​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ កំពូល​អ្នក​ប្រដាល់​ហ្វីលីពីន មែន​នី ប៉ាក​គី​អៅ​បាន​ត្រឡប់​មក​សង្វៀន​វិញ​កាលពី​ថ្ងៃអាទិត្យ​ទី​១១​ធ្នូ​ជា​លើកដំបូង​ចាប់តាំងពី​ចូលនិវត្តន៍​ពី​វិស័យ​កីឡា​ប្រដាល់​​កាលពី​ឆ្នាំមុន ដោយ​ប្រឈម​មុខ​ជាមួយ​តារា YouTuber កូរ៉េខាងត្បូង​នៅក្នុង​ការប្រកួត​មិត្តភាព​មួយ​នៅ​ជិត​ទីក្រុង​សេ​អ៊ូ​ល​។​

​អ្នក​ប្រដាល់​វ័យ ៤៣ ឆ្នាំ​ប្រែក្លាយ​អ្នកនយោបាយ​រូបនេះ​បាន​ដើរចេញ​ពី​កីឡាប្រដាល់​ដើម្បី​ចាប់ផ្តើម​ការ​ប្រជែង​តំណែង​ប្រធានាធិបតី​ហ្វីលីពីន តែ​បរាជ័យ​។ លោក​ក៏​ធ្លាប់ធ្វើ​ជា​ព្រឹទ្ធ​សមាជិក​ចន្លោះ​ឆ្នាំ​២០១៦​ដល់​ខែ​ឧសភា​ឆ្នាំ​នេះ​ផង​ដែរ​។​

​កាលពី​ថ្ងៃអាទិត្យ ប៉ាក​គី​អៅ​បាន​ប្រកួត​ជា​មួយ ឌី​ឃេ យូ (D.K. Yoo) ក្នុង​កម្មវិធី​ប្រកួត​មិត្តភាព​មួយ​នៅ​ជាយ​រដ្ឋធានី​កូរ៉េខាងត្បូង ដើម្បី​រៃ​អង្គាស​ប្រាក់​សម្រាប់​អ៊ុយ​ក្រែ​ន​និង​ប្រជាជន​ហ្វីលីពីន​​ដែល​គ្មាន​ផ្ទះសម្បែង​។​

​ស្លៀកពាក់​ឈុត​រ៉ូប​ពណ៌​ក្រហមភ្លឺ​ចែងចាំង​ជាមួយនឹង​ជាយ​ក្រណាត់​ពណ៌​មាស ប៉ាក​គី​អៅ​បាន​ឡើង​ទៅលើ​សង្វៀន KINTEX ក្នុង​ទីក្រុង​ហ្គោ​យ៉ាង (Goyang) ក្រោម​ការស្រែក​ហ៊ោ​ដ៏​រំភើប​ពី​មហាជន​។​

​សម្រាប់​គូប្រកួត​របស់គាត់ យូ ដែល​ជា​អ្នកលេង​ក្បាច់គុន​និង​ជា​តារា​អ៊ីនធឺណិត វា​គ្រាន់តែ​ជា​លើក​ទី​ពីរ​ប៉ុណ្ណោះ​នៅក្នុង​សង្វៀន​ប្រដាល់​ខណៈ​ការប្រកួត​ពី​មុន​របស់​គេ​គឺ​ការប្រកួត​មិត្តភាព​ជា​មួយ​​អតីត​អ្នក​ប្រដាល់ UFC ប្រ៊ែត​លី ស្កុត (Bradley Scott)​។​

​យូ ដែល​មាន​រហស្សនាម​ថា “​ប្រ៊ូ​ស លី កូរ៉េ​” នៅក្នុង​ប្រទេស​កំណើតរ​បស់​គេ មិនមែន​ជា​ដៃគូ​របស់​ប៉ា​គី​អៅ​ទេ ត្បិត​មាន​កម្ពស់​ខ្ពស់​និង​ធ្ងន់​ជាង​ក៏ដោយ​។​

​កីឡាករ​កូរ៉េខាងត្បូង​រូប​នេះ​មាន​ភាព​នឿយហត់​និង​អស់ខ្យល់​រលីង​នៅ​ទឹក​ទី​២ ខណៈ​ប៉ាក​គី​អៅ​បញ្ជូន​កណ្តាប់ដៃ​រហ័ស​ចូល​មុខ​យ៉ាង​សន្ធាប់​។​

​ប៉ាក​គី​អៅ ដែល​នឹង​មាន​អាយុ ៤៤ ឆ្នាំ​នៅ​សប្តាហ៍​ក្រោយ គឺជា​អ្នកឈ្នះ​ដោយ​ការសម្រេច​ចិត្តជា​ឯកច្ឆ័ន្ទ ហើយ​បាន​បង្ហើប​តម្រុយ​ថា ការបង្ហាញ​ខ្លួន​នៅ​លើ​សង្វៀន​កាន់តែ​ច្រើន​ឡើង​អាច​នឹង​មាន​នាពេលខាងមុខ​។​

​ក្នុង​បទ​សម្ភាស​តាម​ទូរទស្សន៍ គាត់​បាន​និយាយថា​គាត់​នឹង​បន្ត​ហ្វឹកហាត់​ដើម្បី​រឹងមាំ​ដូចដើម​វិញ​។ នៅពេល​សួរ​អំពី​លទ្ធភាព​នៃ​ការប្រកួត​ក្នុង​ឆ្នាំ ២០២៣ គាត់​បាន​ឆ្លើយថា “​អ្នក​ចាំ​មើល​ទៅ​ដឹង​ហើយ​”៕

​ប៉ាក​គី​អៅ​ឈ្នះ​យូ​ដោយ​ការសម្រេចចិត្ត​ជា​ឯកច្ឆ័ន្ទ