​ប្រែ​សម្រួល : កញ្ញា​ដា​លី​ស (​ដេល្លី​ម៉េល​) ៖ ក្រុមហ៊ុន​អាកាសចរណ៍​ជាតិ​របស់​ម៉ារ៉ុក​បាន​និយាយថា​ខ្លួន​លុបចោល​ជើងហោះហើរ​ទាំងអស់​ដែល​បាន​គ្រោងទុក​សម្រាប់​ថ្ងៃ​ពុធ​នេះ​ដើម្បី​ដឹក​អ្នកគាំទ្រ​​ទៅ​កាន់​ទីក្រុង​ដូ​ហា សម្រាប់​ការប្រកួត​វគ្គ​ពាក់កណ្តាល​ផ្តាច់ព្រ័ត្រ​វើល​ខា​ប់ ដោយ​លើកឡើង​ពីអ្វី​ដែល​ខ្លួន​និយាយថា​ជា​ការសម្រេចចិត្ត​របស់​អាជ្ញាធរ​កាតា​។​

​ក្រុមហ៊ុន​អាកាសចរណ៍​បាន​និយាយ​នៅក្នុង​សេចក្តីថ្លែងការណ៍​តាម​អ៊ីមែល​ថា “​បន្ទាប់ពី​មាន​ការ​រឹតបន្តឹង​ចុងក្រោយបង្អស់​ដែល​ដាក់​ចេញ​ដោយ​អាជ្ញាធរ​កាតា ក្រុមហ៊ុន Royal Air Maroc មាន​ការសោកស្តាយ​ក្នុង​ការជូនដំណឹង​ដល់​អតិថិជន​អំពី​ការលុបចោល​ជើងហោះហើរ​របស់​ពួកគេ​ដែល​ដំណើរការ​ដោយ​ក្រុមហ៊ុន Qatar Airways”​។​

​ការិយាល័យ​ប្រព័ន្ធ​ផ្សព្វផ្សាយ​អន្តរជាតិ​របស់​រដ្ឋាភិបាល​កាតា​មិនបាន​ឆ្លើយតប​ភ្លាមៗ​ចំពោះ​សំណើសុំ​ការបំភ្លឺ​ទេ​។​

​ក្រុមហ៊ុន Royal Air Maroc មុននេះ​បាន​និយាយថា ខ្លួន​នឹងដាក់​ជើងហោះហើរ​បន្ថែម​ចំនួន ៣០​ដើម្បី​ជួយ​អ្នកគាំទ្រ​ទៅកាន់​ប្រទេស​កាតា​សម្រាប់​ការប្រកួត​វគ្គ​ពាក់កណ្តាល​ផ្តាច់ព្រ័ត្រ​យប់​​ថ្ងៃ​ពុធ​ជាមួយ​បារាំង ប៉ុន្តែ​កាលពី​ថ្ងៃ​អង្គារ ប្រភពពី​ទី​ភ្នាក់ងារទេសចរណ៍ RAM បាន​និយាយថា មានតែ​ជើងហោះហើរ​ចំនួន ១៤ ប៉ុណ្ណោះ​ត្រូវបាន​គ្រោងទុក​។​

​ការលុបចោល​ជើងហោះហើ​រទាំង​ប្រាំពីរ ដែល​បាន​គ្រោងទុក​នៅ​ថ្ងៃ​ពុធ​នេះ មានន័យថា RAM អាច​ហោះហើរ​បាន​តែ​ប្រាំពីរ​ជើង​កាលពី​ថ្ងៃ​អង្គារ​ប៉ុណ្ណោះ ដែល​ធ្វើឱ្យ​អ្នកគាំទ្រ​ដែល​បាន​កក់​សំបុត្រ​ការប្រកួត​ឬ​បន្ទប់​សណ្ឋាគារ​រួចហើយ មិនអាច​ធ្វើដំណើរ​បាន​ទេ​។​

RAM​បាន​និយាយថា ខ្លួន​នឹង​សង​ថ្លៃ​សំបុត្រ​យន្តហោះ​វិញ​និង​សុំទោស​អតិថិជន​៕

​ក្រុមហ៊ុន Royal Air Maroc លុបចោល​ជើងហោះហើ​រដឹក​អ្នកគាំទ្រ​ម៉ារ៉ុក​ទាំងអស់​នៅ​ថ្ងៃ​ពុធ​នេះ