុគ្គលិក​ពេទ្យ​បាន​សង្កត់​ដើមទ្រូង និង ធ្វើការ​ព្យាបាល​ផ្សេងទៀត​ប្រហែល ២០ នាទី​មុនពេល​លោក​វ៉ាល់​ត្រូវបាន​យកចេញ​ពី​កីឡដ្ឋាន Lusail Iconic ។​

​លោក​វ៉ាល់​បាន​កំពុងស្ថិត​នៅ​ចំ​កណ្តាល​ការប្រកួត​វើល​ខាប់​ប្រកួត​ទី​ប្រាំបី​របស់គាត់ ជាមួយ​កាលវិភាគ​ដ៏​មមាញឹក​ក្នុង​ការរាយការណ៍​សាច់​រឿង​និង​ការថត​សំឡេង​ផត​ខាស់ (Podcast)៕

​លោក ហ្គ្រែ​ន វ៉ា​ល់ គឺជា​អ្នកសរសេរ​ព័ត៌មាន​បាល់ទាត់​អាម៉េរិក​ដ៏​ល្បី​មួយ​រូប