ដោយ​: សុផល​/​ព្រះសីហនុ​: ពិធីបុណ្យ​សមុទ្រ​នៅ​ខេត្ត​ព្រះសីហនុ​នា​ឆ្នាំនេះ ដែលមាន​រយៈ ពេល​៣​ថ្ងៃ ចាប់ពី​ថ្ងៃទី​០៩ ដល់​ថ្ងៃទី​១១ ខែធ្នូ ឆ្នាំ​២០២២ មាន​ភ្ញៀវ​ទេចរ និង​ប្រជាពលរដ្ឋ​មក​កម្សាន្ត​សរុប​ចំនួន ៧១២.៦១៤ នាក់​។ នេះ​បើតាម​លោក តាំង សុចិត្រ​គ្រឹ​ស្នា ប្រធាន មន្ទីរ​ទេសចរណ៍​ខេត្ត​ព្រះសីហនុ​។​

​អម​ជាមួយ​ព្រឹត្តិការណ៍​បុណ្យ​សមុទ្រ​នេះ មាន​ព្រឹត្តិការណ៍​ជា ច្រើន ដូចជា​ការប្រកួត​កីឡា ការបង្ហាញ​នូវ​ផ្ទាំងទស្សនីយភាព​សិល្បៈ​ជាច្រើន ដែល​សម្តែង​ដោយ​តារា​ល្បីៗ បន្ថែម​ពីលើ​នោះ ក៏មាន ការតាំងពិព័រណ៍​ផលិត​ប្រើប្រាស់ ម្ហូបអាហារ ភេសជ្ជៈ និង​សេវាកម្ម​ជាច្រើន​ផ្សេង​។​

​ពិធីបុណ្យ​សមុទ្រ ត្រូវបាន​បើក​ជា​ផ្លូវ ការ​ក្រោម​អធិបតីភាព​ដ៏​ខ្ពង់ខ្ពស់​របស់​សម្ដេច​តេ​ជោ ហ៊ុន សែន នាយ​រដ្ឋមន្ត្រី​នៃ​កម្ពុជា នា​រាត្រី​ថ្ងៃទី​១០ ខែធ្នូ ឆ្នាំ​២០២២ រួមជាមួយ​ការ​ថ្លែង​សុន្ទរកថា​របស់លោក​ប​ណ្ឌិ​ត ថោង ខុន រដ្ឋមន្ត្រីក្រសួង ទេសចរណ៍ និង​លោក គួច ចំរើន អភិបាលខេត្ត​ព្រះសីហនុ​ដោយ​ផ្ដោតលើ​ចំណុច​សំខាន់ៗ​ជាច្រើន ការសម្ដែង​សិល្បៈ​របស់​សិល្បករ​ជាតិ និង​សិល្បករ​អន្តរជាតិ (​ឥណ្ឌា ម៉ាឡេស៊ី ថៃ វៀតណាម​ជាដើម​) ការសម្ដែង​របាំ និង​សិល្ប​ចម្រៀង​ប្រពៃណី​ជាដើម​។​

​លោក​ប្រធាន​មន្ទីរ​ទេសចរណ៍​ខេត្ត​ព្រះសីហនុ បាន​ឲ្យ​ដឹង​ដែរ​ថា បញ្ហា​សន្តិសុខ សណ្ដាប់ធ្នាប់​នៅ ក្នុង​ព្រឹត្តិការណ៍​បុណ្យ​សមុទ្រ​នេះ គឺ​មិនមាន​អ្វី​កើតឡើង​គួរឱ្យ​កត់ សម្គាល់​នោះឡើយ ខណៈ​ការធ្វើ ដំណើរ​នៅតាម​ដងផ្លូវ​គឺ​មានការ​មមាញឹក​បន្តិច​។​

​លោក​ប្រធាន​មន្ទីរ​បាន​បន្ថែមថា នៅក្នុង​ព្រឹត្តិការណ៍​បុណ្យ​សមុទ្រ​នេះដែរ ក៏មាន​ឆាក​ប្រគំ​តន្ត្រី​ប្រាំ​ឆាក​ធំៗ​នៅតាម​បណ្ដោយ​ឆ្នេរសមុទ្រ​នៃ​ក្រុងព្រះសីហនុ និង​សកម្មភាព​កម្សាន្ត​ជាច្រើន​ទៀត​ដែល​បាន​ជួយ​ទាក់ទាញ​ភ្ញៀវទេសចរ​យ៉ាងច្រើន​ដូច្នេះ​។​នៅវេលា​យប់​នៅមាន​ការសម្ដែង សិល្បៈ របាំ ចម្រៀង​នៅលើ​ឆាក​ធំ​នៃ​ទីលាន​តេ​ជោ ដែល​ធ្វើឡើង​ក្រោម​អធិបតីភាព​លោក​រដ្ឋមន្ត្រី ថោង ខុន និង​លោក​អភិបាលខេត្ត គួច ចំរើន​។ ភ្ញៀវទេសចរ ក៏ដូចជា​ប្រជាពលរដ្ឋ​គឺអាច​ចូល​ទស្សនា​កម្សាន្ត​ដោយ​សេរី​។​ក្រៅពីនេះ​ក៏មាន​ការតាំងពិព័រណ៍​សមិទ្ធផល​នានា គម្រោង​អភិវឌ្ឍ​តំបន់ឆ្នេរ និង​ផលិតផល​ខ្មែរ ផលិតផល​សហគ្រាស​ធុន​តូច​និង​មធ្យម ការតាំងពិព័រណ៍​ពាណិជ្ជកម្ម និង​ផលិតផល​បរទេស និង​មហោស្រព​ម្ហូបអាហារ​និង​ភេសជ្ជៈ នៅ​ទីធ្លា​តេ​ជោ សរុប​ទាំងអស់​មាន​ចំនួន​៣០០​ស្ដង់​។​

​គួរ​ជម្រាប​ថា ពិធីបុណ្យ​សមុទ្រ​លើក​ទី​៩​នេះ​រៀបចំឡើង​រយៈ ពេល​៣​ថ្ងៃ ចាប់ពី​ថ្ងៃទី​៩-១១ ខែធ្នូ ឆ្នាំ​២០២២ អម​ជាមួយនឹង​ការធ្វើជា​ម្ចាស់ផ្ទះ​រៀបចំ​មហា សន្និបាត​ក្លិប​ឆ្នេរសមុទ្រ​ដែល​ស្អាត​បំផុត​លើ​សកលលោក ចាប់ពី​ថ្ងៃទី​៩-១៤ ខែធ្នូ ក្រោម​ប្រធានបទ «​ឆ្នេរ​នៃ​សន្តិភាព ឆ្នេរ​នៃ​ក្ដីសង្ឃឹម​»៕/R