ប្រែ​សម្រួលៈ​បំណង​(​ដេល្លី​ម៉េល​)៖ មន្ត្រីជាន់ខ្ពស់​របស់​អាម៉េរិក​ពីរ​រូប​បាន​ជួបពិភាក្សា​ជាមួយអនុ​រដ្ឋមន្ត្រីការបរទេ​ស​ចិន​កាលពី​ថ្ងៃអាទិត្យ​និង​ថ្ងៃ​ចន្ទ​នៅ​ទីក្រុង​ឡាង​ហ្វាង​(Langfang)​ក្បែរ​ទីក្រុង​ប៉េកាំង​ នេះ​បើ​តាម​ការបញ្ជាក់​ពី​អ្នកនាំពាក្យ​ក្រសួងការបរទេស​ចិន​កាលពី​ថ្ងៃ​ចន្ទ​។​

​អ្នកនាំពាក្យ​លោក វ៉ាង វេន​ប៊ីន បាន​ប្រាប់​អ្នកយកព័ត៌មាន​ថា អនុ​រដ្ឋមន្ត្រីការបរទេស​ទទួលបន្ទុក​កិច្ចការ​អាស៊ី​ខាងកើត ដា​នៀល ជេ គ្រី​សថិន​ប្រ៊ីង (Daniel J. Kritenbrink )​និង​នាយក​​ជាន់ខ្ពស់​សំរាប់​កិច្ចការ​ចិន​នៃ​ក្រុមប្រឹក្សា​សន្តិសុខ​ជាតិ​សេត​វិមាន​លោកស្រី ឡូ​រ៉ា រ៉ូ​សិន​ប៊ឺ​ហ្គើ​( Laura Rosenberger)​និង​អនុ​រដ្ឋមន្ត្រីការបរទេស​ចិន​លោក ស៊ី ហ្វឹង​( Xie Feng)​បាន​ផ្លាស់ប្តូ​រទស្ស​​នៈ​ស្តីពី​បញ្ហា​អន្តរជាតិ​និង​តំបន់​ដែល​ជា​ការព្រួយបារម្ភ​រួមគ្នា​។​

​លោក​វ៉ាង​បានបញ្ជាក់​ថា «​កិច្ច​ពិភាក្សា​បាន​ប្រព្រឹត្តទៅ​ដោយ​ត្រង់ៗ ស៊ី​ជំរៅ​និង​ស្ថាបនា​»​។​

​សារព័ត៌មាន​បាន​និយាយថា រដ្ឋាភិបាល​អាម៉េរិក​កំពុង​បញ្ជូន​គណៈប្រតិភូ​ថ្នាក់ខ្ពស់​របស់ខ្លួន​លើក​ដំបូង​មក​កាន់​ប្រទេស​ចិន​ចាប់តាំងពី​មេដឹកនាំ​អាម៉េរិក​និង​ចិន​បាន​សន្យា​គ្នា​កាលពី​ខែ​មុន​ថា​នឹង​ជួ​ស​​ជុ​ល​ទំនាក់ទំនង​របស់​ប្រទេស​ទាំង​ពីរ​។​

​ក្រៅ​ពី​ចិន មន្ត្រី​អាម៉េរិក​ទាំងពីរ ក៏​នឹង​ទៅកាន់​កូរ៉េខាងត្បូង​និង​ជប៉ុន​។​

​នៅ​ចិន លោកគ្រី​សថិន​ប្រ៊ីង នឹង​បន្ត​កិច្ចប្រជុំ​របស់​លោកចូ បៃ​ដិន កាលពី​ខែ​មុន​នៅ​កោះ​បាលី ជាមួយ​លោក ស៊ី ជីន​ភីង ពេល​ដែល​មេដឹកនាំ​ទាំងពីរ​បាន​សន្យា​«​បន្ត​គ្រប់គ្រង​ចាត់ចែង​ដោយ​ការទទួល​​ខុស​ត្រូវ​នូវការប្រកួតប្រជែង​រវាង​មហាអំណាច​ទាំងពីរ និង​ស្វែងរក​កន្លែង​ដែល​ត្រូវ​សហការគ្នា​» នេះ​បើ​តាម​ក្រសួង​ការបរទេស​អាម៉េរិក​។​

​ក្រសួង​បាន​បន្ថែមថា ជំនួប​របស់​លោកគ្រី​សថិន​ប្រ៊ីង ក៏​ត្រៀម​សំរាប់​ដំណើរ​ទស្សនកិច្ច​របស់​រដ្ឋមន្ត្រីការបរទេស​អាម៉េរិក​អ៊ែន​ថូ​នី ប្លីង​កិន នៅ​ចិន​នៅ​ដើមឆ្នាំ​២០២៣ ។​

​អាម៉េរិក​និង​ចិន​គឺ​ជា​មហាអំណាច​សេដ្ឋកិច្ច​ធំ​បំផុត​នៅក្នុង​លោក ដោយ​ចំណាយ​ច្រើន​ជាង​ប្រទេស​ណា​ទាំងអស់​លើ​វត្ថុធាតុដើម និង​កំពុង​ជាប់​ក្នុង​ការប្រកួតប្រជែង​យុទ្ធសាស្ត្រ​ខ្លាំងក្លា​បំផុត​។

​នៅ​កោះ​បាលី លោក​ស៊ី និង​បៃ​ដិ​ន បាន​ពិភាក្សា​បញ្ហា​វិវាទ​ជាច្រើន​រួមមាន អនាគត​កោះ​តៃវ៉ាន់ ការ​រឹតត្បិត​របស់​អាម៉េរិក​លើ​ការ​នាំចូល​ទំនិញ​បច្ចេកវិទ្យា​ជាន់ខ្ពស់​ចិន និង​ឥទ្ធិពល​របស់​ចិន​ដើម្បី​ដាក់​​ឥទ្ធិពល​នៅ​ទូទាំង​ពិភពលោក​។​បៃ​ដិនបាន​ចាកចេញ​ពី​ជំនួ​ន​នោះ​ជាមួយនឹង​សម្តី​ថា​«​មិន​ត្រូវការ​សង្គ្រាមត្រជាក់​ណាមួយ​»ឡើយនៅ​ពេល​លោក​ស៊ី​បាន​ប្រាប់​លោកបៃ​ដិនថា «​មិន​ថា​តិច​ឬ​ច្រើន​ទេ​ ប្រទេស​ទាំង​ពីរ​ត្រូវតែ​មាន​ផលប្រយោជន៍​រួម​គ្នា​»៕