​ប្រែ​សម្រួលៈ​បំណង​(abc.net.au)៖​អតីត​ប្រធានាធិបតី​រុស្ស៊ី លោក ឌី​មី​ទ្រី មេ​វ៉េ​ដេ​វ​(Dmitry Medvedev)​បាន​អះអាង​ថា ប្រទេស​លោក​កំពុង​បង្កើន​ការផលិត​សព្វាវុធ​ជំនាន់​ថ្មី​ដើម្បី​ការពារ​ខ្លួន​​ពីស​ត្រូវ​នៅ​អឺរ៉ុប អាម៉េរិក​និង​អូស្ត្រាលី​។​

​អតីត​មេដឹកនាំ​រុស្ស៊ី​ដែល​នៅតែ​មាន​ឥទ្ធិពល​ក្នុង​ជួរ​ដឹកនាំ​របស់​រដ្ឋាភិបាល​ទីក្រុង​មូ​ស្គូ​រូបនេះ បាន​និយាយ​នៅក្នុងតេឡេ​ក្រាម​ថា​«​យើង​កំពុង​បង្កើន​ការផលិត​មធ្យោបាយ​បំផ្លិចបំផ្លាញ​ខ្លាំង​បំផុត រួមមាន​​សព្វាវុធ​ផ្អែកលើ​គោលការណ៍​ថ្មី​។​សត្រូវ​របស់​យើង​ឈរជើង​រឹងមាំ​មិន​ត្រឹមតែ​នៅ​ខេត្ត​គៀវ (Kyiv province )​នៃ​ដែនដី​ម៉ា​ឡូ​រ៉ូ​ស​ស៊ីយ៉ា​(Malorossiya)​ដែល​ជា​ទឹកដី​ដើម​របស់​យើង​នៅ​សតវត្សរ៍​ទី​១៧ប៉ុណ្ណោះទេ​។​

​លោក​ចង់​និយាយ​ដល់​ចក្រភព​រុស្ស៊ី​ដែល​អ៊ុយ​ក្រែនជា​ផ្នែក​មួយ​នៅ​ក្រោម​ការគ្រប់គ្រង​របស់​ស្តេច​សារ​។​

​អតីត​ប្រធានាធិបតី​រុស្ស៊ី លោក ឌី​មី​ទ្រី មេ​វ៉េ​ដេ​វ​(ឆ្វេង) ចាប់តាំងពី​រុស្ស៊ី​បញ្ជូន​កងកម្លាំង​ចូល​អ៊ុយ​ក្រែន​កាលពី​ខែ​កុម្ភៈ លោកតែង​និយាយ​អួត​អំពី​សព្វាវុធ​រុស្ស៊ី​និង​គំរាម​ប្រើ​នុយក្លេអ៊ែ​រ​

​បន្ទាប់មក​លោក​បាន​ធ្វើ​ការចោទប្រកាន់​មិន​ត្រឹមត្រូវ​អំពី​ភក្តីភាព​ចំពោះ​ការ​ប្រព្រឹត្ត​បែប​ណា​ស៊ី​នៅក្នុង​ប្រទេស​លោកខាងលិច រួម​មាន​អូស្ត្រាលី​និង​នូវ៉ែល​សេ​ឡង់​។​លោក​ថា​«​នៅ​អឺរ៉ុប អាម៉េរិក​ខាងជើង​​ជប៉ុន អូស្ត្រាលី នូវ៉ែល​សេ​ឡង់​និង​កន្លែង​មួយ​ចំនួន​ទៀត​សុទ្ធតែបាន​សន្យា​ភក្តីភាព​ចំពោះ​ពួកណា​ស៊ី​»​ ដោយលោកចង់និយាយសំដៅក្រុមមេដឹកនាំអ៊ុយក្រែន។

​លោក​មេ​វ៉េ​ដេ​វ ដែល​ក៏​ជា​អនុប្រធាន​ក្រុមប្រឹក្សាសន្តិសុខ​រុស្ស៊ី មិន​បាន​ផ្តល់​ព័ត៌មាន​លម្អិត​អំពី​សព្វាវុធ​ខ្លាំង​បំផុត​នេះ​ទេ​។​

​ប្រធានាធិបតី​រុស្ស៊ី លោក​វ្ល៉ា​ឌី​មៀ ពូ​ទីន បាន​និយាយ​ជាច្រើន​ដង​មក​ហើយ​ថា រុស្ស៊ី​បាននិងកំពុង​ដាក់ពង្រាយ​សព្វាវុធ​ប្រទេស​ថ្មី​រួមមាន សព្វាវុធ​លឿន​ជាង​សម្លេង ដែល​លោក​អួតថា​អាច​ជម្នះ​គ្រប់​ប្រព័ន្ធ​​ការពារ​ប្រឆាំង​កាំជ្រួច​ដែល​កំពុង​មាន​លើ​លោក​ទាំងអស់​៕