​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ រដ្ឋាភិបាល​បា​ហា​ម៉ា​សបាន​និយាយថា លោក សាម ប៊ែង​មែន ហ្វ្រា​យ (Sam Bankman-Fried)​ដែល​ជា​សហ​ស្ថាបនិក​ដ៏​អាម៉ាស់​និង​ជា​អតីត​ប្រធាន​ក្រុម​​ហ៊ុន​រូបិយប័ណ្ណ​ឌីជីថល FTX ត្រូវបាន​ចាប់ខ្លួន​នៅ​ប្រទេស​បា​ហា​ម៉ាស​កាលពី​ថ្ងៃ​ចន្ទ​ទី​១២​ធ្នូ​។​

​អគ្គ​រដ្ឋអាជ្ញា​របស់​បា​ហា​ម៉ា​សបាន​និយាយ​នៅក្នុង​សេចក្តីថ្លែងការណ៍​មួយ​ថា ការឃាត់ខ្លួន​ប៊ែង​មែន ហ្វ្រា​យ ធ្វើឡើង បន្ទាប់​ពី​ការជូនដំណឹង​ពី​សហរដ្ឋ​អាម៉េរិក​ថា អាម៉េរិក​បាន​ធ្វើ​ការចោទប្រកាន់​​ពី​បទ​ព្រហ្មទណ្ឌ​ប្រឆាំង​នឹង​គាត់​។ អាជ្ញាធរ​ក្នុង​ប្រទេស​ទាំង​ពីរ​បាន​កំពុង​ស៊ើបអង្កេត​ការជាប់​ពាក់ព័ន្ធ​របស់​គាត់​ក្នុង​ការដួលរលំ​ក្រុមហ៊ុន​នេះ​ក្នុង​ខែវិច្ឆិកា​។​

​នៅក្នុង​សេចក្តីថ្លែងការណ៍​មួយ រដ្ឋអាជ្ញា​អាម៉េរិក​សម្រាប់​សង្កាត់​ភាគខាងត្បូង​នៃ​ទីក្រុង​ញូវយ៉ក លោក ដា​មៀន វី​លលៀម (Damian Williams) បាន​និយាយថា​ការចាប់ខ្លួន​នេះ​ត្រូវបាន​ធ្វើឡើង​​តាម​សំណើ​របស់​រដ្ឋាភិបាល​អាម៉េរិក​។​

​អង្គភាព​ពាក់ព័ន្ធ​នឹង​ក្រុមហ៊ុន FTX​ជាង ១០០ បាន​ដាក់​ពាក្យសុំ​ការការពា​រការ​ក្ស័យធន​របស់​សហរដ្ឋ​អាម៉េរិក​នៅ​ថ្ងៃទី ១១ ខែវិច្ឆិកា​។ ក្រុមហ៊ុន​និង លោក​ប៊ែង​មែន ហ្វ្រា​យ​កំពុង​ប្រឈមមុខ​នឹង​ការ​​ស៊ើបអង្កេត​អំពី​លទ្ធភាព​ប្រព្រឹត្ត​ខុស​ជា​ច្រើន​នៅ​សហរដ្ឋ​អាម៉េរិក​និង​នៅ​បា​ហា​ម៉ាស ជា​កន្លែង​ដែល​ក្រុមហ៊ុន​នេះ​មាន​ទីស្នាក់ការ​កណ្តាល​នៅ​ទីនោះ​។ ​ការស៊ើបអង្កេត​សំខាន់​មួយ​ផ្តោត​លើ​ថា​តើ​មូលនិធិ​របស់​អតិថិជន​ត្រូវបាន​ឱ្យ​ខ្ចី​ទៅ​ក្រុមហ៊ុន​ពាណិជ្ជកម្ម Alameda Research ដែល​គាត់​បាន​បង្កើត​ដែរ​ឬ​អត់​។​

​នៅក្នុង​ការសម្ភាសន៍​តា​ម​ប្រព័ន្ធ​ផ្សព្វផ្សាយ​នានា​ចាប់តាំងពី​ការដួលរលំ​របស់​ក្រុមហ៊ុន FTX លោក​ប៊ែង​មែន​ហ្វ្រា​យបាន​សារភាព​កំហុស​ក្នុង​ការគ្រប់គ្រង​សំខាន់ៗ​ជាច្រើន​ប៉ុន្តែ​គាត់​បាន​អះអាង​​ផងដែរ​ថា​គាត់​មិន​ដែល​ព្យាយាម​ប្រព្រឹត្ត​ការ​ក្លែងបន្លំ ឬ​បំពាន​ច្បាប់​នោះ​ទេ​៕

​សាម ប៊ែង​មែន ហ្វ្រា​យ ត្រូវបាន​ចាប់ខ្លួន​នៅ​បា​ហា​ម៉ាស​កាលពី​ថ្ងៃ​ចន្ទ