​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ប្រភព​ចំនួន​បី​បាន​និយាយថា ចិន​កំពុង​ធ្វើការ​លើ​កញ្ចប់​ថ​វិកា​ទ្រទ្រង់​ជាង ១ ទ្រី​លាន​យ័ន (១៤៣ ពាន់​លាន​ដុល្លារ​)​សម្រាប់​ឧស្សាហកម្ម​បន្ទះ​ឈីប​របស់​ខ្លួន​នៅ​​ក្នុង​ជំហាន​ដ៏​សំខាន់​មួយ​ឆ្ពោះទៅរក​ភាព​គ្រប់គ្រាន់​ដោយ​ខ្លួនឯង​នៅក្នុង​បន្ទះ​ឈីប​និង​ដើម្បី​ប្រឆាំង​នឹង​ចំណាត់ការ​របស់​អាម៉េរិក​ក្នុង​គោលបំណង​កាត់បន្ថយ​ភាពជឿនលឿន​ផ្នែក​បច្ចេក​​វិជ្ជា​របស់ខ្លួន​។​

​ប្រភព​បាន​និយាយថា រដ្ឋាភិបាល​ក្រុង​ប៉េកាំង​គ្រោង​នឹង​ដាក់​ចេញ​នូវ​កញ្ចប់​លើកទឹកចិត្ត​សារពើពន្ធ​ដ៏​ធំ​បំផុត​របស់​ខ្លួន​ក្នុង​រយៈពេល​ប្រាំ​ឆ្នាំ​ដែល​ភាគច្រើន​ជា​ប្រាក់ឧបត្ថម្ភ​និង​ឥណទាន​ពន្ធ​ដើម្បី​​ជំរុញ​ផលិតកម្ម​និង​សកម្មភាព​ស្រាវជ្រាវ​នៅ​ក្នុងស្រុក​។​

​ផែនការ ដែល​តាម​ប្រភព​អាច​នឹង​ត្រូវ​អនុវត្ត​ភ្លាមៗ​នៅ​ត្រីមាស​ទី​មួយ​ឆ្នាំ​ក្រោយ មិន​ត្រូវបាន​រាយការណ៍​ពីមុន​មក​ទេ​។​

​ប្រភពពីរ​ក្នុងចំណោម​នោះ​បាន​និយាយថា ជំនួយ​ផ្នែក​ហិរញ្ញវត្ថុ​ភាគច្រើន​នឹង​ត្រូវ​បាន​ប្រើ​ដើម្បី​ឧបត្ថម្ភ​ធន​លើ​ការទិញ​ឧបករណ៍​បន្ទះ​ឈីប​ក្នុងស្រុ​កដោយ​ក្រុម​ហ៊ុនចិន​ជា​ពិសេស​រោងចក្រ​បង្កើត​​បន្ទះ​ឈីប​។​

​ប្រភព​ទាំងបី​បាន​និយាយថា ក្រុមហ៊ុន​បែបនេះ​នឹង​ទទួលបាន​ការឧបត្ថម្ភ​ធន ២០ ភាគរយ​លើ​តម្លៃ​នៃ​ការទិញ​។​

​ចិន​បាន​ដាក់ចេញ​អាទិភាព​គោលនយោបាយ​ក្នុង​ការអភិវឌ្ឍ​ឧស្សាហកម្ម​បន្ទះ​ឈី​បដោយ​ឯករាជ្យ​។​

​ផែនការ​គាំទ្រ​សារពើពន្ធ​កើតឡើង​បន្ទាប់​ពី​ប្រធានាធិបតី​អាម៉េរិក​លោក ចូ បៃ​ដិន កាលពី​ខែ​សីហា បាន​ចុះហត្ថលេខា​លើ​ច្បាប់​សំខាន់​មួយ​ដើម្បី​ផ្តល់​ជំនួយ​ចំនួន ៥២,៧​ពាន់​លាន​ដុល្លារ​សម្រាប់​​ផលិតកម្ម​និង​ការស្រាវជ្រាវ​បន្ទះ​ឈីប​របស់​អាម៉េរិក​ក៏ដូច​ជា​ឥណទាន​ពន្ធ​សម្រាប់​រោងចក្រ​ផលិត​បន្ទះ​ឈីប ដែល​ប៉ាន់ស្មាន​មានតម្លៃ ២៤ ពាន់​លាន​ដុល្លារ​។​

​ប្រភព​បាន​និយាយថា ជាមួយនឹង​កញ្ចប់​លើកទឹកចិត្ត​នេះ រដ្ឋាភិបាល​ក្រុង​ប៉េកាំង​មាន​គោលបំណង​បង្កើន​ការគាំទ្រ​ដល់​ក្រុមហ៊ុន​បន្ទះ​ឈី​បចិន​ក្នុង​ការសាងសង់ ពង្រីក​ឬ​ធ្វើ​ទំនើបកម្ម​គ្រឿង​​បរិក្ខារ​ក្នុងស្រុក​សម្រាប់​ការផលិត ការ​ផ្គុំ ការ​វេច​ខ្ចប់ និង​ការស្រាវជ្រាវ​និង​ការអភិវឌ្ឍ​។​

​ពួកគេ​បាន​និយាយថា ផែនការ​ចុង​បំផុត​ក្រោយ​របស់​ទីក្រុង​ប៉េកាំង​នេះ​ក៏​រួមបញ្ចូល​ទាំង​គោលនយោបាយ​ពន្ធ​អនុគ្រោះ​សម្រាប់​ឧស្សាហកម្ម​បន្ទះ​ឈីប​របស់​ប្រទេស​ផង​ដែរ​។​

​ប្រភព​បាន​បដិសេធ​មិន​បញ្ចេញ​ឈ្មោះ ដោយសារ​ពួកគេ​មិន​មាន​សិទ្ធិ​និយាយ​ជាមួយ​ប្រព័ន្ធ​ផ្សព្វផ្សាយ​៕

ចិន​នឹង​ផលិត​បន្ទះ​ឈីប​ខ្លួនឯង​ដើម្បី​ប្រជែង​ជាមួយ​អាម៉េរិក