ប្រែ​សម្រួល : កញ្ញា​ដា​លី​ស (​អេ​ស៊ាវ័ន​) ៖ ពួក​ចោរប្លន់​ប្រដាប់អាវុធ​មួយ​ក្រុម​បាន​សម្រុកចូល​ហាង​មាស​មួយ​កន្លែង​នៅ​ខេត្ត​តាក់ (Tak) ភាគ​ខាងជើង​ប្រទេស​ថៃ​តែ​ហាក់​យឺត​ពេល​ទៅ​ហើយ​ទើប​​ដឹង​ថា​ពួកគេ​មក​រញ៉េរញ៉ៃ​ខុស​គោលដៅ​។​

​ប្រព័ន្ធ​ផ្សព្វផ្សាយ​ក្នុងស្រុក​បាន​រាយការណ៍​ថា ឧបទ្ទវហេតុ​នេះ​បាន​កើតឡើង​នៅ​ម៉ោង​ប្រហែល ១២៖៥៥ នាទី​ថ្ងៃ​ព្រហស្បតិ៍​សប្តាហ៍​មុន (​ថ្ងៃទី ៨ ខែ​ធ្នូ​)​។​

​វីដេអូ CCTV ពី​ក្នុង​ហាង​បានបង្ហាញ​បុរស​ទាំង​បួន​នាក់​បាន​មក​ដល់​តាម​ម៉ូតូ ហើយ​បើក​ការបាញ់រះ​លើ​ទ្វារ​កញ្ចក់​ហាង​។​

​ក្រោយ​ពី​ចូល​ហើយ ម្នាក់​ក្នុងចំណោម​ពួកវា​បានចាប់ផ្តើម​កាត់​រនាំង​ដែក​ដើម្បី​ទៅ​ប្រមូល​យក​គ្រឿងអលង្ការ​។​

​នោះ​ហើយ​ជា​គ្រា​ដែល​ម្ចាស់​ហាង​ឈ្មោះ ភី​ស៊ីត រ៉ា​ភី​ត​ផាន (Phisit Raphitphan) បាន​ចាត់វិធានការ​។​

​ម្ចាស់​ហាង​មាស​អាយុ​៤១​ឆ្នាំ​ត្រូវ​គេ​ស្តាប់​ឮ​ស្នូរ​កាំភ្លើង​បាញ់​ចេញ​ពី​ក្រោយ​កាមេរ៉ា​សុវត្ថិភាព ដែល​ធ្វើឱ្យ​ចោរ​ទាំង​បួន​នាក់​ភិតភ័យ រត់​ផាស់ក្រញាំ​។​

​បុរស​ម្នាក់​ក្នុងចំណោម​នោះ​ថែមទាំង​បាន​រអិល​ជើង​ដួល​លើ​កញ្ចក់​បែក​ក្នុងពេល​កំពុង​សម្រុក​រត់គេចខ្លួន​ផង​ដែរ​។​

​កាសែត Thaiger បាន​រាយការណ៍​ថា លោក​រ៉ា​ភី​ត​ផាន​បាន​បាញ់​ចំនួន​បួន​គ្រាប់​ទៀត ដែល​មួយ​គ្រាប់​បាន​ត្រូវ​ចោរប្លន់​ម្នាក់​ដែល​ក្រោយមក​ប៉ូលិស​បាន​ប្រទះឃើញ​ដេក​ក្នុង​ថ្លុកឈាម​នៅ​ខាង​​ក្រៅ​ហាង​។ របាយការណ៍​ខ្លះ​បានបញ្ជាក់​ថា បុរស​ជា​ជនជាតិ​ថៃ​នោះ​ក្រោយមក​បាន​ស្លាប់​នៅ​មន្ទីរពេទ្យ​។​

​ជនដៃដល់​ថៃ​ម្នាក់ទៀត​ដែល​រត់គេចខ្លួន​ដោយ​ថ្មើរជើង​ត្រូវបាន​ប៉ូលិស​ចាប់ខ្លួន​។ ចំណែក​ចោរ​ប្លន់​ពីរ​នាក់​ទៀត​ដែល​គេ​ជឿ​ថា​ជា​ជនជាតិ​ភូមា​បាន​រត់​គេចខ្លួន​តាម​ម៉ូតូ​បាត់​ស្រមោល​សូន្យឈឹង​។​

​ប៉ូលិស​បាន​ប្រាប់​អ្នកយកព័ត៌មាន​ថា បុរស​ថៃ​ទាំង​ពីរ​នាក់​បាន​ប្រព្រឹត្ត​អំពើ​ប្លន់​ដោយឡែក​ពីគ្នា​នៅ​ខេត្ត​តាក់​កាលពី​ថ្ងៃទី ១២ ខែ​កុម្ភៈ​ឆ្នាំ​នេះ កន្លែង​ដែល​ពួកគេ​បាន​ប្លន់​មាស​ទម្ងន់ ២,៧ គីឡូក្រាម​បានសម្រេច​។​

​គ្រូបង្ហាត់​បាញ់​កាំភ្លើង​និង​ជា​សមាជិក​នៃ​កងទ័ព​ភូមិន្ទ​ថៃ​ម្នាក់​បាន​ប្រាប់​ប្រព័ន្ធ​ផ្សព្វផ្សាយ​ថា លោក​រ៉ា​ភី​ត​ផាន​គឺជា​អ្នក​ចូលចិត្ត​កាំភ្លើង ដែល​បាន​ទទួល​ការបណ្តុះបណ្តាល​ក្នុង​ការប្រើប្រាស់​អាវុធ ហើយ​ថែមទាំង​បានឈ្នះ​ការប្រកួត​បាញ់កាំភ្លើង​ក្នុងស្រុក​ទៀតផង​។​

​រូបថត​នៅលើ​បណ្តាញ​សង្គម​បានបង្ហាញ កាំភ្លើង ដែល​លោក​រ៉ា​ភី​ត​ផាន​បាន​ប្រើ គឺ​ជា​អាវុធ​វែង​មួយ​ដើម​។ អ្នក​និយម​លេង​អ៊ីនធឺណិត​មួយចំនួន​បាន​ប្រដូច​វា​ទៅ​នឹង​កាំភ្លើង M4​ដែល​ប្រើ​ដោយ​​តារា​សម្តែង​ហូលីវូដ ឃី​នូ រី​វេស (Keanu Reeves) នៅក្នុង​ខ្សែភាពយន្ត John Wick​។​

​យោង​តាម​មេធាវី​ដែល​ផ្តល់​បទ​សម្ភាសន៍​តាម​ប្រព័ន្ធ​ផ្សព្វផ្សាយ លោក​រ៉ា​ភី​ត​ផាន​ទំនងជា​មិន​ត្រូវបាន​ចោទប្រកាន់​ពី​បទល្មើស​ណាមួយ​នោះ​ទេ ព្រោះ​គាត់​បាន​បាញ់​ប្រាំ​គ្រាប់​ទៅលើ​ក្រុមចោរ​ប្រដាប់អាវុធ​ដើម្បី​ការពារ​ខ្លួន​៕

កាំភ្លើង​វែង​របស់​ម្ចាស់​ហាង​មាស​ឈ្មោះ​រ៉ា​ភី​ត​ផាន​ធ្វើឱ្យ​ចោរ​រត់​ប្រាស់​អាយុ