​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ នាយក​ប្រតិបត្តិ​ក្រុង​ហុងកុង លោក ច​ន លី (John Lee)​បាន​និយាយថា​អ្នកដំណើរ​មក​ដល់​ទីក្រុង​ហុងកុង​នឹង​មិន​មាន​ការ​រឹតបន្តឹង​លើ​ការ​បំលាស់​ទី​ដោយសារ​​រឿងកូ​វីដ​១៩​ទៀត​ទេ គិត​ចាប់ពី​ថ្ងៃ​ពុធ​ទី​១៤​ធ្នូ​តទៅ ដោយ​បន្ថែម​ថា ទីក្រុង​នេះ​ក៏​នឹង​លុបចោល App កូវី​ដ​១៩ របស់​រដ្ឋាភិបាល​ផងដែរ​។​

​ដំណឹង​នៃ​ការបន្ធូរបន្ថយ​ការទប់ស្កាត់​កូវី​ដ​១៩ បន្ថែម​ទៀត​នៅ​មជ្ឈមណ្ឌល​ហិរញ្ញវត្ថុ​ពិភពលោក​នេះ​ដែល​បាន​ដើរ​យឺត​ជាង​ពិភពលោក​ភាគច្រើន​ក្នុង​ការបន្ធូរបន្ថយ​ការ​រឹតបន្តឹង​អាច​នឹង​ជំរុញ​ការធ្វើ​​ដំណើរ​និង​ការ​ធ្វើ​អាជីវកម្ម​ឡើងវិញ​។​

​លេខ​កូដ​ពណ៌​លឿងទុំ​ដែល​បាន​ចេញ​សម្រាប់​អ្នកដំណើរ​អន្តរជាតិ​សម្រាប់​រយៈពេល​បី​ថ្ងៃ​ដំបូង​របស់​ពួកគេ​នៅក្នុង​ទីក្រុង​ហុងកុង​មានន័យថា​ពួកគេ​មិន​ត្រូវបាន​អនុញ្ញាត​ឱ្យ​ញ៉ាំ ឬ​ផឹក​នៅ​ក្នុង​បារ​និង​​ភោជនីយដ្ឋាន​នោះទេ​។​

​លោក​លី​បាន​និយាយថា ចាប់ពី​ថ្ងៃ​ពុធ​ទៅ អ្នកដំណើរ​និង​អ្នកស្រុក​ទាំងអស់​ដែល​មក​ពី​បរទេស​នឹងត្រូវ​អនុញ្ញាត​ឱ្យ​ចូល​ក្នុង​តំបន់​ទាំងអស់ ប្រសិន​បើ​ពួកគេ​ធ្វើតេស្តិ៍​អវិជ្ជ​មាន​កូ​វីដ​នៅ​ពេល​មកដល់​។​

​ចំណាត់ការ​របស់​រដ្ឋាភិបាល​ក្នុង​ការលុបចោល App​តាមដាន​បំលាស់​ទី​មនុស្ស ដែល​ផ្តល់​សិទ្ធិ​ចូល​ទៅ​កាន់​ភោជនីយដ្ឋាន​និង​ទីកន្លែង​នានា​ដូច​ជា​កន្លែង​ហាត់ប្រាណ ក្លិប និង​ហាង​កែ​សម្ផស្ស​បាន​កើតឡើង​​បន្ទាប់​ពី​ចិនដីគោក​បាន​ទម្លាក់ចោល​កិច្ច​តម្រូវ​នេះ​។​

​ក្រុម​ធុរកិច្ច អ្នកការទូត និង​អ្នកស្រុក​ជាច្រើន​បាន​ថ្កោលទោស​ច្បាប់​កូ​វីដ​របស់​ទីក្រុង​ហុងកុង ដោយ​និយាយថា ពួក​វា​បាន​គំរាមកំហែង​ដល់​ការប្រកួតប្រជែង​និង​ឋានៈ​ទីក្រុង​នេះ​ជា​មជ្ឈមណ្ឌល​ហិរញ្ញ​​វត្ថុ​អន្តរជាតិ​។​

​ច្បាប់​នេះ​បាន​ដាក់​ទម្ងន់​លើ​សេដ្ឋកិច្ច​របស់​ហុងកុង​ចាប់តាំងពី​ដើមឆ្នាំ ២០២០ ដោយ​បង្កើន​ល្បឿន​នៃ​ការចាកចេញ​របស់​អាជីវ​កម្ម ជនបរទេស និង​គ្រួសារ​ក្នុងស្រុក ដែល​បាន​ចាកចេញ​ចំពេល​មាន​ការជំរុញ​ដោយ​រដ្ឋាភិបាល​ក្រុង​ប៉េកាំង​ដើម្បី​គ្រប់គ្រង​កាន់តែខ្លាំង​លើ​អតីត​អាណានិគម​អង់គ្លេស​មួយ​នេះ​៕

​អ្នកដំណើរ​មក​ដល់​ទី​ក្រុង​ហុងកុង​នឹង​មិន​មាន​ការ​រឹតបន្តឹង​បំលាស់​ទី​រឿងកូ​វីដ​១៩​ទៀត​ទេ គិត​ចាប់ពី​ថ្ងៃ​ពុធ​ទី​១៤​ធ្នូ​តទៅ​