​ប្រែ​សម្រួលៈ​បំណង​(​បាងកក​ប៉ុស្តិ៍​,​ស្ត្រេត​ថែមស៍​)៖ គណបក្ស​ភឿ​ថៃ​ដែល​ជា​បក្សប្រឆាំង​ថៃ​ធំ​បំផុត កាល​ពី​ម្សិលមិញ​បាន​ប្រកាស​ថា​នាង​«​ភែត​ង​តា​ន “​អ៊ុង​-​អ៊ីង​” ស៊ីណា​វ៉ាត​- Paetongtarn”Ung-ing” Shinawatra»​ដែល​ជា​ប្រធាន​ក្រុម​”​គ្រួសារភឿ​ថៃ​”​និង​ជា​កូនស្រី​របស់​អតីត​នាយករដ្ឋមន្ត្រី​ថាក់ស៊ីន ស៊ីណា​វ៉ាត នឹង​ជា​បេក្ខជន​ម្នាក់​ក្នុងចំណោម​បេក្ខជន​ជាច្រើន​របស់​បក្ស​សំរាប់​តំណែង​នាយក​រដ្ឋ​​មន្ត្រី​ក្នុង​ការបោះឆ្នោត​នាពេលខាងមុខ​។​

​ក្នុង​យុទ្ធនាការ​មួយ នាយក​គំរោង​”​គ្រួសារភឿ​ថៃ​” លោក​ណាត់​ថាវុ​ធ សាយ​គឿបា​ននិយាយថា វា​ច្បាស់លាស់​ណាស់​ថា នាងភែ​តង​តាន ជា​បេក្ខជន​ត្រឹមត្រូវ​ម្នាក់ ហើយ​គណបក្ស​នឹង​ប្រកាស​បេក្ខជន​ពីរ​នាក់​​ទៀត​សំរាប់​សាធារណជន​ពិចារណា​នៅ​ប៉ុន្មាន​ថ្ងៃ​ខាងមុខ​។​

​ភែត​ង​តា​ន ស៊ីណា​វ៉ាត កំពុង​លេចធ្លោ​ជា​បេក្ខជន​នាយករដ្ឋមន្ត្រី​នៃ​បក្សប្រឆាំង​ធំ​បំផុត​របស់​ថៃ​

​ក្នុង​សុន្ទរកថា​ទៅកាន់​អ្នកគាំទ្រ​ភឿ​ថៃ​(Pheu Thai)​នៅ​ភាគខាងត្បូង​ប្រទេស លោក​អំពាវនាវ​អោយ​អ្នកគាំទ្រ​ប្រើ​សន្លឹកឆ្នោត​របស់​គេ​ដើម្បី​រារាំង​កុំអោយ​នាយករដ្ឋមន្ត្រី​ប្រា​យុទ្ធ ចាន់​អូ​ចា បន្ត​នៅ​ក្នុង​​អំណាច​និង​ថា​មាន​តែ​ជ័យជម្នះ​ភ្លូកទឹកភ្លូកដី​ទេ​ទើប​អាច​រារាំង​មិនអោយ​ប្រា​យុទ្ធ​វិល​មក​កាន់​អំណាច​បាន និង​ថា​«​បើ​អ្នក​បោះឆ្នោត​អោយ​គណបក្ស​ផ្សេងៗ នោះ​ឧត្តមសេនីយ៍ប្រា​យុទ្ធអា​ចនឹង​វិល​​មក​កាន់​អំណាច​ដដែល​។​តែបើ​បោះឆ្នោត​អោយ​ភឿ​ថៃ អ្នក​នឹង​បាន​នាយករដ្ឋមន្ត្រី​ដែល​គណបក្ស​តែងតាំងឡើង​»​។​

​ក្នុង​យុទ្ធនាការ​អតីត​មេដឹកនាំ​ក្រុម​អាវ​ក្រហម​រូបនេះ​ក៏​បាន​សន្យាថា​នឹង​បង្កើន​កំរៃ​ឈ្នួល​ទាប​បំផុត​៦០០​បាត​(​ជិត​២០​ដុល្លារ​)​ក្នុង​មួយថ្ងៃ​បើសិនជា​ភឿ​ថៃ​ឈ្នះឆ្នោត​អាច​បង្កើត​រដ្ឋាភិបាល ជា​អ្វី​ដែល​​ជា​ផ្នែក​នៃ​ទស្សនវិស័យ​របស់ភែ​តង​តាន​សំរាប់​ប្រទេស​ថៃ​។​

