​ប្រែ​សម្រួលៈ​បំណង​(​ស្ត្រេត​ថែមស៍​)៖ ប្រភព​លោកខាងលិច​ចំនួន​ពីរ​បាន​និយាយ​កាលពី​ថ្ងៃ​ពុធ​ថា ក្រុម​ប្រទេស​G7​បាន​យល់ព្រម​ជា​មួយ​វៀតណាម​ក្នុង​ការផ្តល់​មូលនិធិ​ចំនួន​១៥,៥​ពាន់​លាន​ដុល្លារ​សំរាប់​​អន្តរកាល​របស់​ប្រជាជាតិ​អាស៊ីអាគ្នេយ៍​មួយ​នេះ​ចេញ​ពី​ការប្រើប្រាស់​ធ្យូង​ថ្ម ។​

​កិច្ចព្រមព្រៀង​នេះ​ត្រូវ​រំពឹងថា​នឹង​ត្រូវ​ប្រកាស​នៅ​យប់​ថ្ងៃ​ពុធ​នៅ​ទីក្រុង​ព្រុច​សែ​ល​នៅក្រៅ​ជំនួប​កំពូល​អាស៊ាន​និង​សហភាព​អឺរ៉ុប​។​

​វៀតណាម ស្ថិត​ចំណោម​ប្រទេស​ម្ភៃ​ដែល​ប្រើ​ធ្យូងថ្ម​ច្រើនជាងគេ​នៅក្នុង​លោក ។​ប្រទេស​នេះ​ដំបូង​គ្រោង​ចុះហត្ថលេខា​លើ​កិច្ចព្រមព្រៀង​«​ភាព​ជា​ដៃគូ​អន្តរកាល​ថាមពល​ត្រឹមត្រូវ​»​ជាមួយ​ក្រុម​ប្រទេស​G7​នៅ​ជំនួប​កំពូល​អាកាសធាតុ​ពិភពលោក​COP27​កាលពី​ខែ​វិច្ឆិកា តែ​កិច្ចពិភាក្សា​ជាន់​ខ្ពស់​បាន​ជាប់គាំង​មុន​ជំនួប​នោះ​។​

​វៀតណាម ស្ថិត​ចំណោម​ប្រទេស​ម្ភៃ​ដែល​ប្រើ​ធ្យូងថ្ម​ច្រើនជាងគេ​នៅក្នុង​លោក​

​ដើម្បី​បញ្ចុះបញ្ចូល​អោយ​វៀតណាម​គាំទ្រ​កិច្ចព្រមព្រៀង ពួក​អ្នក​ចរចា​លោកខាងលិច​ដឹកនាំ​ដោយ​សហភាព​អឺរ៉ុប​និង​អង់គ្លេស​បាន​បង្កើន​ចំនួន​មូលនិធិ​នេះ​ម្តង​ហើយ​ម្តង​ទៀត​ដល់​រដ្ឋាភិបាល​ទីក្រុង​ហា​​ណូយ​។​ពាក់កណ្តាល​នៃ​មូលនិធិ​នេះ​នឹង​ចេញពី​រដ្ឋាភិបាលនិង​នៅ​សល់​ពាក់កណ្តាល​ទៀត​បាន​មក​ពី​វិស័យ​ឯកជន ហើយ​មួយចំនួន​តូច​ទេ​ជា​ជំនួយឥតសំណង​នៅពេល​មូលនិធិ​ភាគច្រើន​ជា​កំចី​សំ​​រាប់វិន​យោគ​សាធារណៈ​។​

​បណ្តា​ប្រទេស​លោក​ខាងលិច​បាន​ជំរុញ​បង្កើត​មូលនិធិ​នេះ​ដោយ​ផ្តោត​លើ​គំរោង​ដូចជា កសិដ្ឋាន​កង្ហារ​យក្ស​ផលិត​អគ្កិសនី​នៅ​សមុទ្រ និង​ការធ្វើអោយ​ប្រសើរ​បណ្តាញ​ចែកចាយ​ចរន្តអគ្គិសនី​ថ្នាក់ជាតិ​។​

​វា​ជា​កិច្ចព្រមព្រៀង​ដូច្នេះ​លើក​ទី​បី​បង្កើតឡើង​ដោយ​ក្រុម​ប្រទេស​G7 នៅពេល​មាន​សម្ពាធ​អោយ​ប្រទេស​អ្នក​មាន​ជួយ​បណ្តា​ប្រទេស​ក្រីក្រ​ដោះស្រាយ​នឹង​ការប្រែប្រួល​អាកាសធាតុ​ហើយ​ធ្វើ​អន្តរកាល​​ឆ្ពោះទៅ​កាន់​ថាមពលបៃតង​។​ក្រុម​នេះ​បាន​ចុះហត្ថលេខា​ស្រដៀង​គ្នា​ជាមួយ​អាហ្វ្រិក​ខាងត្បូង និង​ឥណ្ឌូនេស៊ី​កាលពី​ឆ្នាំមុន​៕