​ប្រែ​សម្រួលៈ​បំណង​(​ដេល្លី​ម៉េល​,deccanherald)៖ ទាហាន​ឥណ្ឌា​បាន​រារាំង​សម​ភាគី​ចិន​របស់គេ​មិន​អោយ​ចូល​តំបន់​ដែល​ពួកគេ​អះអាងថា​ជា​ទឹកដី​ឥណ្ឌា​កាលពី​ថ្ងៃ​៩​ធ្នូ ក្នុងការ​ប្រវាយប្រតប់​នៅត្រង់​ព្រំ​​ដែន​មាន​ជម្លោះ​ដែលនាំអោយ​មាន​ការរង​របួស​ទាំងសងខាង នេះ​បើ​តាម​លោក រ៉ា​ច​ណាត ស៊ី​ង​(Rajnath Singh) រដ្ឋមន្ត្រី​ការពារជាតិ​ឥណ្ឌា​បាន​ប្រាប់​សភា​កាលពី​ថ្ងៃ​អង្គារ​។​

​រដ្ឋមន្ត្រី​ការពារជាតិ​ឥណ្ឌា​លោក រ៉ា​ច​ណាត ស៊ី​ង​

​ការប្រឈមមុខ​ចុងក្រោយ​នេះ​បាន​កើត​ឡើង​នៅ​តំបន់​តា​វ៉ាង​(Tawang)​ក្នុង​រដ្ឋ​អា​រុន​ណា​ចា​ល់ ប្រា​ដែស​(Arunachal Pradesh)​របស់​ឥណ្ឌា​ភាគ​ឦសាន​ជាប់​ជាមួយ​ចិន​ខាងត្បូង​នេះ​បើ​​តាម​ការអះអាង​របស់​លោក​ស៊ី​ង​ហើយ​ខាង​ទាហាន​ឥណ្ឌា​មិនមាន​ស្លាប់​ឬ​រងរបួស​ធ្ងន់ធ្ងរ​ទេ​។​

​ស៊ី​ង បាន​និយាយថា​«​កងទ័ព​ចិន​បាន​ប៉ុនប៉ង​ផ្លាស់ប្តូរ​ឋានៈ​បច្ចុប្បន្ន​ជា​ឯ​តោ​ភាគី ដោយ​ទន្ទ្រាន​ចូល​ហួស​ខ្សែបន្ទាត់​គ្រប់គ្រង​ជាក់ស្តែង នៅក្នុង​តំបន់​យ៉ាង​សេ​(Yangtse)​នៃ​ផ្នែក​តា​វ៉ាង​។​កងទ័ព​របស់​​យើង​បាន​ប្រឈមការប៉ុនប៉ង​ពី​ចិន​ជាមួយនឹង​ភាពម៉ឺងម៉ាត់​។​ការ​ប្រវាយប្រតប់​គ្នា​បាន​កើតឡើង ដោយ​កងទ័ព​ឥណ្ឌា​បាន​រារាំង​កងទ័ព​ចិន​មិនអោយ​ទន្ទ្រាន​ចូល​ទឹកដី​របស់​យើង និង​បាន​បង្ខំ​អោយ​ពួក​​គេដកថយ​ទៅកាន់​ទីតាំង​របស់​គេ​វិញ​។​ទាហាន​ខ្លះ​នៅ​ភាគី​ទាំងសងខាង​បាន​រងរបួស​ក្នុងការ​ប៉ះទង្គិច​គ្នា​នេះ​»​។​

​ស្ថានទូត​ចិន​នៅ​ទីក្រុង​ញូវដែល្លី មិនអាច​សុំ​ការបញ្ជាក់​បាន​ភ្លាមៗ​នៅឡើយ​ទេ ហើយ​រដ្ឋាភិបាល​ទីក្រុង​ប៉េកាំង​ក៏​នៅ​មិនទាន់​ធ្វើការ​អត្ថាធិប្បាយ​យ៉ាងណា​អំពី​ឧបទ្ទវហេតុ​នេះ​។​

​វា​ជា​ការ​ប្រវាយប្រតប់​គ្នា​លើកដំបូង​រវាង​កងទ័ព​នៃ​ប្រទេស​ទាំង​ពីរ ចាប់តាំងពី​ការប៉ះទង្គិច​កាលពី​ខែ​មិថុនា​ឆ្នាំ​២០២០ នៅពេល​ទាហាន​ឥណ្ឌា​និង​ចិន​ក៏​ប្រើ​ដៃជើង​ប្រយុទ្ធ​គ្នា​នៅ​ជ្រលង​ភ្នំ​ហ្កា​ល់​វ៉ាន់​(Galwan)​ក្នុង​តំបន់​ឡា​ដាក់​។​ឧបទ្ទវហេតុ​នោះ​នាំ​អោយ​ទាហាន​ឥណ្ឌា​ស្លាប់​២០​នាក់ និង​ទាហាន​ចិន​ស្លាប់​បួន​នាក់​៕

​រូប​យកចេញ​ពី​វីដេអូ បង្ហាញ​ទាហាន​ឥណ្ឌា​និង​ចិន​ប៉ះទង្គិច​គ្នា​នៅ​ជ្រលង​ភ្នំ​ហ្កា​ល់​វ៉ា​ន់ក្នុង​តំបន់​ឡា​ដាក់ កាលពី​ខែ​មិថុនា ឆ្នាំ​២០២០