​ប្រែ​សម្រួលៈ​បំណង​(​ដេល្លី​ម៉េល​)៖ ក្រុមហ៊ុន​ជប៉ុន​មួយ​បាន​បញ្ជូន​យាន​របស់​ខ្លួន​ទៅ​កាន់​ឋាន​ព្រះ​ចន្ទ​កាលពី​ថ្ងៃអាទិត្យ​តាម​រ៉ុក្កែត​SpaceX​មួយ​ជាមួយនឹង​យាន​ត្រាច់​ចរណ៍​លើ​ព្រះ​ចន្ទ​របស់​អារ៉ាប់​រួម​​អេ​មីរ៉ា​ត​និង​រ៉ូ​បូត​ដូច​ប្រដាប់​ក្មេង​លេង​មួយ​របស់​ជប៉ុន​ដែល​ត្រូវបាន​រចនា​ឡើង​ដើម្បី​បើក​ស្រាវជ្រាវ​លើ​ផ្ទៃ​ពោរពេញ​ដោយ​ធូលី​ពណ៌​ប្រផេះ​របស់​ព្រះ​ចន្ទ​។​

​វា​នឹង​ចំណាយពេល​ជិត​ប្រាំ​ខែ​ដើម្បី​យាន​ចុះចត​នេះ​និង​គ្រឿង​បរិក្ខា​រស្រាវជ្រាវ​របស់​វា​ទៅដល់​ព្រះ​ចន្ទ​។​

​ក្រុមហ៊ុន​បាន​រចនា​យាន​របស់​ខ្លួន​អោយ​ប្រើ​ឥន្ធនៈ​តិច​បំផុត​ដើម្បី​សន្សំ​លុយ​និង​ទុកន្លែង​សំរាប់ដាក់​របស់​ផ្សេង​។​ដូច្នេះ​វា​ជ្រើស​យក​វិធី​ធ្វើដំណើរ​យឺត​និង​ប្រើ​ថាមពល​តិច ដោយ​ហោះ​១,៦​លាន​គីឡូម៉ែត្រ​​ចេញពី​ផែនដី​មុន​បញ្ជូន​សញ្ញា​មកកាន់​ផែនដី​និង​ឆ្លង​ចូល​បរិយាកាស​ព្រះ​ចន្ទ​នៅ​ចុងខែ​មេសា​។​

​ខុស​ពី​យាន​Orion​របស់​អង្គការ​ណា​សា ដែល​ចំណាយ​ពេល​តែ​ប្រាំ​ថ្ងៃ​ទៅដល់​ព្រះ​ចន្ទ​កាលពី​ខែ​មុន​។​

​យាន​ចុះចត​របស់​ក្រុមហ៊ុន​ispace​មានបំណង​ចុះ​នៅ​មាត់​រណ្តៅ​Atlas​នៅ​ប៉ែក​ឦសាន​របស់​ព្រះ​ចន្ទ ដែល​មាន​មាត់​រណ្តៅ​៨៧​គីឡូម៉ែត្រ​និង​ជំរៅ​២​គីឡូម៉ែត្រ​។​ជាមួយ​នឹង​ជើង​បួន​របស់​វា យាន​ចុះចត​​នេះ​មាន​កំពស់​២,៣​ម៉ែត្រ​។​

​ជាមួយនឹង​ផ្កាយរណប​វិទ្យាសាស្ត្រ​មួយ​ដែល​បាន​និងកំពុងហោះនៅ​ជុំវិញ​ភព​អង្គារ​រួចហើយ ប្រទេស​អារ៉ាប់​រួម​អឹមី​រ៉ា​តក៏ចង់​សិក្សា​ស្រាវជ្រាវ​ព្រះចន្ទ​ផងដែរ​។​យាន​ត្រាច់ចរណ៍​របស់ខ្លួន ឈ្មោះ​Rashid មាន​ទម្ងន់​១០​គីឡូក្រាម ហើយ​នឹង​ធ្វើ​ការសិក្សា​ស្រាវជ្រាវ​លើ​ផ្ទៃ​ព្រះ​ចន្ទ​ប្រមាណ​ដប់​ថ្ងៃ​។​

​រ៉ុក្កែត SpaceX Falcon 9 ជាមួយនឹង​យាន​ចុះចត​ឋាន​ព្រះ​ចន្ទ​ចំនួន​ពីរ ចេញដំណើរ​ពី​កន្លែង​បាញ់​បង្ហោះ​ខេ​ប កា​ណា​វឺ​រ៉ាល់ សហរដ្ឋ​អាម៉េរិក​កាលពី​ថ្ងៃ​១១​ធ្នូ

​យាន​ចុះចត​នេះ​ក៏​កំពុង​នាំ​ទៅ​ជាមួយ​ស្វែរ​ប៉ុន​ផ្លែ​ក្រូ​ចមួយ​ទៅ​ពី​ទីភ្នាក់ងារ​អវកាស​ជប៉ុន ដែល​នឹង​ប្រែ​ទៅ​ជា​រ៉ូបូ​តនៅលើ​ព្រះ​ចន្ទ​។​អាគុយ​ស្ងួត​មួយ កុំព្យូទ័រ​ជាមួយនឹង​បញ្ញា​សិប្បនិម្មិត​សំរាប់​​សំគាល់​សណ្ឋាន​ដី និង​កាម៉េរ៉ា​៣៦០​ដឺ​ក្រេក៏ត្រូវបានបញ្ជូនទៅជាមួយផងដែរ​៕