​ប្រែ​សម្រួល : កញ្ញា​ដា​លី​ស (​បាងកក​ប៉ុស្តិ៍​) ៖ ប្រព័ន្ធ​ផ្សព្វផ្សាយ​របស់​ចក្រភព​អង់គ្លេស ដែល​ជា​ការ​ផ្តោត​សំខាន់​នៃ​ការរិះគន់​រហូតមកទល់​ពេលនេះ​នៅ​ក្នុង​ភាពយន្ត​ឯកសារ​របស់ “​ព្រះអង្គម្ចាស់​ហារី​និង​ព្រះ​នាង​មេហ្គា​ន​” នៅលើ Netflix កាលពី​ថ្ងៃ​សុក្រ​ទី​៩​ធ្នូ បាន​វាយបក​វិញ​ទៅ​លើ​ព្រះអង្គម្ចាស់​និង​មហេសី​របស់​ទ្រង់ ដោយ​ចោទប្រកាន់​ពួក​ទ្រង់​ថា​និយាយ​កុហក​និង​ប្រមាថ​ម្ចាស់​ក្សត្រិយ៍ អេ​លីហ្សា​បេ​តទី​២​។​

​គ្រួសារ​រាជវង្ស​អង់គ្លេស​មិនសូវ​ជា​ត្រូវ​គេ​លើក​និយាយ​ទេ​ក្នុងអំឡុង​បី​វគ្គ​ដំបូង​នៃ​កម្មវិធី​ដែល​បាន​ចាក់​ផ្សាយ​កាលពី​ថ្ងៃ​ព្រហស្បតិ៍ ដោយ​ផ្តោត​តែ​លើ​ជីវិត​ដំបូង​របស់​ព្រះអង្គម្ចាស់​ហារី​និង​ការ​អាក់អន់ចិត្ត​របស់​ទ្រង់​ចំពោះ​ប្រព័ន្ធ​ផ្សព្វផ្សាយ ដែល​ទ្រង់​បាន​ស្តីបន្ទោស​ចំពោះ​ការស្លាប់​របស់​មាតា​ទ្រង់ គឺ​ព្រះ​នាង​ដាយ​អាណា​។​

​ប៉ុន្តែ​ព្រះអង្គម្ចាស់​ហារី​ពិតជា​បាន​ចោទ​ក្រុមគ្រួសារ​រាជវង្ស​ថា​រើសអើង​ពូជសាសន៍​ដោយ​មិន​ដឹង​ខ្លួន ហើយ​ថា​រាជវង្ស​នឹងត្រូវ​ត្រៀម​ខ្លួន​សម្រាប់​វគ្គ​បន្ត​នៅ​សប្តាហ៍​ក្រោយ ដែល​នឹង​គំរាម​បញ្ចេញ​ការ​លាតត្រដាង​បន្ថែមទៀត​។​

​រឿងរ៉ាវ​នេះ​បាន​គ្របដណ្ដប់​លើ​ទំព័រមុខ​កាសែត​នានា​កាលពី​ថ្ងៃ​សុក្រ ដែល​ភាគច្រើន​បាន​រិះគន់​ទៅលើ​ព្រះអង្គម្ចាស់​ហារី​និង​ព្រះ​នាង​មេហ្គា​ន​។​

“​ហា​រី មនុស្ស​អាក្រក់​” គឺជា​ចំណងជើង​របស់​កាសែត​ដ៏​ពេញនិយម The Sun ដែល​បាន​បន្ថែមថា គូស្នេហ៍​នេះ “​បាន​កម្ទេច​ចោល​កេរដំណែល​របស់​ព្រះ​មហាក្សត្រិយានី​” បានធ្វើឱ្យ​បិតា​របស់​ហារី ស្តេច​ឆាល​ទី​២ និង​បងប្រុស​របស់​ទ្រង់​ព្រះអង្គម្ចាស់​វី​លលៀម​ស្ថិតក្នុង “​ស្ថានភាព​សោកសៅ​” និង បាន​ធ្វើឱ្យ​ប្រទេស​ទាំងមូល​ក្លាយជា​ប្រទេស​ប្រកាន់ពូជសាសន៍​យ៉ាង​អយុត្តិធម៌​។​

​កាសែត​នេះ រួម​ជាមួយ​កាសែត​ផ្សេង​ទៀត​ជាច្រើន បាន​លើកយក​ឈុត​ឆាក​មួយ ដែល​ព្រះ​នាង​មេ​ហ្គាន​សម្តែង​បទ​ភ្លេង​បែប​ស្រើបស្រាល ខណៈ​ទ្រង់​រំលឹក​ការចូលគាល់​ម្ចាស់​ក្សត្រិយ៍​អេ​លីហ្សា​បេ​ត​ទី​២​ជា​លើកដំបូង​។​

​កាសែត​នេះ​បាន​សួរថា “​តើ​អ្នក​អាច​ថោកទាប​ដល់​កម្រិត​ណា​?” ដោយ​បន្ថែម​ថា “​មេហ្គា​ន​ដែល​កំពុង​សើចចម្អក​រូបនេះ​បាន​យក​ការ​រាក់ទាក់​នេះ​មក​លេងសើច​ចំពោះ​រាជវង្ស ហើយ​ប្រៀបធៀប​ប្រពៃណី​របស់​អង់គ្លេស​ទៅ​នឹង​ច្រវាក់​ខ្នោះ​មជ្ឈិមសម័យ​របស់​អាម៉េរិក​”៕

​ព្រះអង្គម្ចាស់​ហារី​និង​ព្រះ​នាង​មេ​ហ្គាន​រង​ការរិះគន់​ខ្លាំងៗ​ពី​សំណាក់​ប្រព័ន្ធ​ផ្សព្វផ្សាយ​អង់គ្លេស