​ប្រែ​សម្រួល : កញ្ញា​ដា​លី​ស (VNExpress) ៖ ម៉ារ៉ុក​មិន​មាន​ផែនការ​ជា​ក់​លា​ក់​ណាមួយ​ក្នុង​ការដោះស្រាយ​ជាមួយនឹង​គ្រោះថ្នាក់​របស់​កាយ​លៀន អឹម​បា​ហ្វេ (Kylian Mbappe)​ក្នុង​ការប្រកួត​​វគ្គ​ពាក់កណ្តាល​ផ្តាច់ព្រ័ត្រ​វើល​ខាប់​នោះទេ ដោយ​គ្រូបង្វឹក​លោក វ៉ា​លី​ដ រី​ហ្គា​ហ្គី (Walid Regragui) បាន​និយាយថា​ម្ចាស់​ជើងឯក​បារាំង​បង្ក​ការគំរាមកំហែង​ជា​លក្ខណៈ​បុគ្គល​ច្រើន​ហួសហេតុ​​ពេក​មិនអាច​ផ្តោតអារម្មណ៍​លើ​កីឡាករ​តែ​ម្នាក់​បាន​នោះ​ទេ​។​

​អឹម​បា​ហ្វេ​គឺជា​អ្នក​ស៊ុត​បញ្ចូល​ទី​ច្រើនជាងគេ​ក្នុងវើ​លខាប់​នេះ ដោយ​រកបាន ៥ គ្រាប់​ហើយ ហើយ​បាន​ក្លាយជា​កីឡាករ​គោលដៅ​តាម​ចាប់​ឱ្យ​ជាប់​ពី​សំណាក់​អង់គ្លេស​ក្នុង​វគ្គ ១/៤ ផ្តាច់ព្រ័ត្រ​កាលពី​ថ្ងៃ​សៅរ៍ ជា​កន្លែង​ដែល​រូប​គេ​លេង​មិន​ចេញ​ទាល់តែសោះ ត្បិត​បារាំង​នៅតែ​ឈ្នះ​នៅ​ទីបំផុត​ក៏​ដោយ​។​

​លោក​រី​ហ្គា​ហ្គី​បាន​ប្រាប់​សន្និសីទ​សារព័ត៌មាន​កាល​ពី​ថ្ងៃ​អង្គារ​មុន​ការប្រកួត​នៅ​កីឡដ្ឋាន Al Bayt​ថា ម៉ារ៉ុក​មិន​មាន​ផែនការ​ស្រដៀង​គ្នា​នេះ​ទេ​។​

​លោក​បាន​និយាយថា “​ខ្ញុំ​នឹង​មិន​ព្យាយាម​រៀបចំ​ផែនការ​យុទ្ធសាស្ត្រ​ពិសេស​ណាមួយ​ដើម្បី​តែ​ទប់ទល់​នឹង​កាយ​លៀន​នោះទេ​”​។​

“​បារាំង​ក៏​មាន​កីឡាករ​ល្អ​ផ្សេង​ទៀត​ដែរ​។ (​អង់​ទ័ន​) គ្រី​ស្មាន់ កំពុង​លេង​ល្អ​ដល់​ចំណុច​កំពូល ហើយ​លេង​បានល្អ​ក្នុង​តំបន់​បម្រើ ហើយ​អូស្មាន់ ដឹម​បេឡេ​ក៏លេង​ល្អឥតខ្ចោះ​ដូច​អឹម​បា​ហ្វេ​នៅ​ស្លាប​​ផ្សេង​ទៀត​ផង​ដែរ​”​។​

“​ប្រសិនបើ​យើង​គ្រាន់តែ​ផ្តោតលើ​អឹម​បា​ហ្វេ នោះ​នឹង​ក្លាយ​ជា​កំហុស​។ ពួកគេ​គឺជា​ជើងឯក​ពិភពលោក ជាមួយនឹង​កីឡាករ​លំដាប់​ពិភពលោក ហើយ​ពួកគេ​នឹង​ព្យាយាម​ដណ្តើមពាន​ឱ្យ​អស់​ពី​សមត្ថភាព ដែល​ពួកគេ​មាន​។ យើង​ត្រូវ​ផ្តោត​លើ​អ្វី​ដែល​យើង​អាច​ធ្វើបាន​ដើម្បី​បង្ក​បញ្ហា​សម្រាប់​បារាំង​”​។​

​អឹម​បា​ហ្វេ ដែល​លេង​នៅ​ស្លាប​ឆ្វេង នឹង​ត្រូវ​ប៉ះគ្នា​ជាមួយ​មិត្ត​រួម​ក្លិប Paris St Germain និង​ជា​មិត្ត​ជិតស្និទ្ធ គឺ អាក្រាហ្វ ហា​គីមី (Achraf Hakimi) ដែល​ជា​ខ្សែការពារ​ស្លាប​ស្តាំ​លំដាប់​កំពូល​របស់​ម៉ារ៉ុក​

​គ្រូបង្វឹក​ម៉ារ៉ុក លោក វ៉ា​លី​ដ រី​ហ្គា​ហ្គី