​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ នាង ផាន ធី ញី​វ (Phan Thi Nhieu) បាន​ចំណាយពេល​មួយ​ទសវត្សរ៍​ធ្វើ​ការងារ​ដំឡើង​ស្បែកជើង​សម្រាប់​ម៉ាក​ល្បីៗ​ទូទាំង​ពិភពលោក​ដូចជា Timberland​និង K-Swiss ប៉ុន្តែ​ឥឡូវនេះ​នាង​ស្ថិតក្នុង​ចំណោម​កម្មករ​រោងចក្រ​វៀតណាម​រាប់សែន​នាក់​ដែល​ត្រូវបាន​បញ្ឈប់​ពី​ការងារ​ដោយ​សារ​អ្នកប្រើប្រាស់​លោកខាងលិច​កាត់បន្ថយ​​ការចំណាយ​។​

​កម្មករ​ជិត​កន្លះ​លាន​នាក់​ផ្សេង​ទៀត​ត្រូវ​បង្ខំ​ឱ្យ​ធ្វើការ​តិចជាង​ម៉ោង​ជាង​មុន ដោយសារ​ការបញ្ជាទិញ​ធ្លាក់ចុះ​នៅក្នុង​ប្រទេស​អាស៊ី​អាគ្នេយ៍​មួយ​នេះ ដែល​ជា​ប្រទេស​នាំចេញ​សម្លៀកបំពាក់ ស្បែកជើង និង​គ្រឿង​សង្ហា​រឹម​ធំ​បំផុត​មួយ​របស់​ពិភពលោក​។​

​វិបត្តិ​ថ្លៃ​ចំណាយ​នៃ​ការរស់នៅ​នៅ​អឺរ៉ុប​និង​សហរដ្ឋ​អាម៉េរិក ដែល​ជា​ទីផ្សារ​សំខាន់​សម្រាប់​ទំនិញ​ផលិត​ដោយ​វៀតណាម បានឃើញ​អំណាច​ទិញ​របស់​អតិថិជន​លោកខាងលិច​ធ្លាក់ចុះ​។​

​កម្មការិនី​រោងចក្រ ដែល​មាន​ចំនួន ៨០ ភាគរយ​នៃ​កម្លាំង​ពលកម្ម​ក្នុង​ឧស្សាហកម្ម​កាត់ដេរ​របស់​វៀតណាម បាន​រង​ផលប៉ះពាល់​ខ្លាំង​បំផុត​ដោយសារ​ឥទ្ធិពល​ដួលរលំ​មួយ​នេះ​។​

​កាលពីដើម​ខែ​មុន នាង​ញី​វ​អាយុ ៣១ ឆ្នាំ ដែល​រស់នៅ​ក្នុង​បន្ទប់​ទំហំ ៩ ម៉ែត្រការ៉េ​ក្នុង​ទីក្រុង​ហូជីមិញ​ជា​មួយ​កូនប្រុស​តូច​ពីរ​នាក់​និង​ស្វាមី​វ័យក្មេង​របស់​នាង​ត្រូវ​បាន​ប្រាប់ថា​នាង​លែង​ត្រូវការ​​នៅ​ក្រុមហ៊ុន Ty Hung​ទៀតហើយ ដែល​វា​ជា​ក្រុមហ៊ុន​ផលិត​ស្បែកជើង​តៃវ៉ាន់​ដែល​ផ្គត់ផ្គង់​ដល់​យីហោ​លោកខាងលិច​ធំៗ​។​

​នាង​បាន​និយាយ​អំពី​ការប្រកាស​របស់​ក្រុមហ៊ុន Ty Hung​ក្នុង​ការបញ្ឈប់​កម្មក​រ ១.២០០ នាក់​ក្នុងចំណោម ១.៨០០ នាក់ យ៉ាង​ដូច្នេះ​ថា “​ពួកគេ​បាន​ប្រាប់​យើង​ថា​ពួកគេ​មិន​មាន​ការបញ្ជា​​ទិញ​គ្រប់គ្រាន់​ទេ​។​ខ្ញុំ​ពិតជា​រន្ធត់​និង​ភ័យខ្លាច​ខ្លាំងណាស់ ខ្ញុំ​ស្រែកយំ ប៉ុន្តែ​ខ្ញុំ​មិន​អាច​ធ្វើ​អ្វី​បានទេ ខ្ញុំ​ត្រូវតែ​ទទួលយក​វា​”​។​

​ការងារ​នេះ​រកបាន​ចំណូល​ឱ្យ​នាង​ញី​វ​បានត្រឹមតែ ២២០ ដុល្លារ​ក្នុង​មួយ​ខែ​នៅ​ក្នុង​ទីក្រុង​ដ៏​ថ្លៃ កន្លែង​ដែល​ប្រាក់ចំណូល​ប្រចាំខែ​ជា​មធ្យម​គឺ ៣៧០ ដុល្លារ ប៉ុន្តែ​ប្រាក់ខែ​គឺ​ជា​ចំណូល​ទៀងទាត់​ដែល​​គ្រាន់បើ​ជាង​ការដើរ​រើស​ផ្សិត ដែល​នាង​ធ្លាប់​ធ្វើ​កាលពី​វ័យ​ជំទង់​ក្នុង​តំបន់​ដីសណ្ដ​ទន្លេមេគង្គ​ដ៏​ក្តៅ​បែក​ក្រ​ហែង​៕

នាង​ញី​វ(ស្តាំ)​ស្ថិតក្នុង​ចំណោម​កម្មករ​រាប់សែន​នាក់​ដែល​គេ​បញ្ឈប់​ពី​ការងារ ដោយសារ​លោក​ខាងលិច​កាត់បន្ថយ​ចំណាយ