ដំណឹង​ល្អ​! តម្លៃ​ប្រេងសាំង និង​ម៉ា​ស៊ូ​ត ចាប់ពី​ថ្ងៃទី​១១-២០ ខែធ្នូ ឆ្នាំ​២០២២ បន្ត​ធ្លាក់​ថ្លៃ​បន្ថែមទៀត​

​ដោយ​: ទេព មង្គល / ភ្នំពេញៈ ការកំណត់ថ្លៃ​លក់រាយ​ប្រេងឥន្ធនៈ ពីថ្ងៃ​ទី​១១ ដល់​ថ្ងៃទី ២០ ខែធ្នូ ឆ្នាំ​២០២២ នេះ សម្រាប់​ប្រេងសាំង​ធម្មតា ឃើញថា បាន​ធ្លាក់​ថ្លៃ ចំនួន ១០០ រៀល រីឯ​ប្រេងម៉ាស៊ូត បាន​ធ្លាក់​ថ្លៃ ២០០ រៀល ក្នុង​មួយ​លីត្រ គឺ​បន្ត​ធ្លាក់​ថ្លៃ​បន្ថែមទៀត បើ​ប្រៀបធៀប​នឹង​សប្ដាហ៍​មុន ពីថ្ងៃ​ទី​១ ដល់​១០ ធ្នូ កន្លងទៅនេះ ។​

​យោងតាម​សេចក្តីជូនដំណឹង ស្តីពី​ថ្លៃ​លក់រាយ​ប្រេងឥន្ធនៈ នៅតាម​ស្ថានីយ បង្ហាញ​នៅ ព្រឹក​ថ្ងៃទី​១១ ខែធ្នូ នេះ ក្រសួងពាណិជ្ជកម្ម​កម្ពុ​ជា បាន​ឲ្យ​ដឹងថាៈ ការកំណត់ថ្លៃ​លក់រាយ ប្រេងឥន្ធនៈ ក្នុង​រយៈពេល ១០ ថ្ងៃនេះ សម្រាប់​ប្រេងសាំង​ធម្មតា មានតម្លៃ ៤.១០០ រៀល (​ចុះ ១០០៛) និង​ប្រេងម៉ាស៊ូត មានតម្លៃ ៤.៤៥០ រៀល (​ចុះ ២០០៛) នៅក្នុង ១​លីត្រ​។​

​ពាក់ព័ន្ធ​ការកំណត់ថ្លៃ​លក់រាយ ប្រេងឥន្ធនៈ​នេះដែរ ក្រសួងពាណិជ្ជកម្ម បានបញ្ជាក់​ថាៈ ដើម្បី​ជួយ​សម្រួល ដល់​ជីវភាព​របស់​ប្រជាជន និង​ដោយមាន​ការរួមចំណែក​ពី​ក្រុមហ៊ុន ចែកចាយ​ប្រេងឥន្ធនៈ នៅ​កម្ពុជា សម្តេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា នៅតែ​បន្ត និង​សម្រេច​បញ្ចុះតម្លៃ លក់រាយ​ប្រេងឥន្ធនៈ នៅ​កម្ពុជា​ដដែល គឺ​ចំនួន ៦,៥ សេន​ដុល្លារ ក្នុង ១ លីត្រ​៕/V​