​នៅ​លើ​វេទិកា​ឃោសនា ភែត​ង​តា​ន ក៏​បាន​បញ្ជាក់​អះអាង​អំពី​ទស្សនវិស័យ​របស់​លោក​ស្រី​ឡើង​វិញ​មុន​សន្យាថា ការ​ឡើងថ្លៃ​ថាមពល​ជាអាទិ​ភាគ​របស់​រដ្ឋាភិបាល​បក្ស​ភឿ​ថៃ​។​លោកស្រី​ក៏​បាន​និយាយថា​​ថ្លៃ​ជ័រកៅស៊ូ​ទាប បញ្ហា​ក្នុង​វិស័យ​នេសាទ និង​ការ​រីកសាយ​នៃ​បទល្មើស​ថ្នាំញៀន​ក៏​ជា​អាទិភាព​ត្រូវ​ដោះស្រាយ មុន​លោក​ស្រី​ងាក​ទៅ​សន្យា​ធ្វើ​អោយ​ប្រសើរ​ឡើង​ផ្លូវដែក​ភ្ជាប់​ចិន​មក​ថៃ​និង​សិង្ហ​បុរី​។​

​ការប្រកាស​បេក្ខភាព​របស់​កូន​ថាក់ស៊ីន​កើតឡើង​ចំពេល​ការស្ទង់មតិ​មួយ​បង្ហាញថា​គណបក្ស​ភឿ​ថៃ​មាន​ឳ​កាស​ខ្ពស់​ជាងគេ​ក្នុង​ការបង្កើត​រដ្ឋាភិបាល​នាពេល​ខាងមុខ​ក្រោយ​ការបោះឆ្នោត​សកល​នៅ​​ឆ្នាំក្រោយ​។​

​យោង​តាម​ការស្ទង់មតិ​ដោយ​វិទ្យាស្ថាន​NIDA​ដែល​ចេញផ្សាយ​កាលពី​ថ្ងៃអាទិត្យ គណបក្ស​ភឿ​ថៃ​ទទួល​បាន​ជំនឿ​ទុកចិត្ត​៧៣​ភាគរយ​ក្នុងចំណោម​អ្នក​ត្រូវបាន​សាកសួរ​យោបល់​ចំនួន​១.៣១០​នាក់​នៅ​ទូ​​ទាំង​ប្រទេស ដោយ​ពួកគេ​និយាយ​ថា​បក្សប្រឆាំង​នេះ​មាន​ឳ​កាស​ខ្ពស់​ក្នុង​ការដឹកនាំ​ប្រទេស​។​

​ចំណែក​គណបក្ស ផា​ឡាំង ប្រា​ចា​រ៉ា​ត​(Palang Pracharath)​ដែល​កំពុង​ដឹកនាំ​រដ្ឋាភិបាល​ចំរុះ​បច្ចុប្បន្ន ទទួលបាន​ជំនឿ​ចិត្ត​ពី​អ្នក​ត្រូវបាន​ស្ទង់​មតិ​ត្រឹមតែ​៣១​ភាគរយ​។​

​ចំណាត់ថ្នាក់​ទី​ពីរ គឺ​បក្សប្រឆាំង​ចលនា​ទៅមុខ​( Move Forward)​ទើប​លេច​មុខមាត់​ថ្មី ដែល​ពេញនិយម​ក្នុងចំណោម​យុវជន​ថៃ​។​បក្ស​នេះ​ទទួលបាន​ការគាំទ្រ​៤១​ភាគរយ​ពី​អ្នក​ត្រូវបាន​សាកសួរ​។​

​សូមបញ្ជាក់​ថា គណបក្ស​ភឿ​ថៃ​បាន​ចាប់ផ្តើម​យុទ្ធនាការ​រក​សម្លេង​ឆ្នោត​នៅ​ខែ​នេះ​ដោយ​ស្វះស្វែង​បញ្ចប់​ការគ្រប់គ្រង​ស៊ីវិល​គាំទ្រ​ដោយ​ក្រុម​យោធា​។​វា​សន្យា​ដំឡើង​ប្រាក់​កំរៃ​ឈ្នួល​អប្បរមាដ​ល់​ទៅ​៧០​ភាគរយ​នៅ​យ៉ាងយូរ​ត្រឹម​ចុង​អាណត្តិ​បួន​ឆ្នាំ​របស់​ខ្លួន និង​ជំរុញ​កំណើន​សេដ្ឋកិច្ច​អោយ​ដល់​៥​ភាគរយ​ក្នុង​មួយ​ឆ្នាំ​បើសិនជា​ខ្លួន​ឈ្នះ​ការបោះឆ្នោត​អាច​បង្កើត​រដ្ឋាភិបាល​បាន​នៅក្នុង​ការបោះឆ្នោត​សកល​​មួយ​ដែល​ទំនងជា​នឹង​ធ្វើឡើង​នៅ​ខែ​មីនា​ឆ្នាំ​២០២៣​។​

​ភឿ​ថៃ​បាន​និយាយថា ខ្លួន​មាន​បំណង​ដណ្តើម​ជ័យជម្នះ​ភ្លូកទឹកភ្លូកដី​ជាមួយនឹង​អាសនៈ​សភា​ជាង​ពាក់កណ្តាល​ក្នុង​សភា​ដែល​មាន​៥០០​អាសនៈ​៕