ដោយៈ មុនី​រ័ត្ន​/​ភ្នំពេញៈ សម្ដេច​ក្រឡាហោម ស ខេង នាយករដ្ឋមន្ដ្រី​ស្ដីទី បាន​បញ្ជា​ឲ្យ​សមត្ថកិច្ច​ពាក់ព័ន្ធ​ធ្វើការ​ស្រាវជ្រាវ​រក​ប្រភព​ឲ្យ​ច្បាស់ ដើម្បី​ចាប់ខ្លួន​មេក្លោង​ជិត ៩០០​គីឡូក្រាម យកមក​ផ្តន្ទាទោស​តាមច្បាប់​។ ការបញ្ជា​ឲ្យ​ស្រាវជ្រាវ​វែកមុខ​ក្រុម​ឧក្រិដ្ឋជន​ជួញដូរ​គ្រឿងញៀន​ទម្ងន់​ជិត ១​តោន បាន​ធ្វើឡើង​នៅក្នុង​ទិវា​ជាតិ​ប្រឆាំង​ការ​ជួះ​ដូរ​មនុស្ស ១២ ធ្នូ ឆ្នាំ​២០២២ លើក​ទី​១៦ កាលពី​រសៀល​ថ្ងៃទី​១២ ខែធ្នូ ឆ្នាំ​២០២២ នៅ​សាល​មហោស្រព​កោះ​ពេជ្រ​។​

​សម្ដេច​ក្រឡាហោម ស ខេង បាន​មានប្រសាសន៍ថា កាលពី​ថ្ងៃទី​១១ ខែធ្នូ ម្សិលមិញ​នេះ មាន​ករណី​គ្រឿងញៀន​ដែល​សមត្ថកិច្ច​បាន​បង្ក្រាប​ជិត​៩០០​គីឡូក្រាម សមត្ថកិច្ច​កំពុង​ធ្វើ​កិច្ចការងារ​នេះ​បន្ដទៀត​។ ប្រសិនបើ​គ្រាន់តែ​ប្រមូល​គ្រឿងញៀន ​នេះ​បានមក តែ​មិនបាន​ចាប់​ឧក្រិដ្ឋជន មេក្លោង ឬ​អ្នកជួញដូរ​គ្រឿងញៀន​មក​ដាក់ទោស ហាក់ដូចជា​បេសកម្ម​របស់​យើង​មិនទាន់​ចប់​ទេ ហើយក៏​មិនទាន់​ជោគជ័យ​ដែរ​។ អ្វីដែល​ហៅថា ជោគជ័យ គឺ​ចាប់​ជនល្មើស​មក​ដាក់ទោស ទើប​ហៅថា​ជោគជ័យ ព្រមទាំង​ស្រាវជ្រាវ​បន្ដ​បទល្មើស​ដ៏ទៃទៀត រហូត​ឈានទៅដល់​បទល្មើស​សម្អាត​ប្រាក់ បញ្ហា​ទាំងនេះ គឺជា​បញ្ហា​ដ៏​សំខាន់​របស់​កម្ពុជា​ផងដែរ​។​

​គួរ​បញ្ជាក់ថា កម្លាំង​កង​រាជ​អ​វុ​ធ​ហត្ថ​ខេត្ត​ព្រះសីហនុ បាន​បើក​ប្រតិបត្តិ​ការបង្ក្រាប​ករណី​ជួញដូរ​គ្រឿងញៀន​ទ្រង់ទ្រាយ​ធំ​ដែលមាន​ទម្ងន់​ជិត ៩០០​គីឡូក្រាម​ការ កាលពី​រសៀល​ថ្ងៃទី​១១ ខែធ្នូ ឆ្នាំ​២០២២​នេះ នៅ​ចំណុចឃ្លាំង​ជួល​មួយកន្លែង ស្ថិតនៅ​ក្រុម​៩ ភូមិ​២ សង្កាត់​លេខ​១ ក្រុងព្រះសីហនុ​។ ប្រតិបត្តិ​ការបង្ក្រាប​នេះ រកឃើញ​ថ្នាំញៀន​ចំនួន ៣៤​បាវ ដែលមាន​ទម្ងន់ ៨៨៤ គីឡូក្រាម​។ វត្ថុតាង​ត្រូវបាន​យកមករ​ក្យា​ទុក​នៅ​បញ្ជាការដ្ឋាន​កងរាជអាវុធហត្ថ​ខេត្ត​ព្រះសីហនុ ដើម្បី​បន្ត​នីតិវិធី​។​

​លោក​ឧត្ដមសេនីយ៍ត្រី ហេង ប៊ុន​ទី មេបញ្ជាការ​កងរាជអាវុធហត្ថ​ខេត្ត​ព្រះសីហនុ បាន​ឲ្យ​ដឹងថា ប្រតិបត្តិការ​នៃ​ការចុះ​បង្ក្រាប​ករណី​ជួញដូរ​គ្រឿងញៀន​ដ៏​ធំ​នេះ គឺ​ក្រោម​ការបញ្ជា​ផ្ទាល់​នាយ​ឧ​ត្ត​ម​សេនីយ៍ សៅ សុខា អគ្គ​មេបញ្ជាការរង និង​ជា​មេបញ្ជាការ​កងរាជអាវុធហត្ថ​លើ​ផ្ទៃ​ប្រទេស និង​លោក គួច ចំរើន អភិបាល នៃ​គណៈ​អភិបាលខេត្ត​ព្រះសីហនុ ក្រោម​ការសម្របសម្រួល​នីតិវិធី ពី​លោក ចន្ទ ដា​រិ​ទ្ធ ព្រះរាជអាជ្ញារង អយ្យា​ការ​អម​សាលាដំបូង​ខេត្ត​ព្រះសីហនុ បាន​បើក​ការស្រាវជ្រាវ​រហូត​ឈានទៅដល់​ការបង្ក្រាប​ករណី​ជួញដូរ​គ្រឿងញៀន រកឃើញ​គ្រឿងញៀន​ជិត​៩០០​គីឡូក្រាម​។ វត្ថុតាង​ត្រូវបាន​យកមករ​ក្យា​ទុក​នៅ​បញ្ជាការដ្ឋាន​កងរាជអាវុធហត្ថ​ខេត្ត​ព្រះសីហនុ ដើម្បី​បន្ត​នីតិវិធី​។​

​លោក​ឧត្ដមសេនីយ៍ត្រី ហេង ប៊ុន​ទី បញ្ជាក់ថា ចំពោះ​ក្រុម​ជនសង្ស័យ​កម្លាំង​មន្ទីរជំនាញ​បាន​ពន្លាត​ដែនដី​សមត្ថកិច្ច​ទៅតាម​រាជធានី​-​ខេត្ត ដើម្បី​ស្វែងរក​មុខសញ្ញា​ពាក់ព័ន្ធ តាម​ជំនាញ ដោយ​ប្រើពេល​សហការ​ជាមួយ​សមត្ថកិច្ច ដែនដី​ពាក់ព័ន្ធ​៕​/R